漂亮洋樓兒

吃喝玩樂，一直對學子而言，都是一種寓娛樂於學習的活動(學子一早就不求分數地求學，所以亦...)。當中睇下人或周遭事物，都可以好富啟發性。特別身在異鄉時，行街、睇戲、睇電視、睇報紙、出街食飯、遊蕩、吹英文國語廣東話水，一切「戲無益」的事，通通變得「勤有功」。

某日，行行吓街，發覺有間地產鋪，十分骨子，於是乎便開始留意各地產鋪的裝潢。經一些十分不科學又不學術的觀察、研究和分析後，學子得出了「結論」—— 倫敦的地產文化，比起香港的，確係骨子不只九倍！


一講到地產，差不多個個香港人都有認識，至少，知道係同首富李有關。與地產相關的東西也隨處可見，乜乜中原美聯施永青，物物樓盤傳真睇樓王(乜鬼都稱王稱霸，真羞家！毫不謙遜。)，如果有幸到熱賣的筍盤參觀示範單位，俾經紀群圍過，一定深深咁體會到嗰種「熱鬧」。一些蚊型地產鋪，門口和窗廚嗰啲密密麻麻嘅螢光召租出售廣告紙，黃綠橙紅，其刺眼程度，仿似置身激光中！(見圖)在彼邦，估唔到，做地產的，原來可以與「elegant」呢個典雅的形容詞拉上關係。一則一則的「筍盤」告示，上下有序地陳列在精緻的托架上，當中的空間不至被填滿。告示的內容不單單是帶有腥臭的銀碼、尺數及四字形容詞，還有wide angle的室內外環境彩色圖片敍述，相片質素絕不是「也也烏」的東堤小築召租3R相咁草根(當然，啲盤是頗豪的)。特別一提的是，其文字的處理，明顯地有grid有諗過，仲竟然連尺數銀碼都不大於16 point！簡直令港燦學子，嘖嘖稱奇！

聽說，洋人買樓前是先會裝修一下的，為的是給買家一個較好印象及官能好感。學子還以為這只出現在租盤，原來賣盤亦然。對於看慣只有數據廣告的螢光紙，甚至虛擬樓花盤的學子來說，真是蔚為奇觀。