31.8.05

諾丁山嘉年華





萬人空巷,迫餐懵;強勁音響,花呢碌 —— 諾丁山嘉年華 2005

29.8.05

口水創意

[ 悲歌起 ~~~ ]


[ 悲歌漸小 ~~~ ]

做設計,做人,正常嚟講都冇人想重覆別人所做的。乜嘢「新馬勒當拿」、「新李小龍」、「新周星馳」,冇乜邊個真係掂 (新馬師曾就例外)。冇咗自我,就算賺得全世界,都十分「枉為人」!

[ 悲歌繼續 ~~~ ]


朋友法蘭西施話齋:陳冠希真可憐,成鬼日成為剽竊抄襲設計的受害者,無啦啦又俾人嘲笑餐懵。

大哥璋的《好相似本地設計》近年所揭露的本地剽竊抄襲文化,膾炙人口。但日子久了,今日即使有人再話「阿邊個抄邊個」,已經不是甚麼光怪陸離的奇聞,大家好像都麻木了,習慣了。涉案人士和公司都繼續知名,財源滾滾,在創意行頭裏繼續「大展拳腳」。今次,Sean John vs 康港 Levi's 陳冠希 (見圖),第一眼,都打個突,「點解一樣嘅?呢啲唔只抄咁簡單喎?」,但望多兩眼,心情都異常快速地平伏下來,只係戥 Levi's 不值。斷不可能是拍搏頭 job 吧,咁俾人呃法,真冇面。畢竟,活在創意貧脊的「亞洲國際都會」幾十年,真係見怪不怪,話學子麻木不仁,都係咁話!

呢種「來路創意加工」,其實都唔係乜嘢「新興工業」。記得森虛、痰校長、張惡榮、梅菜芳年代,「改編歌」是家常便飯,甚至由無名歌手唱嘅「口水歌」都有其市場。將歐西東瀛紅極一時的金曲,譜上廣東歌詞,便能大賣,成為「十大勁歌」!經濟又得以熾熱發展,簡直係典型香港仔醒目食腦生財良方!雖然,當時本地創作都唔弱,Band sound 及其他歌者如盧氣廷等原創歌都質素甚高,但講「經濟效益」,點夠「改編歌」咁慳水慳力呢?就算今時今日,有啲所謂「本地原創歌」,有時都有熟口熟面感覺,口水味十足!正面啲睇,可能是某某作曲時被某某 inspire,或想向某某致敬吧!時代進步了,日光之下無新事,都冇話誰抄誰吧!

其實,將 creative 嗰 part 留給老外做,我們繼續一代一代世襲地當地球村裏的世界工廠角色,食住老本發展經濟,不是很好嗎?人家有甚麼,可抄的抄,可 franchise 的 franchise。起「腥光大路」、「敵視嚟」之餘,應該重新考慮之前話在海運大廈上蓋起的「Hong Kong Eye 摩天輪」,一於打造一個具世界水平的「世界之窗」。

「咁而家吹到大一大嘅各種創意全方位設計課程點算?食回老本,啲 course 咪冇用?」不用怕,計學子話,如果一嘢 cut 晒啲 design courses,會令到好多師表失業,咁樣唔係辦法。正如一刀切禁煙會令飲食業大受打擊一樣 (點解?問張宇人,唔好問學子)。嗰啲「設計課程」應該照辦,橫掂都唔係真係可以培育出設計精英,最緊要人人有書讀,暫緩雙失惡化,令莘莘學子享受校園生活,開開心心學設計!完成課程後,出來社會,自然有一股社會氣氛調較他們那不切實際和過份理想化的思想。香港人嘛,適應力好強嘅。

剽竊抄襲又唔駛坐監,又唔會名譽掃地。抄得好抄得偏門,分分鐘仲有獎攞,攞到獎,就會有名,有名就有客,有客就有銀!立品?等發咗財先啦!做事始終有先後次序,萬萬不可一步登天,本末倒置!

27.8.05

Electricity

剛剛看完一齣由至愛電影改編而成的 musical ——《Billy Elliot》。把它與經典如《Les Misérables》相比,可能冇咁精彩。不過,《B》所帶出的訊息和主題曲《Electricity》,實在令學子感動了。

Electricity
Music by Elton John
Lyrics by Lee Hall

I can't really explain it, I haven't got the words
It's a feeling that you can't control
I suppose it's like forgetting, losing who you are
And at the same time something makes you whole

It's like that there's a music, playing in your ear
And I'm listening, and I'm listening, and then I disappear

And then I feel a change, like a fire deep inside
Something bursting me wide open, impossible to hide
And suddenly I'm flying, flying like a bird
Like electricity, electricity
Sparks inside of me, and I'm free, I'm free

It's a bit like being angry; it's a bit like being scared
Confused and all mixed up and mad as hell
It's like when you've been crying
And you're empty and you're full
I don't know what it is, it's hard to tell

It's like that there's some music, playing in your ear
But the music is impossible, impossible to hear

But then I feel it move me, like a burning deep inside
Something bursting me wide open, impossible to hide
And suddenly I'm flying, flying like a bird
Like electricity, electricity
Sparks inside of me, and I'm free, I'm free

Electricity sparks inside of me
And I'm free, I'm free! Oh, I'm free

(第一首在 iTunes Music Store 上買的歌)

25.8.05

正常怪癖

「怪癖 blogger」點中,要講吓自己嘅怪癖。見圍威喂,個主題又生鬼,就玩吓啦!(一直對網上連鎖活動都頗抗拒,特別係帶有迷信色彩嗰啲「如果唔傳出去,會有甚麼惡運」,我呸!)

諗咗好耐,都覺得自己好正常,冇乜特別異於常人嘅怪癖。「正常」一直係我們追求嘅「理想」,一般嚟講,無乜人鍾意自己被視為「唔正常」或「freak」。無論智商、身高、體重、外型、薪酬、福利、社交、處事、觀點、甚至人生,我們都好像與生俱來地想得到認同,「醫生,咁我係咪算正常呀?」。話人係 freak,好過自己係 freak。因為我們都好清楚 —— 我們都以排擠異類為樂!熟口熟面、正正常常的總有一份不知名的安全感親切感;騎騎呢呢、生面口的總覺得唔多自在。

不過,「正常過龍」又會被視為「唔正常」或「冇嚟特別」、「薯嘜」。內心深處,我們都想自己與別不同,鄙視啲友仔思想太正路、太守舊,「正常還正常吖!駛唔駛正常到咁呀?」咁究竟「正常」同「唔正常」又點去界定呢?活在後現代,連「對與錯」都難分,何況「正常」呢?

以下行為,可能普通過傳統習俗,不過,學子身邊就比較少人係咁做同咁諗。

[1] Desktop 上所有嘢都會盡量與其他嘢 align 好好 (如 windows、palettes、icons、menubar、dock、iTune、Adium 等),先至安樂。
[2] 食任何嘢都一滴不漏 (當然要唔太難食啦!)。會好似用 Photoshop「執塵」咁,將每一粒飯都執清為止。
[3] 出街時,對眼會病態地留意有關 design 嘅嘢。遇到好嘢時會暗自歡喜;否則,痛駡一輪後,會諗吓:「如果咁咁咁改,就好啦!」(未期職業病)。
[4] 睇花呢碌無 grid 兼求其嘅雜誌 layout 會頭暈。好記得呢種病係由 N 年前睇一本叫「學 Mac」的電腦雜誌開始。
[5] 拒絕將「劇毒拾蚊紙」放進銀包,以免造成污染。多數會盡快洗咗佢,促進一下經濟。

其實,成鬼日寫埋啲咁嘅 blog,喺好多「正常人」眼中,已經夠晒「怪」!

... ... ...

諗吓諗吓,都係傳落去!咁就地獄貴公子archetypistablogaday
runabouts孺子牛啦!悉隨尊便!

23.8.05

Mr Wu

在倫敦 Leicester Square 近唐人街一帶,有幾間連鎖食肆,名叫「 Mr Wu」。售賣的是「唐餐」,多以自助餐形式經營,約五六英鎊便有交易,任食唔嬲,相對倫敦的大都會物價,已是十分 reasonable。客似雲來,分店開完一間又一間,但學子一次都未幫襯過。點解?口碑是其一,無朋友推介不特止,仲千叮萬囑叫學子咪以身試菜。學生生涯的五六英鎊不是少數目。其二,在外地光顧中菜館想一嘗家鄉風味,「洋人指標」相信是很多人採用的打量食肆水平方法。華洋雜處的中菜館,難食極有個譜 (如果多港人出沒,就多數有水準。港人品味係低俗,但味蕾的進化卻不容輕看!);但是,如果清一色是洋人食客,這意味着「有啲嘢」了。

「咕嚕 buffet」是一種一般華人較難接受的三不像中菜。成份:咕嚕汁一大兜、炸魚、炸雞、炸牛、炸豬各一兜,加上例牌炒雜菜、炒飯、炒麵各一盤,放在幾層的圓形桌子上,即可!這都是從廚窗外觀察得來的,因為那幾層滿載咕嚕美食的圓形桌子,是 Mr Wu 的招徠殺着。

〔鏡頭一轉〕

近日,newsgroup 有一輪激辯,辯題是有關「做設計需唔需要做得『太』professional 的問題」。事源有一位仁兄分享自己為朋友免費做的婚宴片頭 (10Mb wmv file, 5:30min),想網友指教一下。不久,有人指出其影片設計十分恰當,並認為如此「amateur 風格」是最好不過的手法,如果做得太「pro」,反而會令觀眾的注意力集中到那些專業技巧上。先不討論條片有幾「港式」,「專業水平」與「門外漢水平」之爭,才是值得探討的問題。

有網友反駁:「我做咁耐 (十年) 設計,從來冇諗過會 pro 得濟,只恨自己唔夠 pro!」學子以為這觀點應該算是正常,應該做得設計呢行都會咁諗啦,人望高處嘛。點知,竟然有人理直氣壯地說道:

太hardsell, 如果 pro 得濟唔似喺呢啲場合用。係一堆 friend 嘅節目, 係做到咁先最好 feel!

幾好吖 ~~~ 幫 friend 結婚做嘅,有誠意就夠了。已經可以令人好開心好有感覺,有回憶有過程,好正呀!反而我覺得呢啲片做得 pro 得濟會好 X (粗口,音近「漆」),好似賣廣告咁,嘔 ~~~

唔好認為 pro 係最好,响唔同場合唔同身份要有唔同嘅 feeling!

如果你做得 pro, 啲人會比 pro 嘅效果 attract,一對新人嘅經歷就會變咗配角 ... ... 啲嘉賓/訪客會諗「啲 effect 好正喎!個 design 好 pro 喎!」但係宜家啲人就會諗「個 video 唔 pro ... ... 但係佢兩個又好襯喎 ~~~」

設計不嬲都係為 client 解決問題。如果只係為了自己喜好去做, 果啲叫 art。

如果這是個別井底蛙的狂妄,學子唔會花時間去批鬥一番,有感原來這名自稱「設計學生」的兒童,其「丁蠏邏輯」和「港式視野」,在互聯網或日常生活上,是屢見不鮮的!真係唔知如此水平嘅所謂「設計學生」香港仲有幾多!人們常以醫生律師來比較設計行業的專業問題,試問醫學系法律系有「盲流」修讀生嗎?可是,港式設計課程就有教無類地收容了不少「盲流」!不但如此,「盲流」無論有否接受過培訓,都可以「掛牌」執業呢!(哼!問你仲敢唔敢入行?)

一輪蛇春咁長的雄辯後,該兒童終在群眾圍插下認了低威。最後,起題嗰位仁兄語重心長地打完場剖白:

先謝謝各方意見
估唔到有咁大反應,小弟冇讀過設計,話我呃飯食都無話可說。但呃還呃,被我呃的對象全部都係非弁利機構,佢哋都因預算有限,無足夠金錢搵啲專業人士/專業設計師去設計海報/製作短片。個人認為,只要能滿足人客,能把人客想要的東西,透過相關的媒體去表達出來,
這就是設計,最緊要係客人滿意,能用有限的金錢去完成想要的東西,而我亦做的開心。當然你可話我做 Cheap 哂,但我諗大家客路不同,好似呢個網頁,收佢四千包兩年更新,呢段片 (wmv file),因為間機構當時預算有限,只係收七佰, 咁你又肯唔肯做?最重要係,自己能解決生活所需,客人滿意,會繼續找我幫手 ... ... 謝謝

設計世界之大, 難道要被牽着鼻子以本地客戶之狹窄眼光和要求去限死嗎?我們的獨立思維真係俾港式教育閹乾閹淨?難道客戶要求一碗屎,當廚子的就甘於當名「屎廚子」嗎?具國際視野的,有心成為大廚的會唔會講得出「最緊要係客人滿意」呢啲說話呢?

〔鏡頭再轉〕

倫敦。

Mr Wu 生意興隆,客人都十分滿意「咕嚕 buffet」,都直豎姆指說:「很姣黐」。

20.8.05

設計相學 III

就 IVE 個招生 site 為例,香港政府資助的「專業設計教育者」夠膽用咁嘅設計去見人,不怕成為「國際大笑話」,不怕在業界面前出洋相,箇中原因真係耐人尋味,莫非佢哋對設計呢家嘢真係咁無知?唉 ... ... 而家花時間探求落去都冇乜謂。學子想講嘅 point 係,如果一間開辦設計課程的機構,吹虛自己有乜乜器材、電腦有幾先進、G6 Macintosh、校舍點檥點樣寬敞、師資幾咁優良、個別畢業生幾咁巴閉,卻!連自己官方嘢都攪成咁 (照道理有咁強後盾,應該好掂至係嘛!),咁!就要小心了!企業形象係整體成套打量的,如果設計上出現考慮不周、求求其其、錯漏百出、不統一、短視等問題,除了負責設計的人外,班 decision-makers 是責無旁貸的!試問一個不相信專業意見的領袖,又點做大事呢?

無論培訓定教育,對下一代對社會都有着很深遠的影響。上一代經常話一代不如一代,請問,冇上一代的「悉心」栽培,下一代又點會咁「出色」呢?賺啖飯食,係理所當然的傳統人生目標,但煩請飯後,不妨攞番少少良知出嚟,檢討一下吧!

攪設計而設計差,當然抵打!但不斷假大空地鼓吹大攪「創意工業」而又好似不知創意、設計、文化藝術為何物的,就更加打完再打!講緊邊個?仲駛問?梗係「特衰政府」啦!

先去去片,睇下我哋啲偉大領導人對設計的認知去到乜層次先。


最懂得建設中華的前特首官方 collage。學子在佢剛剛下台嗰日,趁佢哋未 update 得切,從政府個官網扯落嚟的。之後過咗足足幾日先至有所更新,貫徹了慢四拍作風!金漆召牌跟金紫荊同灣仔天樂大金龍同出一徹,加上 cubism 中銀景波波,有形得來氣勢十足。最奇怪嘅係,偉大特首幅玉照竟然係張「透明 GIF」!原因詭異,可見官網的製作專業程度同董氏的獨到個人宣傳造詣!


爭都唔駛爭就蔭下掌權嘅現任特首官方 image。政府鍾愛的粉色系列,粉綠加深藍,和諧又勵治感覺出晒!探望小童青年婆婆波波相 dynamic 地浮現在曾氏左右,昔日寂寞的推銷員不再孤寂地笑騎騎。加上大大小小 bilingual 管治中心思想,極致 typo 處理,應該投稿 D&AD。唔駛講!西九「一定得」!

如果從 graphic design 角度觀察 (其實用邊範都一樣原理),簡單睇幾樣嘢可以略知,一個企業或個人形象有冇認真地去設計過。一、Typography,字形學。因為它是「看得見的語言」,是最基本的,一切文字處理都涉及它。對 typo 無知,仿如一名漏口的演說家。從文字撰寫、挑選字款到顔色及擺位安排,通通都有蹟可尋。二、Grid System,架構系統。處理具規模的資料,冇佢唔得。如果沒有一個井井有條的系統去 manage 好啲 data,清晰地陳述給訊息接收對象,咁就等於起樓唔打樁唔搭棚一檥。不過它多不受人們歡迎,因為無知令他們覺得 Grid System 限制了創作自由度。三、Consistency,統一性。貨車司機可以將「萬寶路」、「風雲」、「頭文字」貼紙貼滿佢自己架五十鈴貨車上;嬌妻可以把自己間屋變成 Hello Kitty 主題公園。可是,作為大機構阿頭,就萬萬不可以將所有個人喜好通通加諸於自己的機構形象之上!因為有樣嘢叫 Consistency!道理有如軍隊的服裝,無論總司令幾位高權重都好,唔可以無里頭著低胸露背;軍裝,係需要統一性的。它代表着一種劃一的視覺形象,一種團隊精神。(其實不難理解,不過唔知點解,好多「腦細」都唔係好明。) 如果一個企業形象設計上述三點俱冇,或做得差,咁,又要小心了!

又舉舉例。


點解咁多騎呢菌、病毒襲港?學子覺得最好問大陸,因為可能涉及國家機密。但如果參考一下食環署個網頁,都可能有啲線索。唔係睇佢哋啲 post,因為都係啲過濾過嘅行嘢。要留意嘅係個「細菌狀 logo」!大唔大方,好唔好用好難三言兩語解釋晒,學子只知個 logo 十足顯微鏡下嘅病毒!設計得求其到好似自己生出嚟咁!兩條蟲形符號,想唔吸引同類來港都幾難!中間條 banner 的「漁灣街市擦擦購物樂」,用色庸俗,話雖七彩,但視覺上污濁不堪!而且仲原用幾十年前乜乜樂物物樂為活動命名,思想之落伍,反與時並進,真擔心點樣靠佢哋攪食物環境衞生。

要舉例證,十日十夜舉唔完。如果大家仲有興緻,可以睇睇一些設計發達先進文明民主國家的官網,再同一些較落後或極權國家的比一比,可能會有更多啟發!

Google search,國家名 + government
瑞士英國荷蘭德國西班牙美國加拿大澳洲法國瑞典芬蘭挪威日本紐西蘭南非埃及新加坡南韓北韓中國台灣巴西阿根廷泰國菲律賓俄羅斯柬埔寨以色列希臘聯合國 ... ... 原來北韓個 site 咁有性格!

結語。

學子用到三部曲咁長寫「設計相學」,只係想帶出差勁設計背後,那些相關的管理、反智、傳統陋習等問題才是真正值得當心之處,不要辜負爛鬼設計所帶出來的隱藏訊息。不是說好設計等於好企業好領袖。以 Paul Rand 設計的 Enron "Tilted E" 為例,由巨匠設計又如何,管理不善,都一樣難逃短命厄運。

設計相學,只供參考。

完。

18.8.05

設計相學 II

大企業大機構優質的形象設計例子同益處,求其打開一本講 identity 的 design 書都可以搵到好多;但是,探討衰例子同其壞處的,就通常比較偏門同地下,尤其是唱衰康港同胞嗰隻,可能咁做有礙穩定和諧吧!中國人不打中國人,包容比批評來得有厚度。話雖如此,學子覺得一啲細規模嘢,整得衰攪得蠢,尚可勉強原諒和接受,因為涉及的人和物較少,為害冇咁大。不過,大舊嘢、公家嘢、文化教育嘢和設計業內嘢就唔可以由得佢,隻眼開隻眼閉!因為這些項目如果設計得差勁,所引發的連帶問題可會不少,牽連甚廣,影響深遠!視覺聽覺嗅覺污染、浪費公帑、教壞細路、映衰同業等等,通通都是嚴重後果!

近日,朋友 send 了條 link 俾學子,一 click 一看,嚇咗一大跳!驚嚇程度有十!此乃香港專業教育學院 (IVE)「知.專.里程」課程網頁。網頁底有個 credit,講明個 website 由 IVE 教務處編製,好似都幾 proud of 個 site 咁。政府口口聲聲話要攪創意工業,IVE 的設計科近年亦好不遺餘力,甚至畸形地以非學位職業先修式課程挑戰 Poly 的大阿哥地位,野心可嘉。成績如何?學生質素如何?永遠都只有官方提供的甚麼「入學率」、「畢業率」、「就業率」(多數冇提人工多寡) 或「同某某海外大學或公司合作」等門面嘢,十分官僚地「交代」個 course 啲「成果」。除了以戒毒中心方式將「雙失」fit in 到勞工市場外,作為一所本地「設計教育的學府」,自稱係「創意工業根據地」的「知.專.里程」課程在設計學術層面上,究竟想帶出的意義係乜東東呢?抑或根本地冇諗過同「國際接軌」呢?

去片。


唔講反傳統嘅「四年制 higher diploma 課程」同騎呢地將「設計、印務、紡織及製衣」編埋同一科 (水泥水電咪要跟室內設計?)。單單講咁嘅 present 手法,咁嘅設計質素,就真係令人 ... ... 唉 ... ... 都無謂用上一千幾百字去批評,盡在不言中,公道自在人心。為人師表,未必需要係天下無敵,但最起碼都要知道何謂好何謂差吧。求學者,有啲似羊牯,懵吓懵吓,很難要求佢哋好 smart 地以「設計相學」去分辨那間學校是堅是流,辦學者的自律和操守,成了避免有子弟被誤的關鍵。好老實,唔知 IVE 的畢業生睇到條片有乜感受?會唔會從此唔敢認自己出自 IVE ?身為曾在 TI 接受培訓的學子,都感到羞家!

今時今日,用盡高科技,劃時代媒體,以咁反智嘅方式去招生,去「promote」自己 (反 promote?),當中反映出啲乜呢?為咗爭學生,為咗市場,無可奈何地走 cheap 雞路線迎合大眾?咁 ... 同低胸肉彈們分別何在呢?辦學辦到如此這般,除咗用一個「悲」字,都冇咩好講 ... ...

待續。

17.8.05

設計相學 I

事先聲明,學子不睇相,更不鼓吹睇相,對它亦冇乜認識同興趣。用「相學」一詞作題,只係因為詞彙庫缺貨,同埋想配合內容。

睇相,撇除求神問卜運程命理嗰 part 迷信嘢,其實有啲似統計學。統計自古以來粗眉的多數係乜性格,痘皮的多數又係乜為人,粗眉加痘皮等於乜乜負面價值等等。如果十個粗眉加痘皮中有七八個合乎術士們所講的性格特徵,便會成為一種「believe」,咁樣,其他嗰兩三個都會 somehow 被認定為有「粗眉加痘皮的性格」。這種帶有迷信色彩同屈人的相學,學子不敢苟同。但觀人於微,聽其言觀其行,用觀察去「了解」一件事或人,學子倒覺得有趣和值得研究一下。至少觀察係一種很有用的 research 方法,得來的 data 加以理性分析,可以是很科學,很有啟發性的。

「以貎取人」是不應該的,去打量一件事或人,不應狹窄地只靠外表去作終極判斷,忽略全面多方的了解同分析,是戇居的。但是,也不可完全 ignore 其參考價值;畢竟,身體語言、面部表情、衣著裝扮等都可以給我們一些視覺和臭覺,甚至感覺,的「訊息」(正所謂「魔鬼在細節中」)。善用它,可能比細閱一個人或公司的 CV、portfolio 或 profile 更可靠 (因這一切都是係人都知要做得好好睇睇的)。

正題。

學子想帶出的,不是甚麼新東西或真知灼見,只是有感一些人、公司、機構、學校、或政府的形象及作風,其實可以以設計角度去打量一下其質地或精心形象設計背後的「底蘊」。因為學子相信出色而成功的廣告或企業形象,是真的可以瞞騙眾人的;相反,又雞又流的,可以反映出一些「蛛絲馬跡」。

舉例說明之。八號仔由以前石老先生設計的「紅色 T 字叮噹」logo 起,跟住 modified 去「三間 T 波波」,再由紅變藍成為「線與無線的一橫橫地球」,最後去到今時今日的「打格仔」。除搾旗者變動外,其股價都有如過山車般上上落落,最後乜價位,大家心中有數。學子唔係陸叔,唔曉股票或甚麼投資管理,只談設計。以 logo 論 logo,質素確係以前的幾代比較似樣,可用性夠靈活,有理念有因由,大方得體,經濟實用。明顯地,到了「線與無線的一橫橫地球」和「打格仔」就透露了少少「嘢」!「線與無線的一橫橫地球」因為以多條橫線組成,所以在縮細的情況下,要以一個「比較少橫線的 version」去避免印刷上「盟」的問題。換句話說,即是在一些設計案子製作上,時間成本可能因為設計本身缺陷而提高了。不過,這遠遠不及「打格仔」logo 敗家!logo 本身先天性有嚴重缺陷,approve 佢成為如此大企業商標的仁兄,應該重打五百大板!成個 logo 有多達七種顔色,又有漸變灰色幼線,犯下所有基本商標的大忌!浪費金錢,破壞環境!仲話要「永遠出現在白色 background 上」,太可笑了!以為全世界的設計品都圍住你來轉嗎?

小例一則,或多或少證明了一個領導層對其企業形象的輕視,可能,連帶一代電訊霸業的衰落。

待續。

14.8.05

廸士尼夢魘

如果各位閱畢此文後,覺得學子是將自己看到的無限放大,有違事實;請不要留手地狠批,教化及糾正學子的偏激顛覆思想!學子會欣然地接受及檢討自己的謬誤。

身為港人,點會想康港衰,唱衰康港。但唔知係咪同「越親密越容易察覺身邊人的缺點定理」有關,總覺得康港有好多事物唔多順眼。特別自從「香港一定得」campaign 申辦乜鬼運失敗之後,對一些大型項目的建設,都覺得應該未必得,甚至「九成衰硬」。「中央圖書館」、「西九」、「九七後各政府部門及紀律部隊 identity」、「鈔票 system」等,都「唔係好得」。

忘記了康港廸士尼樂園是何時拍板的,但由嗰陣時起,一直都有幻想將來康港廸士尼會是何模樣。會唔會比美𣾀豐、中銀、新機場咁具國際水平呢?學子只到過東京廸士尼,感覺良好,服務員有禮,地方清潔,遊人秩序井然。雖則本身唔係米老鼠 fan 屎,整體印象卻是十分正面的。坊間一直流傳不少康港廸士尼的新聞,話有甚麼踎廁設施,面積奇細,或一些憂慮,如自由人會大鬧美帝國象徵嘅廸士尼云云 ... ...。一切一切都好像衝着學子多年的「廸士尼夢魘」而來 —— 康港廸士尼會丟盡康港人或中國人的架嗎?

朋友有幸到未正式開幕的廸士尼外圍觀看煙花 rehearsal,還拍下了幾張照片,send 了給學子。看了,「廸士尼夢魘」第一集終於上映!


「娘」係好抽象的形容詞,但相信每一個康港人都知其意思 (國內同胞未必完全 get 到個感覺)。中文 typo 又 bilingual 係蝦人處理,但大名鼎鼎的廸士尼都攪成咁鬼樣,都咪話唔令本地設計人沮喪。個地圖仲得人驚,求其到無可再求其,做 design 嘅終極不要得 attitude!都唔好講美感呢啲咁高尚嘅技巧了!明明個米老鼠頭形 logo 好地地,幾 smart 咁,都可以 apply 到咁鬼「直通車」!個 colour scheme 駛唔駛咁九鐵呀!?

真係好希望朋友報錯料,學子收錯風,「廸士尼係好正嘅!娘?冇啲咁嘅事!」否則,都咪駛約學子去廸士尼了!

鳴謝相片提供者珍妮花

懶洋洋洋人

「懶洋洋」呢個容易詞點解有兩個「洋」字,學子唔知道,但佢確係一個形容洋人的貼切詞語。

由細到大,都聽盡了親朋戚友對洋人「惰性」的壞話。「啲鬼就最鬼懶!做嘢又慢!」「到銀行排隊,三人人龍都可以排你九個字!」
「佢哋郁吓就話 stress,一啲都唔捱得!」「公司五點半就冇晒人啦!」「千祈咪同啲鬼做 group project,佢哋超懶!最後都係你自己做晒。」... ... 等等等等,總之,好似冇華人僱主願意請佢哋做嘢咁。「懶洋洋」的「洋洋」是兩個洋人一齊懶的情景。

問題來了,既然啲洋人咁鬼懶,為何西方社會發展及其學術世界在人類歷史上又有着咁深遠嘅影響呢?論工作時間,我哋絕對領先!論唔放假都開工,我哋又絕對稱王!論唔理仔女家人去搵錢養家,我哋簡直係先驅!佢哋懶到咁都可以領晒風騷,咁我哋中華民族勤力咗五千幾年,咪應該一早已經稱霸全宇宙?!

腦袋構造一樣,「mentality」卻不同。早前,朋友想嘗嘗著名的英式 fish & chips,睇吓有乜咁「特別」。於是乎去了學校附近一間薄有名氣的小餐廳試試。點知去到,驚覺它沒有營業,告示上話:「八月一日至三十一日放假。」嘩!簡直駭人聽聞!條件反射即時發問:「佢哋唔駛食飯咩?納空租都肯制?就算自己鋪都少賺成個月錢啦!駛唔駛懶成咁呀?」一大堆理性到不得了的有力論點,排山倒海地湧出!冇開,唯有去第二間。行了十五分鐘,去到另一間同樣有啲朵嘅 fish & chips 專門店。嘩!嘩!嘩!世界未日呀!「Staff Holidays,八月八日至三十日休業。」仲神怪!為咗啲 staff 放成個月假?開善堂乎?... ... 嗰日,我們都懷疑是英國的「休漁期」。

慢開,可以選擇有時快;快開,可以選擇慢嗎?勤力,冇人會覺係貶意詞;懶惰,冇人想當作座右銘。假日,冇人願返工;深夜,最好有 ping shop (shopping) 有店鋪營業。

我們喜愛的生活模式,造成我們厭惡的生活模樣。

懷念,市面一片寂靜的大年初一!

10.8.05

自由星光派對

朋友遊倫敦,學子充當導遊,在海外都盡力實踐華弟提倡的好客之道,娛人娛己,不亦樂乎。(好似「我都做得到」咁體會到做導遊的「樂趣」)

應到值得到的景點都盡量到一到,例如:Big Ben,British Museum,Greenwich,St. Paul,China Town ... ... 等等。拍拍背景加人頭照片,買買精品,逛逛走走,談談天,聚聚舊,倒也不錯。但短短幾日,其實難以作較深度的旅遊,一些具地道文化特色的地方,往往被剔出行程表外。不過如果話花十多天齋遊倫敦,便要做足心理準備,回答在港朋友的質疑:「你唔去埋巴黎咩?咁浪費!」「最少都去下劍橋牛津啦!」「十幾日都踎喺倫敦?好悶㗎喎!」... ... 學子三年前就活生生地解釋過不下十多次了。

當然,都好明白難得遠道而來,想多到一些「著名」景點的心態,傳統上,這是十分「理所當然」的。但是,如果可以拋開世俗的眼光,不帶半個 Harrods 熊仔膠袋回港,試拍一些未必張張有自己個樣的隨意照片記錄一下途中的點滴,發掘一下一些非熱門的地方,或鮮為人知的店鋪,將自己由 tourist 變做 traveller,不是更有樂趣,更有型有款嗎? 到此一遊的觀光,太老餅了吧!

學子不是完全否定觀光這回事,只是想講講傳統以外,實在有更大更廣的世界有待「旅行者」去發掘,不單單指旅遊,其他領域亦然。

昨日到了 Madame Tussauds,觀光得像一名「自由人」,好鬼開心!(想起十個「流」的香港老翻星光大道同小小蠟像館,唉 ~~~!)

估吓佢地邊個打邊個啦!



8.8.05

未變種公德基因

回應朋友之《公德無量》

「亂拋垃圾 人見人憎」呢雙眼可以話係學子懂性以來首度接觸到最 powerful 的 designed visual identity!今日睇番其 impact 同間字的處理,不得不承認,香港中文 typo 咁多年來,冇乜大進步,甚至平均水平不及「手稿年代」。原因的確值得深究,否則在可見將來,難有突破,前景暗淡。(因 typography 是「可見的語言」,在設計上,它是極其重要而又係基本嘅課題,所以連基本嘢都攪唔掂,仲講乜鬼其他深奧嘢呢?) 不知這經典 campaign 出自何許人呢?只記得對眼是鬼婆眼,其他的一概不清楚。

差勁港人公德令變種港人感到羞家,是事實。但論程度,遠遠不及國內同胞!如果學子係國內變了種的新新同胞,更覺羞羞羞家!唉,不過,九七後,在外國人眼裡,香港同中國大陸根本就冇分別!(咁事實上又的確係一家親嘅~~~) 所以作為華人,真係要爭氣,咪喺公共場合做出啲野人行為,要令「理性的歧視者」跌眼鏡。不過,如果表現太有文化兼文明,又容易被人誤以為是東洋人,... ... 真複雜!

「公德無量」行為仲有好幾項是令學子非常氣頂的。
01。在非吸煙地方抽煙!包括上公車後將含在口中的煙釋放在車箱內!將點着的香煙帶入電梯內,扮冇影響!
02。不掩口地狂打噴嚏/咳,令空氣中出現一陣陣口水味!(咦~~~!)
03。乘扶手電梯企硬左邊!或二人一左一右地堵塞上落通道!
04。成班人企喺繁忙的路中間!包括眾「直銷路霸」!
05。巨大聲地放喉分享私人談話及污言穢語!
06。用腳頂住前座觀眾或乘客!
07。亂發 junk-mail/forward email!
08。雨天行騎樓底唔閂遮!
09。慢車死霸住條快線!
10。㩒錢似打機!

唉,都係嗰句,生活在高方便高密度的都市,是需要付出代價的。更何況生活在一群有待變種的「舊舊香港人」當中呢?

6.8.05

網上徵友

大約1997年秋,學曉上網。那時,互聯網已興咗一大輪,out out 地兼頗 low-tech 的學子隨着有幾年上網經驗的哥哥和表弟,初次接觸這新奇的媒體。初時只 send send 工作上的 email,完全未上「網癮」,加上極不 friendly 的 Macintosh 網上表現,上不上網,完全自己話事!而家就 ... ... 。當時社會上都有流傳甚麼「上網誤交損友,少女慘遭被姦」等貼近民生的秘聞,「上網」,在一些人心目中,仿佛是唔正經年青人的玩意,父母會擔心阿女玩 ICQ 玩到離家出走(雖然相信而家仲有),大眾還未廣泛地適應及了解這劃時代的新媒體。

時至今日,學子已過了呃人同俾人呃的階段,互聯網世界已今非昔比,科網泡沬都爆咗好幾年。回頭一看,由 internet 的石器時代到今日 10Mb 都嫌慢的「冇網上會死時代」,真係飛都冇咁快!網上活動要幾精彩有幾精彩,可能性之莫測有如女人心,可怕可怕!它已如電視般溶入了我們的生活當中,唔係!應該比電視還 time-consuming 出好幾倍,特別在電視越來越唔好睇的地方,人們都「煲網」去了。近一個月搬了兩次屋(想死!),學子發覺,無論朋友或自己,拿了鎖匙,一入門口,第一樣 set up 的東西,就是 internet,最好仲係 wireless 嗰隻。第二先至係當晚要睡的床。上網,對現代「網精」來說,比瞓覺還要緊。(雖然學子同時都係渴睡症病例)

日前,一位四年前在網上認識的朋友,雷朋,來 email,原因是遺失了所有友人的聯絡,想從新收集。令學子想起一段與他認識的「網上徵友」奇緣。話說,學子當時在一家科網到無可再科網的科網公司打工,經熱血同事的薰陶下,膽粗粗地用了半年時間製作咗一個小 personal website,並租了個 .com 網址,upload 埋上網,充其網上設計群體的一份子,火熱非常。拜科網公司的科網管理層所賜,學子與同事們得到難以至信的悠閒和時間去做「網上 web design analysis」,配合飛快的網絡,飽覽群 site,快活無比!

日子久了,我們發掘了不少設計新穎、美倫美奐的 designer personal website,其中發現有些 designer 的網站中 portfolio 一欄,竟然有屬於本港客戶的案子,在當時外國網上設計力量大熱的氣候,這確是「新大陸」!於是學子便又膽粗粗 send 了個 email 俾雷朋,踏出了「網上徵友」的第一步。動機無他,只是出於一份「識英雄重英雄」的豪情,因為嗰時本地設計人有心做 personal website 的還少。

之後,來回幾板 email 後,知道原來彈丸之地的另一邊,同道不只咱們幾丁,見面的時機比網上騙案的來得還要快。

在食通天的一聚,記憶猶新。「原來你就係乜水!」不停地在空氣中出現。雷朋法蘭西施秋官約翰斌主義小工廠易拎莊奴芬、天使、陸站 ... ... 等等,都是同期認識的。雖然往後日子不是經常見面,甚至異地相隔;但嗰種志同道合的親切感,對設計的鍾情,實在可貴。(竟然,在同學和同事之中,卻不常遇到。)

網上不愧是交友好地方! {{ : )

3.8.05

簷篷水

朋友常問,倫敦嘅天氣係咪好可怕,日日落雨,煙霧彌漫,好似 Monet啲畫 咁矇查查。以學子近十個月的觀察,由日短的嚴冬到晚上九點九至天黑的夏季,其實,續用「霧都」來形容倫敦,睇怕已經out了。天氣差時,雨是時有的,天黑黑也十常五六,陰陰濕濕咁,十足啲政客。但雨總不大,絕少傾盤,霧更加罕見,可能香港的污染煙霞仲嚴重同可惡!如果放晴,濕度低,天氣是非常秋高氣爽和風光明媚的,永冇行兩步就黏立立「粟夾臭」,picnic、行街或灘喺草地上,皆一流享受。

雖然雨天都不太受歡迎,連落幾日就更愁。然而,在雨天最令學子驚的不是雨點,而是「簷篷水」!它比較少在倫敦出沒,因為建築物矮且十分維多利亞,僭建物少,冇乜簷篷,所以問題不足恨惡。可是,在高樓林立的石屎森林,則令作別論。雨水川流不息地經過奇形怪狀層層疊疊的千年簷篷後,所乘載來自五湖四海的「營養」,萬一像鳥糞般降落在秀髮上,嗰種感覺,真係 ... 好比死!諗都唔敢諗嗰滴「簷篷水」剛才的激流旅程所經過的一切,免得嘔心,培養出潔癖來。

生活在高便利的大都市,代價,有時是頗沉重的。

呢兩日忙於搬屋,疲累不堪。幸好新居所空間甚寛,舊得來幾有風味。(學生生涯都係咪咁厭尖好。)