爆炸普及攝影

講開又講，數碼攝影爆炸式普及後，有幾樣嘢，自己都幾怕 ... ...

1. 無論室內外，光線有多充足，啲人都覺得影相時有閃光燈閃兩下，先至係「正常」，先覺得「影咗」。如果因為進階 mode 導致閃光燈冇閃到，啲人就會即刻懶醒咁問：「點解冇閃光燈嘅？影唔影到㗎？不如影多張有閃光燈㗎啦！」嗰種執着，真係吹脹！

2. 每當影完一張人物照，相中人 (少則一個) 必定探頭前來問：「睇吓！睇吓！」Digital 相機嘅 preview 功能，你都咪話方便得晒。

3. 一影集體相，做攝影嗰個就認真頭痕。「幫我影埋！」「我又要！」手得一雙，但就要拎住一大抽相機逐隻逐隻咁影呀影，都咪話唔甘。


攝於羅馬許願池前

4. 影相數碼化，唔似得以前下下要買菲林、帶菲林、裝菲林、keep 菲林、晒菲林、存菲林咁繁複，一張幾 Gig 嘅 CompactFlash 攪掂晒。一張記憶咭大大話話可以裝成千張相，認真巴閉。不過，一旦有意外！(例如死咭、遺失相機、戇居地 format 咗張咭等) 幾秒間所有心血就可毀於一旦，化為無形 ... 形 ... 形形形 ... ... 。到時，人們自然會懷緬笨重菲林的可愛、實在。

5. 鬥機，狂講相機經，狂齋鑽研 technical 嘢。我部相機 out、裝備簡陋，關你 Q 事咩？！而家影相定晒命呀？我鍾意係攝影，唔係採購或 technical support 呀，大佬。

6. 好驚好驚睇港式攝影雜誌，特別嗰啲甚麼教影人像 model 嗰啲麻甩佬玩意。排版唔講嘞。嗰啲 model 認真「㹴」，「鋪士」又「前衛」，構圖又「經典」，最最最正係嗰類攝影師個 style，非常「蒙特蕉」。

7. 遊客為咗記錄到此一遊影「人頭景點相」，fine！但係，喺人多嘅旅遊熱點，唔該被影嗰個同揸機嗰個唔好隔到雷咁遠，攪到中間條路好似係你哋咁！過路行人左閃右避以免入鏡，阻到你哋又唔好意思。你遲遲「清唔到場」係你自己低 B，唔該唔好皺晒眉「jeep jeep 聲」怪人唔讓你！！！