一代老馮

先同馮姓嘅朋友 say say sorry，但真係諗唔到用其他形容詞去代替生動而傳神嘅「老馮」來形容某類人。

自己朋友唔算多，份人又唔算特別和善好人緣，但身邊有番咁上下交情嘅朋友絕大多數都良善得很，不乏大好人，我好享受當中嘅交心。有啲好友雖然唔係識咗好耐，未必經常見面，但一切心照，我好珍惜。有人話朋友係一面鏡，有乜朋友就某程度代表咗自己係邊類人，物以類聚。損友多，臭味相投，自己都唔慌係好人。當中有一類「朋友」，在知己良朋和損友以外。麻麻地熟，沒有半點情誼，冇交流，冇乜計傾，接觸純因為社交禮儀或一啲「工事」。邊類「朋友」？咪就係嗰種凡事以利益掛帥，為咗攞着數先講「友情」嘅菠蘿雞、老馮之輩也。

舊時讀設計，鄰座就有一位咁嘅菠蘿雞。Rubber Cement、masking tape、塗改液、間尺、顏色、marker、雲尺、紙、筆、腦 ... ... 乜 Q 都問人借！(當然梗係無得還嗰隻「借」) 大佬呀，借嘢俾同學無人會介意，但咪老馮吖！唔關長貧難顧事，問題係唔該唔好當人懵嘅。乜嘢係老馮攞着數，乜嘢係一時之急，大家有眼睇。真係唔明該女同學嘅面皮點解如此堅厚，靠幾分姿色咩？！又唔係好覺佢有吖？

自己唔算叻，但周不時都有朋友致電來問及有關設計嘅 technical 問題，我都好樂意以幫得就盡幫嘅心態去回答，因為自己都時有遇到同樣困境，好應該互相幫助。但日子久了，發覺有啲朋友，閒時電話飯局唔多見，一見親或通親電話，都係同「工事」有關，彼此關係就好似慢慢建立喺一問一答嘅層面上 ... ... 甚為冇癮。



俗語「菠蘿雞」泛指靠黐、愛佔人便宜嘅無恥之輩。此等人只顧自己利益，絕無顧及他人之基本人類本能意識。更甚者，更會當別人「阿四」，利用他人對自己的禮待，肆意地「盡舔」！總之別人一日禮貌地順意之，佢就一日駛到盡舔到盡！亳無唔好意思或客氣之意。主人家話：請當自己屋企，菠蘿雞便搏命地老馮不客氣！飲飲食食、自己顧自己、駛人唔駛本、當自己大帝、飯前等食、飯來張口、飯後即閃避執拾、人家出雞自己卻分毫不支，所謂朋友之間，只有單向利益輸送！去到尾，可能有一聲半聲虛偽答謝，但意義何在呢？想塞住別人把口，表現自己有修養？

節儉係美德，但闊佬自己孤寒人哋，就非常非常之令人討厭。免費嘅就一件不留，恩惠就要「舔」盡，略為倒轉就好似攞你命蝕晒底咁。作為一個心智正常嘅主人家，理應唔會下下機關算盡，施恩望報，但當發覺身邊嗰位原來係菠蘿雞，一直係度扮懵攞緊自己着數時，真係好有被人抽水之感！火都滾！

人，原來可以咁不知廉恥，咁厚面皮。可能有人會話呢啲人冇家教，但我就認為咁講太武斷，會鬧錯人家家長。理應成幾十歲人，出來社會做事冇十年都八年，無理由連最最最基本嘅待人接物都咁幼嫩，除咗個人修養，我諗唔到其他理由解釋如斯劣行。

... ... ... ... ... ...

世界上有啲人，無論讀書幾多，見聞幾多，搵錢幾多，吹到自己幾有品味幾有教養都好，只要稍為相處片刻，明眼人，不消兩嘢就知其原形，冇得呃。