亞冧泥

亞冧泥，「alumni」之港式讀法，一般解作「校友」。但在教育商業化之下，亞冧泥，漸漸變成康港各院校在宣傳攻勢中的「光輝往績」、「成功產品」、「信心保証」、「幫襯咗我哋你第時就會變成佢哋咁成功㗎啦」；對於目標客仔（準學生）而言，亞冧泥，是一個「可見的希望」，形式等同減肥瘦身整容廣告中的成功個案，雖然有時有點兒超現實，但有版你睇，個心始終定啲，（家長）花錢（囝囝囡囡）花時間都好似有啲目標。縱使大家都知道那並非一個承諾。


四方帽乃畢業生之比喻，並不代表係亞冧泥都帶過。

亞冧泥，對於講求「噚日仲係學生，今日已經返得工」嘅「踏實」課程嚟講，更加重要。在剛剛過去嘅各大中細型設計畢業展中，見到過千設計界新血離開學校投入社會，仿如亂石投向森林，你永遠唔知那一顆石會擊中鳥，那一顆會中樹，那一顆會落空。一年過千，十年過萬，當中總唔會全數落空。「一石二鳥」者固然要大造文章，歌頌其母校功德；就算「擊中樹」的都大可以當作「奮鬥中」個案，大談其心路歷程及分享經驗。總之，大原則係，positive thinking，隱惡揚善。

有啲亞冧泥熟口熟面，算叫做有啲知名度，做代言人理所當然；有啲卻「都唔知佢係乜水」，履歷一般，叫座力說服力皆欠奉。為甚麼搵寂寂無名校友做亞冧泥？原因無他，客觀的成功例子來來去去都係得嗰幾丁，很有限，而且發跡唔係喺九十年代好景時，就係喺外國，唔夠貼近目標客仔背景，難 sell 矣。所以，土炮年輕才俊亞冧泥特別渴市。業界需要明星，市場需要人板，招生需要亞冧泥。因此，好似塑造唔夠高嘅0靚妹做0靚模咁，精挑細選一啲有賣點嘅，一於有樣賣樣，有胸賣胸。

葉展才，廿八歲，任職品牌公司五年，曾參與大型品牌包裝項目，有洗頭水、牙膏等。「我相信，要做到好設計，必先了解客戶和消費者需要。」

Doris Hung，從事廣告客戶服務多年，三年前到上海發展，親身體會祖國經濟飛快的發展。參與案子曾獲多個國際獎項。「香港人返國內發展仍大勢所趨，同學們應好好裝備自己迎接新挑戰。」

Apple Lau，去年英國彌敦郡海外一年制設計（榮譽）學士二級榮譽畢業，並贏得青年才俊設計師大賞，獲得廿五萬港圓獎金。現在是一名自由創作人。「設計就是生活。」

潘小恩，Punkie，多媒體創作人，畢業後與同學成立 P&K 數碼工作室，憑着天馬行空的創意去年贏得香港設計師協會兩個獎項。今年初更獲藝術發展局資助，出版個人畫作《我有 Say》。「學校的老師的確啟發了我，我不單學會了理論，更懂得實踐。衷心多謝學校！」

履歷無需太標青，穩打穩扎就夠，平凡中帶點不平凡最好，例如攞過獎。可能有人細閱過一啲亞冧泥履歷後，會咁講：「唓！有乜咁巴閉呀？佢哋只不過係普通業內從業員，發唔到圍又餓唔死嗰種咋喎！唔算係啲乜嘢堅人、成功校友喎？！」唉，今時今日，撈設計，有碗飽飯食吓已屬難得，咪咁心頭高啦！0靚模嚟咋，你估 Kate Moss 呀？！

鬼叫教育制度和業界市況先天殘障，導致蜀中無大將，海上無魚咩！？