13.2.06

寒假回憶+春季學期

寫 blog 的興致,近月都淡了。原因可能與這個忙碌的學期有關,又或者,有很多想說的,都在過去的半年裏反覆嘮叨過了。一時間,動力減了。

聖誕 term break,與內子回港一個月,返回有氣冇椗逗的超級都市生活。明白到,總之一回港,根本就沒甚可能悠閒。之前在英幻想在港閒暇的情境,其實都十分 surreal。單單見見親人、親戚、教會弟兄姊妹、朋友,都去了三份之二時間 (原來兩口子的社交圈加起來可以頗大唷);感覺有點像結婚擺酒當晚般 —— 開開心心的與到訪來賓「say hi」,忙到九彩,轉瞬間,已經要到門口握手送客了。剩下的三份一,都多花在「辦年貨」和吃喝玩樂上。

添置英國貴到無倫的物品,如 inkjet printer 紙和墨、母親大人的愛心海味等,準備郵寄,確保存貨夠用。吃喝玩樂方面,大致上都十分「留學生」,充滿「海外華僑 feel」,「港味」十足。美食巡禮、唱唱 K、逛逛一些「新」蒲點,如 apm,都是指定動作,如果問我是否真的 enjoy?我需要諗諗 ... ... 。好像有些事情,奇怪地,隨着每一次從英返港 (共兩次,去年復活節及今次),都自自然然地漸漸少做了,甚至失去了興趣 (倪匡話齋,好像忽然覺得 quota 用完了似的)。例子有唱 K、消費、睇電視、出旺角、去銅鑼灣、揭雜誌等,不是絕對地嫌惡或興趣盡失,硬係好像少了一份往昔的「過癮」。K,只去過一次,都是唱回「史前」的歌,新的都不曉,完全不知 Solar、側田等新晉係乜水。感到自己最 out 的一刻,莫過於身旁的朋友都朗朗上口,「已選歌曲」列上所識的歌寥寥可數。嚴重的是,自己已感到毫不怯懦,闊佬懶理自己的 update 程度了,完全沒有心力去追。至於消費,更覺得自己越來越沒有盡康港市民的責任,沒有好好地去盡情消費去推動經濟。衫褲鞋襪,其實已經一無所缺,可能款式未必最潮,但為了自己輕鬆點,大早已奉行「隔幾代政策」,即不常常走在潮流最前,偶爾入件最新款,但隔一大輪才換款 (常應用貨種:手電、波鞋、Mac)。遍地蓋天的廣告,無孔不入的媒體,其實已經將康港人漸漸洗了腦,消費主義像信仰般,已在人們心中植根。「我究竟需要這服務麼?」「我究竟需要這貨品麼?」已被庸俗的價值觀掩蓋了 (嗰啲死人雜誌睇見都眼火爆!)。

一開學,就多多事要幹。先有轉科,後有排山倒海的 projects 和比賽,加上在港期間接了的 freelance,一時間要來個適應位。由這學期起,主修科從 illustration 轉去 design,原因無他,只想充實一些,productive 一些,做點 D&DA graphic briefs,修讀 typography。不少同學問及我轉科的原因,問是否不喜歡 illustration?其實不知多歡喜畫插畫和 image making,又自由,又可以藉圖像講自己想講的,不過,略嫌自己生性比較「悠」,如果繼續在 illustration department,恐怕會由「悠」變「懶」。加上,真的希望在這裏做些 graphic projects,雖則自己以前以 graphic 幹活了多年,但始終覺得所經歷的與這裏的不盡相同。

這個學期,開始仔細點想想前路,想想自己年半後完成此課程去向如何。五光十色喧爛奉行盆菜逼爆風格的家鄉,可有設計創作空間?留英搵工,自己可有本事嗎?

5 Comments:

At 14/2/06 11:16 am, Blogger ablogaday said...

Soler都串錯,證明你真係out啦!

不過呢個out就只係限於康港,out又點嗟?你大可以撻一渣英倫新人黎睇下我地又係咪夠in格... 拿!咪又係響度攻防格鬥一番...

無blog寫對我呢個讀者黎講又真係幾興架!不過康港D報紙舊係日日要出都好似無咩講到,最多咪趁住今日情日節又夾硬整多幾大版既advertorials。你有無見過D鬼佬報紙用呢D野黎做頭條架?

搵工唔一定要留英或者返港架,個世界咁大有排都唔會睇晒。或者諗下南非都得架!唔好以為個度好落後,其實白人加埋黑人、先進溝埋落後乜都齊,個種fusion會叫你大開眼界...

 
At 17/2/06 12:02 am, Anonymous Anonymous said...

見你咁講...
又有點好似回到初初讀完第一次設計課程時果種 [有點徬徨] 既感覺 ...

 
At 17/2/06 2:07 am, Blogger 學子 said...

其實 out 唔 out 已經麻麻地在乎,只在乎自己 miss 咗一啲唔應該 miss 嘅可貴事物 (好明顯,好多康港潮流產物不屬此類)。頗討厭被人反問:「吓?乜 Soler 你都唔識咩?」又或者「apm 開咗好耐啦喎,你唔係未去過嘛?」面對如此「細」界觀,我只好回一句:「我 out 嘛!」好令對方戰勝自己,繼而讓他滿足地離開。資訊爆晒澎,就等如我哋乜都要知咩?放過我啦!大佬/姐!

回英後留意到康港新春的新聞,跟前幾年的都「熟口熟面」,充滿「炒冷飯 feel」,都是 loop 着又 loop 着。吹氣產品市況、年宵攤檔賺幾多、賀年食物警報、天氣令市民著多幾多衫、有市民因天氣轉涼去了打邊爐、新年頭胎出生係男係女、玄學大迷信 ... ... 真係悶出巨鳥來!

... ... ... ... ... ...

搵工、徬徨、慨嘆 ... ... 都在不同程度上伴着康港設計人成長。樂觀啲睇,可以呢啲不利因素,正係啟動大家向前嘅動力呢!

 
At 17/2/06 4:16 pm, Blogger ablogaday said...

你咪話,我認為今年年宵賣既吹氣產品認真唔熟口熟面,兼且有D驚喜。唔再係吹氣Hello Kitty, Melody或者咩Disney人物,而係吹氣較剪、吹氣摺椅、世貿期間康港警察用既透明盾牌吹氣版、同埋吹氣石油氣樽等等,又真係幾創新同有康港特色。睇住響維園走出黎既人一家大細個個托住一樽石油氣,真係幾過癮!聽聞每個卅零蚊,D人排晒長龍等bump氣,有D都等唔切就咁lor走算數。呢個老細發lor,今次...

 
At 18/2/06 12:00 pm, Blogger 學子 said...

始終覺得去年第一水賣吹氣摺櫈那位仁兄較富創意 (唔知今年石油氣樽那位是否同一人),其後的,無論吹氣乜义都好,都屬「果留香」「7 Days 紙巾」「東週刊」「名鉄便利店」「阿大靚湯」「元神壽司」「乜乜柚子茶 (一定係黃色包樽招紙+毛筆字)」... ... etc etc. 通通𢴇人口水,甘願食第二三水之輩!

如果今年的吹氣嘢都係同一人手筆,咁抵佢發啦!

(其實,吹氣嘢有乜意頭?同新年有乜關係呢?和和「氣氣」?唔係咁監硬嚟嘛?!)

 

Post a Comment

<< Home