又多又平又完美？！

名設計師願半價為飛龍「整容」
《明報》9月16日 星期二 05:10

【明報專訊】特區政府喺 2001年推出「香港品牌」計劃，以「飛龍」為標誌，宣傳本港，但就畀人笑唔似雞，唔似鳳嘅「飛龍」，唔能夠突出本港國際都會嘅形象。政府近排係度諗緊，係咪要為飛龍「整容」，改善吓線條同佢背後代表嘅香港核心價值。誰知呢個消息一出，國際品牌設計師余奉祖就自動獻身，話願意以半價為政府重塑品牌形象。

余奉祖設計標誌過百 獲獎無數

余奉祖來頭不少，喺設計壇上獲獎無數，曾為泰國曼谷設計首列架空鐵路BTS品牌，以及澳門科學館嘅標誌，05年在香港舉行嘅世貿部長會議，嗰個標誌亦係出自佢手筆。到而家計計埋埋，佢已經設計咗150個品牌標誌。

喺理工設計系畢業嘅余奉祖，據聞讀書嗰陣已被稱為「品牌大王」，畢業後第二年，23歲嘅佢就已經為和記大廈設計標誌，一鳴驚人。而喺06年時，佢曾經為中國文壇巨匠魯迅妻子許氏博物館設計標誌，亦獲魯迅後人評為「最完美」的徽號。

本來唔想登出嚟，怕污染敝 blog；但此報導如果屬實，實在搞鬼。

一、有麝自然香，以半價作招來，難免有失「大王」身份。鬥平麼？
二、「已經設計咗150個品牌標誌」又點？！鬥多麼？Landor 夠巴閉吧，咪出咗條「飛龍」囉！
三、澳門科學館嘅標誌設計比賽，「最終採用獎」得主為晏鈞設計，余生是五名「公開組榮譽獎」之一。
四、「據聞讀書嗰陣已被稱為『品牌大王』」，殊榮，殊榮。(賣椰汁麼？)
五、23歲?! 鬥細麼？一鳴 –– 驚人？！
六、「獲魯迅後人評為『最完美』的徽號」，perfect？！ 咪重利害過 Paul Rand？！咁魯迅後人有冇提及《阿Q正傳》呢？！

... ... ... ... ... ...

無意對大王級前輩不敬。
反而懷疑「知識份子報章」的公信力。
究竟哪是新聞還是廣告呢？

唉，好心啦~~~ ~~~ ~~~