design.edu.hk

design = 乜？

edu = education ?

hk =/= uk

冇乜「false hope」比「design.edu.hk」更「真實」，更令滿懷壯志得嚟又迷惘嘅年青人*相信、著迷、花錢同花時間。

升學又得，就業又得，原來之前學業上嘅敗績，可以讀兩三年「design.edu.hk 課程」一鋪翻生！天生我才，原來真係有用！

去唔到外國，可以留港讀。入唔到大學，可以讀 sub-degree。四年太耐，可以讀兩年制文憑。官校唔得，可以入私校。老師同學皆唔掂，可以靠自己。英文唔得，可以睇大陸簡體版。睇字唔掂，可以齋睇圖。入唔到好公司，可以做 freelance。唔敢自薦，可以去勞工處。價錢 mark 唔高，可以走街坊大眾化路線。做 design 搵唔到食，可以去選美 ... ... etc。(選擇多到你唔信)

面前康莊嘅闊路，邊個會預計得到會越行越窄？


「文、理、商、文商都唔掂，朝九晚五刻板工肯定 not my cup of tea。我要追尋我理想！」


「邊間讀設計好？」抑或「邊間先收我？」結果可以係兩極。人人走嘅闊路，就冇死錯人？


「好 free 呀！好自由呀！好型呀！好有創意呀！我要做創藝人！」「學歷唔重要嘅，最緊要 portfolio 掂！阿 Sir 話嘅。」歡樂時光過得特別快。闊闊嘅入口，出路又係咪一樣？


每年幾千名「設計畢業生**」投產，但環顧四周，設計市場真係咁大？創意工業多人講，但究竟有幾多人重視、幫襯？學就學外國嗰一套，做就做最 local 嘅市場，浸淫喺最 local 嘅價值觀中。

離開比留下容易，但留下，夠人掙咩？鬥平？鬥快？鬥所謂「creative」？鬥「無限 Q」？

離開過後，逃避過後，再上路？

藍，還未至於全灰？

... ... ... ... ... ...

「It's not how good you are, it's how good you want to be.」Paul Arden

路係自己揀，自己走的。亂投學，入錯行，其實唔可以怪任何人。被人誤導？都要被誤導者夠戇居才成事吧。

... ... ... ... ... ...

* 設計羊牯 [1] [2] [3]
**「設計畢業生」究竟即係乜？讀完高級文憑？低級文憑？副學士？副碩士？副博士？定係 ... ... 工聯會興趣班？！