留住抑或糟蹋 ... ...

留住這刻，抑或，糟蹋這刻？



自己好懶，所以相當鍾意攝影，貪佢夠快手快腳，唔駛一秒可以捕捉影象；要我攞本 sketch book 出嚟寫吓生扮吓 art student，老實講，好耐冇咁嘅雅興。同樣，因為懶，懶睇書，所以相當歡喜逛博物館，有冷氣涼之餘，又有珍品實物睇，親身體會印象都深刻啲。花少少錢仲有埋導賞耳機講解，好似走入歷史故事書咁，絕對冇齋睇書睇圖睇字咁鬼悶。

英國大部份博物館內都禁止攝影，我覺得係好事。雖然我都有嗰種貪念，覺得影鬼低晒啲珍品就好似擁有咗佢咁，頓時倍覺入場費都抵啲，但同時又博物館又影相，我覺得真係一種雙重浪費。浪費了細味博物館環境和內容的三維時光，浪費了攝影這個媒體去記錄一些應該用肉眼去欣賞的美事，兼，瘋狂攝影對己身和他人的騷擾，絕對費神！所以，真係唔係好明，意大利同法國咁鬼多博物館都任由遊客肆意瘋狂胡影？！不止令 postcard、精品生意受損，仲影嚮埋整個觀賞氣氛。

著名如 The Notre Dame (教堂)、Musée d'Orsay、羅浮宮 (上圖)，話就話禁用三腳架、閃光燈，但啲傻瓜機傻瓜又點會理你呢！？試問有幾多人會有公德心地熄掉自己隻閃光燈先至入 museum 呢？(如同在戲院將手機變震一樣) 一閃一閃，騷擾到爆，啲 paintings 真係多得你哋唔少！

(見上圖下) 不過，有時見到啲拍友，係咁影係咁影係咁影 (我就係咁影佢哋)，對焦嗰件話晒都係藝術瑰寶，相比起麻甩佬影車展女郎的猥瑣，已經易於入目了吧！

... ... ... ... ... ...



好明白，狂影喪影背後，莫非想留住這一刻。如果他朝科技先進到一個地步，有部攝錄機可以植入人體，將眼見的全都 save 起來，仲要係 HD，我諗誓必大賣，人人有一部，甚至兩三部 (好似而家啲相機咁)！一個三十歲嘅人，要 real time 睇番自己條片，需時要三十年，但我相信，現代人應該唔會介意同擔心，因為，「日本遊客式攝影師」根本唔會吓吓睇番自己成萬上億嘅相片！如果人人將 harddisk 內啲相都攞去曬 4R，破產個案一定激增！

有人選擇一邊遊覧一邊猛以記錄片形式記錄一切，意圖將現實全然 digitalize，我冇異議。只奇怪佢哋在記錄過程中，有冇用自己對肉眼、雙耳、皮膚去感受那現場嘅嗰份真實呢？如果有，我收口。如果冇，影咗九百幾張 jpeg，幾粒鐘 video，之後十年內又唔會 edit、翻睇，咁，千里迢迢去到彼邦，莫非就係為咗影嘢？何苦？

(見上圖) 唉，唔係話唔俾留住這一刻，但唔該喺唔糟蹋人哋那一刻嘅情況下先影吖老友！我就歡天喜地去見証人家最美一刻，你班 photographers 就排晒人牆擔晒梯阻 Q 住晒，真係唔知話你哋專業定專登阻住好！