10.8.05

自由星光派對

朋友遊倫敦,學子充當導遊,在海外都盡力實踐華弟提倡的好客之道,娛人娛己,不亦樂乎。(好似「我都做得到」咁體會到做導遊的「樂趣」)

應到值得到的景點都盡量到一到,例如:Big Ben,British Museum,Greenwich,St. Paul,China Town ... ... 等等。拍拍背景加人頭照片,買買精品,逛逛走走,談談天,聚聚舊,倒也不錯。但短短幾日,其實難以作較深度的旅遊,一些具地道文化特色的地方,往往被剔出行程表外。不過如果話花十多天齋遊倫敦,便要做足心理準備,回答在港朋友的質疑:「你唔去埋巴黎咩?咁浪費!」「最少都去下劍橋牛津啦!」「十幾日都踎喺倫敦?好悶㗎喎!」... ... 學子三年前就活生生地解釋過不下十多次了。

當然,都好明白難得遠道而來,想多到一些「著名」景點的心態,傳統上,這是十分「理所當然」的。但是,如果可以拋開世俗的眼光,不帶半個 Harrods 熊仔膠袋回港,試拍一些未必張張有自己個樣的隨意照片記錄一下途中的點滴,發掘一下一些非熱門的地方,或鮮為人知的店鋪,將自己由 tourist 變做 traveller,不是更有樂趣,更有型有款嗎? 到此一遊的觀光,太老餅了吧!

學子不是完全否定觀光這回事,只是想講講傳統以外,實在有更大更廣的世界有待「旅行者」去發掘,不單單指旅遊,其他領域亦然。

昨日到了 Madame Tussauds,觀光得像一名「自由人」,好鬼開心!(想起十個「流」的香港老翻星光大道同小小蠟像館,唉 ~~~!)

估吓佢地邊個打邊個啦!



7 Comments:

At 10/8/05 12:01 pm, Anonymous Anonymous said...

唔駛點估啦, 真得好緊要呀!!!!!!!
真到有d驚....

 
At 10/8/05 2:35 pm, Blogger AbsoluteVodkaCat said...

我去旅行, 我影10張相都冇一張有自己, 比人話我奇怪~有幾怪~?! 去旅行更係影當地特色咖啦~加埋自己入去做咩, 個畫面好地地做咩事加自己入去~! 但係同o的friend一齊影又另當別論~!

個側面tom cruise好似好似~!! 10個似~!!

 
At 10/8/05 6:24 pm, Anonymous Anonymous said...

一般香港人係有"default route"的,即係出到度,就係黎黎去去都係搭果條線既車去果幾度... 買手信係果幾度... 影相係果幾樹既果幾個角度... 總之一切都比default 更 default ...

 
At 11/8/05 8:00 am, Blogger 學子 said...

可能有人會話,各種 default 喜好都是個人取向,各有各的玩法,為甚麼硬要說人家的不夠 cool 或老套呢?其實,個人的喜好是應該尊重的,買買 Harrods 袋,Burberry 嘢,波衫,送禮自用都是開心事,絕無不妥。然而,學子想指出的是那種「凝固的品味」或「凝固的審美標準」。

品味和審美標準都凝固了,default 了,一切都會變得乏味。帶着一些「任務」似的的旅遊,不就像返工嗎?「喂,有冇去過白金漢宮睇閱兵呀?冇?咁有冇去阿仙奴主場先?都冇?唔係嘛?一定要去㗎喎!」那「一定要去㗎喎」成了行程表的大綱,成了一種壓力。

真的十分不解為何 Harrods 膠袋咁受萬千女士們歡迎?!係欣賞其高質素,還是其悠久的歷史背景呢?抑或,人有我有,唔買就蝕底呢?default 了非乜乜名牌不要,未聽過就唔買,買咗又驚冇人知係來路貨 ... ... 等等等等,令學子漸漸明白,為何空間會這樣窄,選擇那麼少那麼單一。眾頑劣客戶的 comment 仿佛有了根據。

 
At 11/8/05 10:42 am, Blogger AbsoluteVodkaCat said...

對於Harrods果d熊仔袋...真係一d興趣都冇~唔知點解..硬係令我諗起d老老套套既pajamas..

 
At 14/8/05 4:51 am, Blogger 林檎妹子 said...

陶傑先生曾說過,香港人的旅遊特色是「一天遊50個景點」!唉......

想在有限的時間內多看看是絕對正常的,只是那些兩天遊一個國家的旅行團實不敢恭維矣......

如果告訴人家十多天都只在巴黎渡過,他們一定會杏眼圓睜地望著你,驚訝於你的「浪費時間」。妹子曾試過一個二十天左右的尼斯+巴黎遊學團,差不多每天看一個美術館也嫌吃不消,實難想像兩天遊一個國家的旅行團會是什麼模樣......

(p.s.)不提也不知道Harrods膠袋如斯有名,妹子實在才疏學淺也。

 
At 15/8/05 7:36 am, Blogger 學子 said...

這都是「香港核心價值」吧!不求甚解,以量取勝,𢴇輸行頭慘過敗家 ... ... 可是這又好難怪任何人,雖則話人有選擇,但歸根究底都是社會、環境及歷史造成的。試問,有頭髮邊個想做癩痢?

 

Post a Comment

<< Home