PhD in 相夫教子

學歷呢家嘢好有趣，有啲行業好著重佢，有啲就只作參考，有啲甚至不理會；但是，係父母皆重視子女的學歷，因為他們大多相信它是安穩生活的鑰匙。

做設計，portfolio行先，直接代表了設計人的能力，學歷只代表一些背景，不是絕對的(有些似馬匹血統，係一種reference，但有總好過冇。很視乎那一類設計。)。學歷與設計能力之間，可以有好大走棧位(不幸地，這也成了設計行業難以專業化的原因)。「學歷非絕對」這種現象之出現，或多或少是因為該學科未在敎育體制及社會中成熟地建立和發展，加上學科本身可能對那些社會來說，是術科，好模稜兩可，好似「冇得讀」又「優劣難分」，所以在普羅大眾心目中，那些科目永遠不及醫生、律師、會計師等專業咁吃香，咁有認受性，咁搵得錢多。職業，分貴賤。

學歷是有其重要性的。在學術層面上有所成，達至一定學術資歷，是值得尊重的。如果唔係，邊有咁多「榮譽學位」出現。可是，(頗長的intro完結，哈！)在社會上，有很多很多極具功能的崗位，卻永遠冇得讀，冇獎攞，又冇名出。他們只有默默耕耘，努力去盡自己的責任，十分「不求自己的益處」。

其中，家庭主婦，是一種高尚而又冇得讀的profession。要成為一名專業能幹的主婦，絕非易事，所需要的技能，比起時下設計學生所要學的software還要多！齋講生仔、教仔，已經足以令眾女強人卻步了吧？據朋友告知，原來很多4As廣告公司做creative的女性高層，都是沒有子女的。這不是甚麼該行業的咒怨，而是說明了我們這一代，書讀多了，對生活的態度改變了，顧慮多了，選擇多了，guts卻沒了。試問而家仲邊有女仔夠薑三年抱兩呢？囍宴中三年抱兩的祝願，一一比董建華的假大空更假大空！通通係老爺奶奶們的一廂情願。肥師奶抱住兩個仔女去買餸的傳統美景，可能第日，要去到荒涼的香港歷史博物館才可見了。

見到嗰啲擔住口煙，瞇矇着眼，粗口爛舌地一口一口將二手煙排到懷中BB的呼吸系統裏去嘅所謂「媽媽」，就扯火！「媽媽生」佢就似！甚麼青少年問題，咪係啲家長唔夠pro之過！責無旁貸！相反，如果試過好媽媽不在身旁，獨自生活，家務全都落在自己身上，患上「主婦手」，沒有飯來張口呢支歌仔，湯要自己煲，俾啲滾油彈親，做餐死，又唔好味時，便會知道慈母的相夫教子及持家學問，簡直達PhD級數！

(媽媽，做乜只逗留十日咁少呀！嗚嗚 ... ... )