細味 WC

自幼稚園起，有兩樣嘢，一直鍾情至今，熱愛程度有增無減。一，唔駛講，art & design 嘢。喺呢度，吹咗差不多成年 design 水，都樂此不疲，自得其樂，少啲癮都難以持續呢。幼稚園時唔知乜係 design (而家都有啲 confused)，愛用粉彩蠟筆畫畫畫，做勞作，唔知點解，感覺最滿足最享受；長大後，幸運地做咗相關嘅勞動工作，雖然辛苦，時而無癮，但仍愛無謂攪作，快樂創作！深信遼闊嘅創作天空非局限於康港扭曲了嘅 skyline 之上。二，足球，英式嗰隻！(唔覺得美球足球係 football) 但唔算係嗰種精通足運歷史、球員球會資料嘅隻「人肉足球 google」，足球知識層面長期停留喺常識階段。如果硬要喺睇波同踢波之間擇其一，一定揀踢波。雖然又唔係踢得好好，入乜乜物物青年軍或甲乙組嗰隻，但總之一個月冇波踢，雙腳一定痕 (二來係因為康港腳)。有時遇着天雨或颱風 (大家知啦，康港最興週未打風落雨)，攪到冇波踢，心情會 down 晒。幸好幾年前日本仔發明咗 Winning Eleven，腳痕時都有啲慰藉。



出世後第一個屋企，係舊式唐樓嘅板間房，當時好興一屋分租俾多個家庭，好鬼熱鬧。客廳與天井 (廚房) 之間，一間一間板間房湊成一條長長嘅走廊，一頭一尾當作龍門，一個 size 剛剛好嘅兒童室內足球埸就此形成！大賽通常係我同年長三歲嘅哥哥一隊，對高頭大馬嘅堂大佬。日常賽事則以我同哥哥單挑為主。因為同住嘅大伯父生前係 100% 足球狂熱份子，所以在他熏陶下，足球牢牢地注入了我嘅血液當中。

八六年世界盃算係懂性以來第一次知發生乜事嘅世界盃。嗰屆雖然係馬勒當拿玩晒，一「手」兩腳地令阿國奪取第二次冠軍，但兒時嘅我，卻對富藝術美感嘅森巴足球發生嚴重興趣，就如被森巴女郎迷倒一樣。而至愛、又支持得最耐嘅巴西球員，就係今屆首仗行行企企成粒鐘，最後被換出，只射過一腳波，賽後又話頭暈又盛，自己體型同佢越來越接近嘅「大哨」—— 朗拿度。係，雖然條友仔近年表現真係爭唔落，踢法由昔日喺巴塞嘅通場跑到今日嘅 ... ... 企，確實退色咗唔少，風頭更被「細哨」蓋過 (睇 Nike 啲 ad 就知)；但係佢嘅才華同 fit 嗰陣嘅表現，真係世間罕有，唔單只好波、擁有能人所不能嘅盤扭技術，最令人如癡如醉嘅係 ... ... 腳法實在太靚，太 creative 了！... ... 希望佢嘅巴塞年代返來，實在係奢望，但真係好想好想見番佢 ... ... 郁番多啲啲，勤力啲啲。



今屆世界盃，有幸喺英格蘭睇，氣氛熾熱非常。特別係英格蘭出戰時，睇見報章電視舖天蓋地咁話英格蘭今屆點勁點勁，甚麼自六六年攞唯一一次冠軍以來最勁嘅一代，真係不得不服咗佢哋嘅愛國情懷。對於成長於殖民地嘅我，類似嘅國家意識就真係冇咁強烈。

英國嘅免費電視台，BBC1 同 ITV1，聯合直播所有賽事，令呢項舉世觸目嘅盛事可以全民共享，窮人都有得睇。幾懷念康港以前同樣嘅直播方式，各電視台之間有競爭，觀眾又有選擇。好怕近幾屆康港啲直播節目，被收費電視台壟斷不特止，節目品味同取向簡直令人 (可能只屬小數) 慘不忍睹，攪到好似舞廰咁，又「世界妹」又甚麼「angel」，根本就係變種啤酒妹，喺度賣弄軟性色情！啲主持嘉賓，唔猥瑣嘅都唔請，一係就講埋啲賭波經，甚麼讓半球球半，間接宣揚賭波可以增加球賽觀賞刺激度，反之，足圈中人專業評論就買少見少 (阿叔又快要退休)，唉 ... ... 又一「凡事娛樂大眾化」嘅犧牲品。

英國嘅直播，BBC1 由連尼加 (Gary Lineker) 主持，夾三個球壇名宿嘉賓 (當中不乏世界盃前國腳)，共四條友仔，就係咁多！背景冇大龍大鳳，九彩佈置扮隆重，只係一個球場背景。主角永遠只係球賽本身，足球係焦點所在。點解節目中冇女？呢點真係唔知，可能係文化差異吧。(其實其他台有時有女主持，不過都係好端莊嗰隻)

到目前為止，今屆世盃，好波真係多的是。阿根廷喺對塞黑場波 (6:0)，demo 咗一次何謂強隊，何謂足球。南韓 2:1 反勝多哥，為東亞足球爭咗唔少光 (日本就 ... )。法國首仗和波！(我最開心) Kaka 救咗巴西。葡萄牙費高未老得晒，C 朗拿度繼續插花。英格蘭頭場悶蛋，第二場尾五分鐘似番啲樣，Rooney 復出，Gerrard 返番嚟。德國依然悶爆。... ... Adidas 對 Nike 漸露疲態，波衫 design 同概念個人覺得 Nike 略勝，特別嗰招 tailor-made typeface，因應不同國家傳統歷史背景 design 一隻字款用喺波衫上，突破且合理。雖然南韓同荷蘭嗰兩款數字麻麻地，有啲 off balance，但墨西哥嗰隻真係好正。Adidas 嘅老本依然食得唔錯，特別個 official 波波，尚保得住個一哥地位。

四年一度，持續一個月嘅連續劇，快要進入 second round，希望巴西生生性性，俾番啲顔色阿根廷睇。



早前友人告知，話德國當代殿堂級 graphic designer Erik Spiekermann，對世盃個嘜頭甚為不滿，丟晒架咁話。唉 ~~~ 唔係事後孔明，大師鬧我又鬧，其實最初見到呢個「笑哈哈 logo」，已覺佢騎呢，完全唔覺有德國傳統 graphic design 嘅質素。唔係話要下下四平八穩，入晒 grid 至夠德國，失望嘅係嗰份「冇信心」，嗰份「衰客 decision making 後遺症」，設計者嗰份「妥協」，出晒嚟。好認同 Spiekermann 帶出現時德國政治局面與設計之關係。環境、制度、涉及嘅人之多寡同質素跟完成品，無疑係有着天大嘅關係。我諗呢點，行家最感同身受。