新正頭！

恭祝大家 快樂！健康！進步！優柔！

{{ : )

風波裏的 Cantonyama (段落篇)

再唔出 post，個 blog 真係會荒廢。

在整整一個月的回港度假中，忙過不了，比返學更忙。親朋戚友之款待、環港美食循禮、四處走走看看，觀察一大番，好似當康港係「旅遊景點」咁去體會、去感受，去咀嚼。留學不到年半，共回港兩次，都係探親為主要目的。頭一次係去年復活節，感受同今次大至上一致，都係見多咗好多以前喺度住睇唔見嘅事、人、同物。吊詭嘅係，好似要離開自己「熟識」嘅地方，先至可以更加了解佢咁。呢樣都算係喺當初作留學決定之前，冇諗過嘅「意外收獲」。所以有時一心諗住去學去追求嘅，到頭來，得到嘅未必真係如定理般嘅「種瓜得瓜」。回港見聞錄日後慢慢講，講番 Cantonyama。

經過一大輪跨年度的唇槍舌劍後，要講的要解釋的要辯護的，都陳述得七七八八。攤咗成個月，都應該作一個段落回應。

再長篇大論就無謂啦 (何況唔曉得寫又長又有組織嘅文)，但有兩點真係不吐不快。

1. 先天缺陷之環境
好耐以前曾經慨嘆地講過：「每一個設計案子嘅背後，都有一個可歌可泣嘅故事。」康港設計人嘅成長，都係被密集而醜陋嘅設計品所包圍住 (但多數都算幾實用)，當略為學懂丁點兒美學及現代設計知識後，大家都不難察覺身邊嘅設計係大有問題的。狠狠地批鬥一大番，成了自然嘅條件反射。大家都好一致，同一口脛。但當親身從事過設計行業後，「真相」漸漸出現 ... ... 。半推半就地做了視覺汚染幫兇，泡製出一啲自己都覺羞家嘅嘢出嚟，經驗讓我們都明白到，... ... 有太多太多客觀因素，令設計者無奈地做出「富先天缺陷嘅作品」來。今次 Cantonyama 富現代感嘅 identity, 吉鋪上具水平嘅裝潢，與及有心有力嘅小小 exhibition，都在很有限嘅條件底下作咗唔少掙扎。好唔好？適唔適合？當然未能盡如人意，但學子確實見到各參與者嘅熱誠同能耐。

當見到日漸增多嘅設計學生同青年入行，「設計學院」一間一間咁成立，文化發展依然講錢先，消費主義繼續主導全民嘅意識 ... ... 有時，設計品背後個故事，可能先係我們應該去探討嘅問題。

2. 我們的亢奮對話
學子極愛跟切雞友傾計，不論學生好，大師級好，都好享受。因為人肉溝通，真係遠勝過任何媒體。不只切雞友，其實任何一個人，都可以俾到自己一啲 insight。可是，唔知點解，華人地區相比於西方社會，人與人之間嘅信任同情感，都好似比較疏離。簡單直接啲講 —— 唔識嘅，就當係仇人！細細個喺波地跟隊如是；返學眼超超隔離班條串標如是；返新工防啲老臣子同事如是；搭車唔想有陌生人坐响自己隔離如是 ... ... 一切一切，關鍵在於一個「識」字！識咗，就算同一個人，都即時 friend 晒！

切雞人，仲多一樣怪嘢，就係 —— 「自我設計保護亢奮症」！呢樣嘢學子頗熟，因為本身係患者 (嚴重嗰隻)。唔知係出身低微定學術成績及個人成就長期處於低位，被抑壓被貶低，因而導致在有關設計上嘅嘢，特別唔可以「失利」(或作失威)！尤其喺遇到唔經大腦及無理 comment，或稍被質疑時，病發得越係犀利！由小我到大我，由大我到巨我，需時少於一瞬間。設計，成為了自己嘅事業外，更成為自我嘅唯一衡量標準。

正因以上兩點，學子在網上參與過唔少大小「亢奮對話」。對口對面，仲話會就住就住，客客氣氣，理性啲啲；網上虛擬身份，我理你！

曾經跟網友談及此現象，學子問道：「吖，你估網上討論可唔可以有理性對話呢？」友人答：「我就未見過嘞。」

忙碌中 ... ...

康港五光十色多采多姿嘅生活，真係會令人忙到做乜都冇時間。

近一整月嘅遊歷，可以起 blog 嘅題材，實在多如天上繁星，嚟緊真係唔怕冇嘢講。就 Cantonyama 事件嘅回應，令學子反覆思量良久，因為所引伸出嚟嘅點子，需要慢慢諗吓點寫好，敬請有興趣之朋友們多待一會。

唉，睇怕都要等到嚟緊週日回英，先至有心力再寫 blog 了。

{{ : )