讀書寫字

寫咗blog後，個人開朗咗，精神咗，冇咁悶悶不樂，靚咗又健康咗，真係要多謝朋友介紹，令學子生活倍添優柔！

如果閣下相信以上「減肥加補習天王式」的廣告「鐵證」口吻，一定係細個時冇好好地讀書寫字。

「讀書寫字」、「返學」、「上堂」、「考試」等動作的意義，莫過於增進知識和培育人去懂得獨立思考兼有判斷力。如果社會上，大部份人都接受過基礎教育，但低劣宣傳仍大把人信以為真，蓬蓬勃勃，那麼，基礎教育是否要再打打個基礎呢？

學子只是學子一名，以消費者(受害者)角度出發，冇料去批判或反建議現有敎育制度或社會狀況，有的只是一大堆問號同牢騷。讀書寫字都是離開了學校才真真正正地愛上，以前只視之為苦差煉獄；除了術科如美術、音樂、體育、作文、話劇(一切唔駛讀嘅科都鍾意)等，只有中文作文比較高分同享受，其他各科都完全提唔起興趣。終極原因不明，總之就覺得背咗啲書去考試是世上最最最冇趣的事！是的，「有冇趣」對少年學子(其實而家都係)來說是十分重要的，它是動力所在，可惜香港教育制度冇乜叻，凡事「悶蛋化」最叻！

有時諗吓諗吓，做乜會離開學校先愛讀書寫字呢？應該讀書寫字時唔讀書寫字，咁錯配？唔知呢種犯賤現象有冇出現喺其他人度，如有，學子認為原因可能係 ... ... 一，脫離了「悶蛋化」機制，讀書寫字回復其天然本質，再不被試卷拘束，可能性和自由度大了，空間也大了。二，知識本各科互通，文字世界可以因個人趣向變得吸引，如學子愛設計，引伸至社會歷史文化政治等本來看似悶蛋的都變成有晒關連！個人興趣變成閱讀的導管。三，反叛的人都為反叛而反叛，冇人逼迫，反而有好人做！(咁先夠犯賤嘛！)

做設計的人都常常堅稱自己最怕睇書，見到字就眼瞓，莫講長篇大論地寫文章，software manual都懶睇。大多設計課程也迎合市場需要，紛紛免去research思考寫作嗰part，一於以「一圖勝千字」為綱領，「用visual去communicate嘛！駛乜攪咁多文學嘢！」可能就因為咁，有些同業是「文盲」來的。

牢騷發極唔完，講吓今日在BBC Shop的戰利品。一套由BBC製作的電視節目，有關藝術如何締造人類歷史和人類歷史如何締造藝術。有益身心指數爆燈！學子早前在電視睇咗兩三集，miss咗兩集，特登買來重溫兼送禮(大方的朋友應該冇異議)！最正係做緊promotion，買DVD連本厚厚的書，慳成£8！DVD送朋友，本書自用，筍！