知專

這是我對「知專」一詞的第一次認知，第一個印象。(好嘢不厭百回看)

「知.專.里程 高級文憑課程」官方宣傳片

內文未定，已有好幾個熱心回應。不到四日，Youtube 擊點突破二千，兼榮獲「本週熱話廿五強」之殊榮。這條「知 . 專 . 里程」，認真利害！其宣傳之能，真係唔講得笑。

講番「知專」。

可能會有人問：「喂，學子，VTC、IVE 有乜嘢得罪你呀？你要咁鍥而不捨去詆毀佢哋！？差不多兩年前，已經寫咗篇《設計相學 II》唱衰咗呢條片一次啦，而家重擺上 Youtube 繼續唱衰，究竟居心何在？」

首先，我不覺得這是一種詆毀或抹黑，因為條片本身已經做晒所有負面功夫，我只是幫它一把宣傳宣傳而已。第二，其實我一直都沒有否定 IVE 或 VTC 所開辦的職業培訓課程的價值及社會功能。看不過眼的，是那日漸強大的偽教育理念，和「求學單是求碗飯」的求學氣氛和態度 ——「知專意識形態」。

何謂「知專意識形態」？細讀上述短片歌詞，相信已略知三四。讀書不成不要緊，「知專」就是大家的出路。多個入學點，多個畢業點，靈活多變免重讀，幾時讀幾時走，任君選擇，升學 —— 冇難度！想讀甚麼科目隨心所欲，想當設計師？話咁易做到。要認受性有認受性，要設施有設施，要學生身份有學生身份，要出路有出路。有得玩又有嘢學，修畢課程，包搵到食。世上雖冇不勞而獲，但求學其實有捷徑，拿個高級文憑，讀多一年 top-up degree 就有學位，再讀多一年，分分鐘可獲碩士。持有學士或碩士，大可回母校作育英才，「印印腳」安安定定，樂優游。功利主義萬萬萬歲！

擁有「知專意識形態」的人或物，都愛強調「知識」「專業」「創意」「理想」「挑戰」「發揮」「另類」等，但事實上，他 / 它們與這些態度和價值觀都是毫無關係的。肚餓，才是「知專意識形態」最 concern 的事情，而一碗吃不完的飯，才是「知專意識形態」的終極目標。

大學，對「知專意識形態」而言是一種既愛且恨的東西。明知自己上不了，就意圖否定其價值，聲稱「大學生 portfolio 都可以像垃圾」，暗喻阿 Q 式的「英雄莫問出處」，一心的自 (我安) 慰。同時，變態地，又極想成為大學生，一圓楊麗娟式的夢。其實有志向本應值得高興，但可惜在「知專意識形態」和功利主義的信條下，三年學位課程實在令人難捱，所以 top-up degree 就應市出爐了！(記住：靈活多變免重讀！)

整個大機器，都是因應「知專意識形態」的需求而設，入局者前途是好是壞，乃個人選擇和取向，與人無尤。唯盼望「非知專意識形態」者審慎行事，不要誤信歪理，貪戀糖衣而錯服迷湯，令自己往後過着「快樂飽足的日子」。

「眾人以為美的事都要小心去作。」聖經

相關連結：
知.專.里程 高級文憑課程
香港知專設計學院