Say No to 撈？！

撈
〔粵音〕Lou1
〔解一〕從水中取出東西。如：「撈魚」、「撈蝦」、「打撈」。唐．舒元輿．坊州按獄詩：「山禿逾高採，水窮益深撈。」
〔解二〕獲得、以不正當的手段取得。如：「撈油水」、「他趁機撈了一筆。」

據解釋二的意思，不難令人聯想起「撈偏門」、「撈粉」、「撈女」、「襟撈(金色勞力士)」、「撈過界」、「拗撈」等地道用語。用「撈」字來形容自己的 career，相信一般家長或稍為受過中等教育的都不會太鼓勵或接受；始終，「撈味」呢家嘢，除咗拍戲扮江湖人士，好似都唔係咁馨香。

本港職業訓練局 (VTC)，最近勇敢地 launch 咗個 website， 名為
《LOAD面撈出個未來》，URL 為 http://www.vtc.edu.hk/loadme/。(「load me」？！幸好冇譯作「老味」。) 網頁看來是以一個 online 小 game 來 promote 其幾個主打課程。玩法簡單，首先玩家要選定一個代表某個「專業」的人物造形公仔，然後 upload 自己的頭像圖片，程式便會將頭像圖片套進人物造型公仔的面部，玩家隨即「變身成為夢想好工主角，投身社會最前線！」，在動畫片段中載歌載舞，絕對叫人嚮往兼陶醉。



兩年前，令人眼前一黑的《知 . 專 . 里程 Fly High》MV，VTC 已經露過一手，今次《LOAD面撈出個未來》實在有再下一城之效！上次「MK文化」深入民心，對準 target audience；今云對象層面更廣，有盡攬各行各業撈家之勢。對搵食至上的港人而言，實在非常體貼。正所謂：「飽暖思夢想」，VTC (或IVE)，若冠以「康港夢工場」之名，理必當之無愧！

講番《LOAD面撈出個未來》。Upload 自己塊面整造形公仔，稱之「LOAD面」，明白。從徬徨市井青年觀點出發，用「撈出個未來」，都明白。但用一句沒標點的「LOAD面撈出個未來」做 slogan，句子意思就有點兒怪怪？！中文語理通嗎？！學子中英文都麻麻，真係要報報 VTC 啲 course 進修一下，賜教賜教。「Load」「撈」「Low」「No！No！」，食字呢家嘢，真係港人 favourite，在創作過程中，一旦阿某某惗到個「食字gag」，大家都往往欲罷不能地採納，覺得這就是創意，這就是設計。除了優質上乘的，康港幾不可思議嘅 idea 都有可能出街，而且多出自巨型機構 (如電仍)，甚至自稱的教育機構。VTC 先後已十分前瞻地身教了我們。還有，VTC 亦貫徹其創作風格 –– 縱使條橋麻麻構思空泛，一於技術效果大龍鳯製作搭夠，務求觀眾報以一聲「嘩~ 點整㗎？！」為目標。(有志走呢種路線嘅同學，不妨惗惗 VTC 嘅 IVE 啦！)

來年 2010，成蟲大哥代言的「霸王設計學院」就會如「敵視嚟樂園」般登陸康港。到時康港設計教育界定必有一番龍爭虎鬥，相信不比澳門賭業興旺兼百花齊放。希望到時大家都可以喺激烈競爭中襟撈襟撈啦！！！


鳴謝：丸氏報料

電訊仍 fall

最近上市公司八號仔搞私有化，引來眾小股民不滿，令學子想起三年幾前寫過有關該公司新撈稿嘅一段小文。

由 Henry Steiner「噹噹 T 字」撈稿，到今日「七彩格仔」，都係八號仔，但無論股價與撈稿圖形嘅複雜程度，都今非昔比。

第三代，Cable & Wireless，因為構圖複雜多線，製作時(尤其縮細時)易出現「盟」的情況，所以需要右手邊嗰個「少線 version」。問題與
Minolta 撈稿差不多。


話說，八號仔 launch 新撈稿嗰陣，「初版撈稿」與而家用緊嗰個有少許出入。見上圖頂，原本個「科」字嗰兩點，係正正常常地向下點的。「斗」字的橫劃則由左向右上朝。「初版撈稿」正式面世未幾，櫈都未坐暖，民間就有傳「咦？！嗰兩點向下傾，好似唔多老黎喎。股價好似佢咁咪大劑？！」於是，冇幾耐，嗰兩點同嗰橫劃，就生番向上至水平，冇再好似自己個股價咁向下往了。

多年前，有次有幸瞄過個新撈稿份 Graphic Manual PDF，上面標明個七色撈稿要「always on white background」，真係聞所未聞，認真經典。心惗：有可能嗎？！如果真真真係咁唔小心遇着深色 background 呢？點算呢？！... ... 幾年後，偶然喺八號仔自己嘅媒體發現，「always on white background」嘅破解法，見尾圖。真係好靚。

... ... ... ... ... ...

如果要我揀「賣飛佛撈稿」，我會揀八號仔呢堆「格仔」。因為真係惗唔到有其他撈稿比佢更大膽，更破格，更繽紛，更搞笑，更怕白色，更難製作，更反映股價；最重要的，係更令人更想為呢個世界做一些好設計出來。

以上圖片均來自 Google search

Typography 沙漠

康港設計 typo 差馳名中外。哩民 (laymen) 唔識尚且可以原諒，但自稱專業的，尤其主攻平面設計和設計教育工作者 (包括廣告及其他視藝)，如果 typo 爛兼莫視其重要性，這等同業餘充專業。

(真係講都講到口嗅) 評估一個平面設計者之水平高低，除觀其思考腦筋外，typo 功夫是否到家，成了關鍵。很很很可惜，優質的 typography 教育，在康港原來近乎絕跡 (就算偶有良師問世，學院和學生們都多輕視之)。難怪康港市容咁醜；難怪啲人唔知好 typo 為何物；難怪蛇果都已經係眾報業嘅臨摹對象。

最最最嘔血，莫過於「劣 typo 驅逐好 typo」之出現。啲友仔用慣 Microsoft Word 睇慣肉酸劣質嘢，畀啲好嘢佢時，反而叫你改番「好似 Word 咁樣」。苦口婆心好言諫之咩？！中毒深者就會駁斥道：「大家都睇慣咗係咁㗎啦。要知道普眾大眾唔似你咁受過設計訓練嘛！」媽的！咁你唔去搵「普眾大眾」幫你設計？！？！

講到 typo 咁大，其實，它只不過是平面設計中基本到無可再基本的基本知識。做好它，是設計者的本份，沒甚麼值得可誇的，正如做廚師要衞生一樣。奈何，你想做好基本咩，人們卻愛在蛇上添足。總之，唔錯唔 buy！

才子成日喺電台講康港社會漸漸膚淺化、愚昧化，我開頭都懷疑，但睇番啲人對「非大眾化 typo」嘅反應，真係唔到我唔信。