失落於巴黎鐵塔下

(音樂起 ... ... )
(副歌)
La Tour Eiffel, La Tour Eiffel
代我隱藏傷感，每一個夢只想向你移近
La Tour Eiffel, La Tour Eiffel
沒法抵償的心，已失落於巴黎鐵塔下 ... ...

如果你係伍姑娘 (資深廣告人練海棠之妻) 嘅歌迷，相信以上一段歌詞對你嚟講應該唔會陌生。

N 年前聽到呢首歌都冇乜特別反應，只覺得：嗰兩句歌詞講乜呀？！... ... 事隔 N 年，估唔到，「失落於巴黎鐵塔下」竟然應驗喺我身上！

上星期，終於搭「歐洲星」去咗鄰國巴黎走走，去去 LV 齋睇，俗到爆地到羅浮宮 Da Vinci Code 一下，參觀大名久仰嘅 Centre Pompidou，遊歷仲豪過康港豪宅嘅「煩耳菜公」，睇睇 Q 版自由神像，逛逛「鄉謝厲瀉大盜」，上上「海船瞞」 ... ... 等等，一心計劃喺最後一晚，登上 La Tour Eiffel，遠眺巴黎夜景，與內子浪漫一下。嘿！點知，成個旅程都陽光普照，好似非洲咁熱，嗰晚就正正落晒傾盆大雨，雷電交加！你知啦，話明「鐵塔」嘛，行雷閃電喎，座塔又雷咁高，咪好危險？！擾攘咗好耐，又避雨又盤算，最後因為太晏，當晚冇上到塔。

翌日，諗住返敦倫前再試試，點知遇着「超長水蛇春」！唉，注定要失落於巴黎鐵塔下。

... ... ...

嗰晚有幾雷電交加？(見圖) ... ... 阿 Q 啲諗：雖然係失落啲，但總算影到啲「奇景」。


絕無 retouch，有就正衰仔！