Peter 高

敦倫的 McCann-Erikson 離我家不遠。每次經過都羨慕人家地方的低密度和開揚，建築物本身有性格富特色，不只是一幢商業大廈而已。早幾日，經過，發現 Peter Crouch (港譯「高治」) 高到上屋頂。



英國人的幽默，可以話是自信與創意的結合。工作中有空間，生活中有情趣，做人都開心啲。

... ... ... ... ... ...

在外地生活，每接觸到一些新事物，都是英語為主。以 Peter Crouch 為例，之前我真的不知道他「中文名」叫「高治」(另有譯名為「高洛治」)。跟在港的弟弟講波經提到他，都要注釋一番。

記得，差不多兩年前，剛剛落腳，有次跟班洋人同學踢波 (不知何解，極了亞洲人同行)，休息期間，傾波經。為表自己乃波壇活躍份子兼友善，我一輪嘴大談古今世界球壇點將錄。不久，洋人波友摸不着頭腦，問：「邊個係「輕-ry」？(Who's Henry？)」我心想：有冇攪錯，亨利都唔識？條友真「背」！於是我循循善誘地解釋：「Arsenal，前鋒，十四號，亨利，「輕-ry」喎！法國人呢！」波友恍然大悟：「哦！！！「安-ry」！Yes yes yes，佢好好波！你叫佢做乜話？」... ... 我即時呆着，好瘀，原來「Henry」法文音讀「安-ry」，非「輕-ry」。真係俾啲衰鬼中文譯音玩死！！！

其實，類似例子多的是。萬人迷「碧咸」，Beckham，英文人根本就不會讀個尾音做「咸」字，當中的「H」，只屬極輕聲，甚至無聲。讀「碧琴」就差唔多 (不過會比較乸)。同樣，「托定咸熱刺」的「托定咸」(Tottenham)，人家都是當那個「H」無到，甚至中間的那個「E」也略去，讀「Tot-林」。

與外國朋友溝通，怪異中文譯名真的給予我無比「學習機會」。除英文人名、地名外，日本人物、地名亦是難攪。「我鬼知木村哲哉英文/日本叫乜啫？！木村哲哉咪木村哲哉囉！... ... 吓？！乜話？... ... 講多次？！」到今時今日，問過日本同學不下十次，我仍然記不到木村的「國際讀音」。

與世界接軌，應該攪一攪番好啲譯音先，唔該。