24.12.05

風波裏的 Cantonyama

成五十個 reply,攪到唔另闢專題好似唔夠喉咁。

嗱,不如咁,既然主力攪手都喺晒到 (最好叫埋阿 Jo 嚟埋,哈!),不如請佢哋講講個原本構思究竟係乜東東,而家吓件事出咗街,又有乜嘢係同原意有出入嘅呢?!釋釋法,好過繼續誤會落去。因為學子覺得呢個 case 其實係一個幾好嘅 case study,大家可以用嚟探討一下我哋嘅設計文化究竟係乜嘢一回事。不論行內外,理性討論可以在網上存在嗎?!不如就搵小弟個乞兒 blog 來試試吧。

Straight to the point,理性啲,慢慢講 (我哋唔係 sell 緊政改嘛!)。

問題:個 design brief 究竟本來係點?而從 idea 的衍生到決定用 Helvetica,又係為咗乜?!個 CI 同攪手有份嘅 shop 有冇關連呢?展覽同個場嘅 promotion,關係如何?... ...

「Bauhaus」喺康港賣衫賣咗幾廿年,佢哋嘅風格仲遠離 original 吧,咁同今次「Cantonyama 風波」又有冇相似嘅地方呢?

請大家繼續!謝!

20.12.05

愛回家

幾日前乘搭有少少懷舊 feel 嘅德航 (包括機內設備同啲空姐),經法蘭克福抵家,好疲乏,但開心。

【五星級的家】
「摩天凱旋門」「脾華脷豪園」「宇宙星輝大大帝歐陸巴屎閉華庭」... ... ,屋企之所以係屋企,唔駛一味靠「豪」。幾個親人,一些不太 design 的裝潢,真正無添加的餸菜;即使空間不大,那種感覺,已經是天下難尋,獨一無二的。八個多月沒有回家,一切都感覺良好。(不過,馬不停蹄的大小聚會實在消耗精力。) 逛街,重嘗懷念已久的香江美食,相信係唔少海外港人回港的頭號節目,即使係一向懶另類的學子,也不例外。

【Cantonyama】
Cantonyama 位於廣東道八十號,新商場,相信唔少人都去過。日前行街,行經尖咀,記起朋友早前提及過它,於是走去貢下。好老實,行街麻麻地係我杯茶,特別係賣女人嘢嗰啲場,一入去就會眼瞓;去 Cantonyama,完全係為咗「design」。雖然聽落係有啲變態,但確是千真萬確!因為個商場 identity 係朋友約翰的手筆,知道做得不錯,所以想親身去瞄瞄。個 identity 主要用英文字體 Helvetica 為中心,用 typography 及一些文字學的資料背景來作為主調,將之成為視覺佈置的元素。如此富教育意義的商場形象設計,在康港,的確不屬常見,尤其是在分租式的商場 (仔),更加難得。但是,逛完了整幢三層高的小商場後,感覺不是味兒。商場的形象設計本身很美、很特別、具個性、很 design、兼甚破格,十分「唔康港」;三樓的小小海報展覽,亦十分 artsy,會場確實營造出「潮」和「designy」的氣氛。可惜,這一切都同場內其他的物件有格格不入的感覺。

初到一樓時,真係以為去了「聯合」或「旺角中心」!好在冇人開塔羅檔或戰棋局,否則,仲會有屋村 feel!幸好二三樓商戶爭氣,先至令學子覺得不枉此行。嗰條幻彩樓梯同啲 interior design,真係一把二把咁刮落啲 Helvetica 度!兩種 style 之衝突,湊成了一幅悲壯的圖畫。慨嘆嘅係,好少見到商場 identity graphic 係好過幢嘢嘅裝修的,有誠意,有心機,唔馬虎,其實對設計愛好者而言,已經好安慰。可是,眼見它如此被糟蹋了,難免心痛。

一套有質素有 heart 的 identity,一眾來自世界各地的本地設計熱心人嘅 posters,埋沒在喧鬧的鄙俗石屎交易所內,... ... 一堆牛糞上。



【生計大過天】
繼「政改熱」後,「WTO 熱」旋風式襲港,全港市民鬧哄哄,有參與遊行的,也有圍觀作啦啦隊的。耗資兩億港紙,有戰爭場面咁嘅效果,揚威海外,省靚國際都會品牌,比起都要成億嘅「巨星𣾀」,化算得多!學子係九龍人,嗰幾日海都冇過,錯過咗是次盛會,好不可惜。不過,事情倒令學子思想到:自己應該幫邊面?作為設計人,商家佬大品牌,當然係我哋嘅老細,米飯班主,衣食父母,唔得罪得。至於農民啦喎,感情就差啲啦,佢哋邊會幫襯 designer 呢?當設計師,某程度上,真係好鬼幫有錢人搵更加多錢;窮鬼,冇錢客,好難會受我哋歡迎。(有時,自由度大都係咁話啦!) 咁 ... ... 我係咪應該因此就鬧臭班農民,話佢哋「攪事」呢?唉,真係好鬼人生交叉點。

見啲報道一有遊行就訪問啲商鋪,問其生意如何,真係好鬼 proud of 我哋啲「國際大都會視野」!「生計」真係何其重要!正所謂「修身、治家、齊國、平天下」自己作中心,作為出發點,攪掂自己先,真係好實用,好有道理!唔怪之得「修身堂」咁發!

【e-道】
難得返港,梗係拿拿臨走去換身份証啦!呢次真係要真讚政府,整個換証手續超快!好唔董健華!抵讚!(不過可能學子受得太多英國怠慢嘢,所以 feel 到個 contrast)

在大堂等待影相期間,細心欣賞我國特區政府的智慧結精設計,俾我發現咗件正嘢!(唔好怪學子大鄉里,海外華人係 out 啲㗎啦!) 那就是 ... ... e-道 道 道 道 道 道 ... ... !學子雖然 out,但都緊緊知道有套韓劇叫「醫道」,仲好似都頗受歡迎㖭。所以一見「e-道」,就「𠼻」一聲笑咗出嚟。堂堂一個政府重要部門 —— 入境事務處 —— 玩埋啲咁嘅 gag !?有冇小家咗少少呀?!政府成鬼日學人用「i 乜」「e 乜」都算啦 (因為唔只係佢一個人用,周街啲人都有猛跟 Apple)。今次好跟唔跟,跟無線?!?!抄都抄個好啲啦!想同師奶市民打成一片,都唔駛咁啫!

唔知點解,一見到呢個死人名,就好似見到:一個四十來歲嘅中層師奶官員,正在會議室內同班同僚開會度個名 for 一條新嘅「智能過關出入境通道」,而喺大家苦無頭緒之際,該中層宫員,陳李月好女仕 (設計名稱),就話啦:「吖!我諗到!就用『e-道』啦!『e』代表 electronic、智能、科技、easy、易辦事!『道』梗係代表我哋過關條通道啦!『e-道』『e-道』唔係『嗰度』,又似『醫道』嘅諧音,啲市民實記得啦!好!一於咁話!」眾部下齊聲叫好,收工去也。

14.12.05

彩虹亞洲國際城市!



二零零五年十二月九日
香港郵政紀念香港舉辦世界貿易組織第六次部長級會議 (附圖)

香港郵政將於十二月十三日 (星期二) 發行一套兩款郵資已付明信片第15及第16號,以紀念香港於十二月十三至十八日舉辦世界貿易組織第六次部長級會議。

香港郵政署長蔣任宏表示,這兩款郵資已付明信片可作空郵投寄而無須貼上郵票。第15號明信片前頁印有拼湊香港不同景色的大型英文字「WTO」及呈彩虹色調的中文字「香港」。第16號明信片前頁則印上彩虹色調的大型英文字「HK」及中文字「世界貿易組織」。

蔣任宏說:「香港能夠主辦此項國際盛事,實在值得高興及驕傲。香港郵政亦很榮幸可以發行這套獨特明信片,紀念香港這個亞洲的國際城市邁向此重要的里程碑。」

這套明信片由易達華先生設計及政府物流服務署印製,每套售價為港幣10元正。明信片套裝將於十二月十三日公開發售,售完即止。每位購買明信片的市民限購3套。

唉 ... ... 真係唔知點 crit 好 ... ... 。一句到尾話個 design 肉酸、核突、冇品味、砵蘭街、芬蘭浴咩?!(人哋芬蘭嘅設計好鬼好㗎!) 又好容易流於太表面化及出於個人喜好嘅「低水平客戶式評語」。但如果認真地以學術角度去分析件事,又好似唔似寫 blog 嗰種輕輕鬆鬆嘅消閒情懷 (其實係未夠班咁做)。不過,試問作為一個正在攻讀平面設計嘅港人,眼見如斯駭人嘅 visual (背後隱藏住嗰啲理念至得人驚),而且仲以展示寰宇嘅姿態出現,又點可以「嗗」一聲吞咗佢呢?

首先,學子唔覺得彩虹本身係有問題的,七彩係無罪的 (細個嗰陣時,不知幾鍾意七彩蝦條姐姐)。反而那七彩色調令人類想起上帝在大洪水後所立的「彩虹下的約定」,是多麼的詩情畫意,是多麼的慈愛莫測!但是,但是,七彩雖然人見人愛,都唔駛吓吓都重重覆覆咁用嚟代表東方蜘蛛㗎?!?!久唔久有七彩煙花;自中環中心開咗個頭後,乜 Q 大廈都有幻彩燈色 (「幻彩」呢個 term 又係殺食耐用㗎!);老翻好萊塢手板街嗰啲變色九彩地燈仔,驚死啲人唔知佢存在咁,「艷光四射」;銀紙!十足色版咁,色彩之豐富,令人眼花之撩亂,差啲可以用嚟賣彩電廣告;classic 夜景裕華招牌景就更加唔駛講啦!... ... colourful、五顔六色、五光十色、光芒萬丈、夠多色夠搶眼,成了選配顔色的指定 model answer。只接受單一個人化的審美標準,思想之保守,對新事物之恐懼,鍾情 cliché 之病態,成為了七色背後的灰暗無光文化大陋習!

Postcard 當中的字體適合與否,在這裏姑且不談,因為同樣地,錯不在那。黑體字雖然被廣泛應用之,用到爛,但其性格乃屬中性,跟以 WTO 為題的主旋律尚算配合。再講,中文字款有幾多隻吖?!唔駛用少女體咪偷笑囉!至於字體大小,其實都好難 crit,皆因整個設計都唔見得有乜 concept 可言 (嗱,嗰啲玄學式嘅幾千字背後理念「解說」唔計呀吓!) ,所以根本冇乜好講。整個設計,五個字講完 —— 七彩維港景。

總結,查實,呢個設計有一樣好,就係可以循環生生不息地再用又再用,都會有大把客戶喜歡 (特別係我哋個政府)。如果大家發覺啲 creative 嘢、elegant 嘢、witty 破格嘢 sell 極冇人 buy,不妨試試變身為「彩虹化身俠」,包保幾㹴嘅客都會屈服喺你腳下。

再望望個設計,仿佛看到一幕三級姦汚戲似的。(都係放過事主吧。)

4.12.05

良心發現!



花朶陳四萬的康港良心「唔慌開心」久休復出,首次參加大遊行,真係為悶蛋嘅康港政界帶來了一點驚喜。背後有冇其他意思姑且唔理住,只知平日見得太多侮辱人類智商嘅政棍,忽然重見有水平嘅精英,總係令人快慰,舒服。

政治,學子懂的真的皮毛之皮毛,極其量只達到冰室茶客低班吹水水平,深少少的,就會啞晒。但時事倒 keep 住有留意,因為係興趣同習慣,就算有時覺得啲新聞趣味欠奉,然而略知一二總比無知好 (學子的至愛電視節目其實係新聞報道 (不管有冇趙海豬或伍晃榮))。如果又啦埋設計嚟講,始終覺得作為一個設計者,對社會有一定的認識係必需的,因為 design solution 很多時都與其 probelm 的 context 有着不可分割的關係。政治再正確啲講,設計者除建立個人聲威外,係應該負起一定的社會責任的 (當然可能對一些人而言,這是苛求)。留意時事,其實都算一種有益身心嘅「嗜好 research」吧。

今次遊行人數係由警方的六萬幾到主辦單位的廿五萬,真係驚嘆觀點與角度的決定性!數數,原來真係唔係一二三四五六七咁簡單。不過,學子比較相信 visual 的真實性,一張相片,其實已經可以說明遊行者的 size。理得佢五萬十萬二十萬吖,就一啲問題而令到成區示威者晒晒馬,唔通咁仲未算「聲音」?當然啦,生果報嗰啲立場就梗係影張最多人,最 wide angle 嘅巨大人龍相啦,但如果冇咁嘅景,又點影呢?唔通 CG Photoshop make it up 咩?有時想充都唔係咁易嘅。如果充得到,「民痙攣」就影張相 for 佢哋啲 event 啦 (吖,唔知佢哋有冇諗過用 Photoshop 𢴇張相放落「太公報」呢?橫豎「公攣會」咁多人才精英,兩嘢攪咁啦)。

康港民主之父董生教落,見勢色唔對就應該勇於 complain complain complain!唯有主動地表達,question,思考,分析,理解,才會找出問題所在,才有可能改善現況,達至進步 (康港設計學生就是欠缺主動,才慢慢淪為設計勞工)。穩定和諧,大家發財,相信冇人會抗拒,亦冇人會意圖破壞;但除了食飯同痾屎外,有一點點理想,有半點抱負,有丁點識見嘅人都會要求,一個比現況更好些的未來。港人配嗎?(Do we deserve ?)

圖片來自 BBC 及 蘋果日報網頁