最佳推動藝術良方

康港地，任你如何推廣藝術提倡創意，推來推去，搞呢搞路，都好似難有起色。市民時時分分秒秒為口奔馳，莫講話搞藝術玩雅興，就算連愛都少造(據乜乜物物調查顯示)。縱使三餐無憂，康港人多只會再追求更高層次之味覺體驗，甚麼阿鬚、肥滔、肥媽、周蔥師父、菜欄+美女變成家傳戶曉的人物，識飲識食變成唯一「修養」，講飲講食變成「全民共同嗜好」。不過「飽暖思淫慾」應該仍廣受市民大眾擁護兼承繼，否則《掌門淫》怎會長做長有越玩越似夜總會。

話雖如此，正所謂世事無絕對，學子經一輪觀察，先發覺形勢有D好轉。不知大家有否察覺到，每逢週未假日，不論室內外、大型商場或郊野海灘，但凡有小家庭出沒，都有「家庭業餘拍友」出現。他們拍攝的對象不外乎是他們的囝囝囡囡，和他們的囝囝囡囡，偶然，老婆也會入鏡。器材，都十分「中產」，鮮有普通低檔傻瓜機。千萬像數碼單鏡反光機，加幾吋粗原廠掛頸相機帶，加外形專業相機袋，甚至腳架，單睇「架生」(唔睇出品)，相當「專業」。據了解，這類「家庭業餘拍友」多「忽然藝術」。「老婆，囝囝就快出世，不如出旺角睇吓相機咯。」為了迎接新生命，記錄成長寶貴的每一刻，忽然，想起... ... 攝影藝術。(對上一次想起及對攝影有所要求，應該算是婚紗照了。)

「老公，囡囡都歲幾啦，要幫佢報名樓下會所個『創意繪畫親子班』嘞。」多數土生土長港人，小學六年級上完最後一課美勞堂後，大多就此與美術手工藝絕緣。因為認識不多，所以對藝術敬而遠之(除非，與錢有關)。但奇怪，一有下一代，再俗氣的父母都似要贖罪似的，慷慨地花真金白銀為子女鋪建藝術之路。琴、棋、書、畫、詩、詞、歌、賦、舞、樂、戲... ... 總之，自己唔識，都想個仔/女識。甘冒兩代文化隔膜之危，為下一代推廣藝術，不遺餘力。

生育，原來是推動本地藝術的良方，難怪曾凸手之前叫人生三件啦。



(不過，當然，仔女將來 萬一 真係 咁唔好彩 想以藝術為事業，就另作別論啦！)