26.11.05

見過至會 buy

唔係,應該咁講 ... ... 。要見過,至有可能會 buy。

暑期裏,有一次,從事設計的朋友來英旅遊,順道探望學子,講起他遇到的「半粒山埃」問題。

我們分享有關康港客戶品味及要求的話題,很自然地,感慨創作空間的細小與百般的限制。朋友的經驗之談,學子有連番的共鳴。在種種騎呢的見聞中,有一項,朋友十分精闢地用了「半粒山埃」來形容。意思是指其致命程度,足以令一個原本好地地的 design project,在剎那間活生生地被弄死了一半!那是甚麼?知唔係有幾年工作經驗嘅人都知道嘅 —— 「未見過唔 buy 現象」囉!... ...「未見過喎!得唔得㗎?有冇 reference 或 example 先?外國有冇人做過先?... ... 一係咁嘞,做個 dummy 嚟睇吓先嘞,不過,個 dummy 要真喎,最好同製成品一樣啦 ... ... 」(咁都叫 dummy?)

Briefing 時,講到自己幾咁豁達幾咁品味高雅接受能力高,到後尾,膽小如納米!當然,大家都明白,對有經驗有能力的設計人而言,這是見怪不怪的全球性 design problem,客戶對未見之物心存懷疑,是正常的。設計者係有責任去想辦法去令客戶明白自己那較抽象的 idea 和做法的,這正正是溝通和 presentation 的重要性。Present 得衰,sell 得流,個戶 kill 咗個好方案,是活該的,與人無尤。但是,相信行家們都會 sense 到,學子想帶出的,並唔係類似的專業性範疇內之辣手問題,而是嗰種「富 local 特色、膽怯、犬儒、驚青、play safe、驚死蝕底、人有我有、隔離飯香、缺乏自信、用人必疑、欠缺獨立思維、腦壞死、愛跟風、bad taste、盲目祟洋、見識少、短視」之頑劣客戶特徵!遇上咁嘅客,真係好似食咗半粒山埃咁,想個 design creative 啲都難。

一個設計之死,之所以淪為「交租 job」令設計人怕怕,其實原因真係好多好多,正所謂「半粒山埃何其多!」有啲 job,一個 job 內分分鐘有四五大粒山埃,都咪話唔嘆。但「未見過唔 buy 現象」就真係相當難頂!讀得設計,做得設計,愛得設計的,都係想創新,想用一些 unconventional (非傳統的) 的方法去解決問題,唔係為創新而創新,而係一種「why not 精神」(又 work 又新,唔係更幫到客戶嗎?)。Chiché 嘢,永遠唔會受真正設計人歡迎。唔係完全否定舊嘢,而係舊嘢係有分好同差的!戇居的,仲用嚟做乜?!一般人唔識分,冇問題,咁將工作交俾啲專做呢啲工作嘅人囉!波人人識踢,但唔係個個係職業球員嘛!做設計亦然。(不過,如果該地方滿是也也烏切雞人,又另作別論啦)

咁簡單嘅道理,如果自己個客都唔明,真係好鬼難再合作落去。炒客咩?搵個另一個,又係咁。再搵,仲衰過上次嗰個。真係唔難會慢慢體諒到進入咗化境嘅設計人嘅心態。

在學校就猛咁懶有創意地天馬行空,講 idea,講 concept,講 development,講改善人類生活;一畢業,就要乖乖地除定褲俾人輪!為兩啖飯爭餐死!一諗下丁點兒理想啫,就被人猛喊停,叫住面對現吧!認真世紀大騙局!最虛偽健力士世界紀錄!(港人至愛!) 講乜都假,人文水平唔提高,起乜 Q 設計學院,乜嘢學士學位課程,攪甚麼比賽,都冇用!始終覺得,有時真係知得越多越冇癮,創意越盛越無奈。

有云,越艱鉅嘅環境,真創意至會出現。好!我信。只但願唔駛啪咁多粒山埃吧。

(反方講完,歡迎正方回應,balance 一下!謝!)

24.11.05

香港好相似設計


恭賀大哥璋的著名網站 ——《香港好相似設計》—— 喬遷之喜!盼望這 blog version 能夠繼續發揚康港作為「創意轉口港」的不朽精神,與及讓大家認識更多本地的「Visual & Idea Merchandizer」精英 (雖然來來去去都係嗰幾位盟主),令我埠可夠持續處於珠三角華南文化藝術創新領先之地位!

一於支持到底!Promote 康港!發掘港式切雞文化之精粹!

歡呼!

默哀。

23.11.05

偽善網絡豺狼


一直都好少用 Multiply,最初原因係唔多習慣個方式,覺得太複雜,太多 function。到最近,近幾個月,一連串事情的發生,令學子更加唔想用 Multiply。

事源:有兜友用 Multiply 呢個虛擬平台去玩「角色扮演」,捏造出虛擬的美善性格,訛詐別人的信任,繼而搵「著數」(或財或色)。此豺狼如蛇般靈巧地利用 Multiply 的網絡群特性,加上職業的文字技巧,建立了一個牢不可破的「落藥網絡」,令唔少人都不自覺地中招。

首先,牠選擇性地揀選了一群「心腹知心友」(即牠信任的人)作自家網絡,然後圍內地運用其甜口滑舌傳達花言巧語,建立一個近乎完美的偽性格。同時,在 Public Mode,不時寫寫生活逸趣,promote 一下牠自己的優皮生活,和親善大使般的平易近人,塑造出一塊可親的羊皮。其中,牠愛經常性毫無廉恥地利用基督徒之名,懺悔這懺悔那,又話自己甚麼禱告至淚流滿面,「神呀!寬恕我!」,自哭自憐無病呻吟地販賣可憐身世,渴望愛之餘,博愛!搏人同情!簡直就影嚮市容,令人反胃!對於不知情者,仲以為佢係又溫柔又良善的愛主受傷小白兔,誰不知,這全是牠的「搵食技倆」。

如果在其網絡中的「心腹知心友」機智地知道了其真面目,欲寫留言告知其他人,豺狼便會簡便地將之 delete 去,甚至將事主逐去其網絡之外,以保持網內的「純潔性」,及防止「搵食性」之下降。Multiply 所提供的方便,令豺狼十分安心,安居樂孽。

當然,又唔可以怪晒 Multiply,因為豺狼亦善於 MSN,及其他媒體作掩飾。有了虛擬世界的「那塊羊皮」,就算真人的面目再猙獰,善良的人們,都早已放下了一切應有的防備吧。

網絡世界之複雜唔係新聞,但近距離得知有如此荒誕的事情就真係第一次 (身邊朋友一直好人居多)。之所以荒誕,在於唔係好明啲人點解可以掩耳盜鈴得咁交關,以為自己嘅所作所為會冇人知?!(咪當啲人懵至得㗎!) 點解連自己嘅名聲都可以當作籌碼攞出去咁玩法呢?(噢,忘了誠信破產之輩之思維模式㖭。)

據說,最近,豺狼在某教會因意圖一腳踏三四船事敗,而臭名遠播。翻查紀錄,原來此獸乃屬積犯,臭名遠播是其慣常 practice,誠信之破落就連 Yahoo Google 都有記載,隨時 search 到!真係虧佢仲口口聲聲 claim 自己「有病」!太可笑了吧?!信嗰個先至有病吧!

唉 ... ... 都皇晒啦,仲出嚟獻世,扮冇事,扮受害者。面皮之厚,無恥之程度,真係低估晒。失覺!失覺!

... ... ...

本來都想 ignore 呢啲咁嘅無謂人,但真係想多啲人知條友嘅衰嘢。

13.11.05

貝晶歡迎妮!

「貝貝、晶晶、歡歡、迎迎、妮妮!快啲出嚟見見大家,打個招呼啦!嗱,以後要乖乖地招待各國來賓,帶旺經濟嘞!」「Beibei,你行頭,要睇住後面啲細嘅。Jingjing,你咪持住自己係國寶就「也文也武」呀!Huanhuan 同 Yingying,你哋又紅又黃,最啱做歡迎工作阿頭,要落力唷!雖然冇外國人知道你哋係代表「welcome」,但冇相干!「Gong An」 代表「police」都用咗咁多年啦!啲人慢慢就會慣。Nini (妮妮),你個名最 cutie,最殺死人,啲客嚟唔嚟,靠晒你啦!」
... ... ...

毛筆筆觸 feel 加奧運五環顔色,兼順晒次序排列,藍黑紅黃綠,醒醒目目,活活潑潑 (必殺技),華夏 touch,熊貓夾傳統文化 symbol ... ... ... 基本上,仿似成份 brief 活現眼前咁!設計嗰位仁兄或單位,稱職到無可再稱職!個 solution 準到無可再準!特別係條大橋,最出色! —— 五隻吉祥獸湊成一句大會主題 tag line「北京歡迎您!」(好彩不再叫 PK 啫),又明又白,言簡意到!如果學子係客,真係想 reject 都難以啟齒。要有嘅嘢,都盡在其中,比起「青班兩食」「一雞三味」「四寶湯河」更能滿足人客有啲貪心嘅要求!在審查嚴緊的國內,能做出如此高水平的作品,實屬難得。

曾經,擔心過我國攪奧運會娘味濃烈,失禮街坊,而家真係定晒,當初自己實在太杞人憂天,枉擔心了。相比起設計祖師大國 —— 德國 —— 的「哈哈笑」零六世界盃 logo,我國的,已經算中規中矩,大大方方,正正路路了。(2006 個世界盃 logo 真係自睇世界盃以來,眼見最馬虎最唔得體嘅一個,仲要係堂堂德國!身為球迷兼設計迷,雙重失望。)
... ... ...

「呀!各位囡囡,差啲唔記得。貝貝、晶晶、歡歡、迎迎、妮妮!你哋呢個組合係有個朵㗎!名叫「福娃」(Fuk Wa)!福氣加娃娃兒,你話幾咁好兆頭,幾咁有意境呢!不過,記住,如果萬一有老外鬼佬諗埋啲衰嘢,F 來 F 往咁調戲你哋,你哋就咪鬼睬佢哋啦,知冇?當然啦,唔睬還唔睬,千祈咪得罪啲客呀。」

「Ladies and Gent 圖文!萬眾期待,千呼萬喚 ... ... ... 五福娃 ... 娃娃娃 ...!正式登場 ... 場場場 ...!」

圖片來自中國奧委會官方網站

12.11.05

《Copy Goes Here》

先去片,《Copy Goes Here》(英語,無字幕,片長幾分鐘)。


設計人唔睇多字嘅書,相信自己患有文字恐懼症,廿六個英文字母背唔出,手字似麥兜,甚至係文盲,相信已經唔係啲咩新觀點大新聞。讀唔成書先走去讀設計的,肯定佔康港本地設計人人口的一半以上。行業的社會地位低,冇人聽設計人支笛,視之為非專業技工,唔可以怪晒人。少少驚訝嘅係,如此怪現象,竟然同樣出現在人文科學較先進的西方社會裏,而且有人仲咁鬼認真地拍條片嚟諷刺一番,真係令井底學子頓然嘖嘖稱奇!

Coudal Partners 嘅拍片動機暫且唔理,想講嘅係設計人嘅語文及學術水平問題。究竟,唔識字可唔可以做設計呢?識字同唔識的,又有何分別呢?做設計,要讀書讀到乜嘢 level 先夠 quali 呢?大學生會比 diploma 仔 creative 啲嗎?有學位可以叫價叫貴啲嗎?... ... 等等。好老實,如果學子意圖就以上問題下一些定論,大家一定可以即舉九百幾個 exceptional case 來反駁之,所以,學子真係冇咁笨。因為大家所講的所謂「設計」或「設計界」,可以是有根本性的大差異的。正如學子以前在新聞組提過:若有兩份工,一份工作性質係 1% 創作思考 99% 勞動砌稿;另一份 99% 創作 1% 砌稿,在康港,兩者的 title 都可以叫做「designer」的。換句話講,即有啲「designer」職位要求可以盲字唔識隻,只要身懷砌稿絕技 (火焰陀螺),快手快腳,肯賣命,字,係可以唔識的。另一極端,優皮知識份子學術歷史文化內涵型 designer,他們除 design practice 外,還會著書立說 (不是純公仔作品集)、講學及做究研 (此類,如果一早冇選擇做設計師,大可能都會當其他的專業)。試問,兩者一齊作比較,係咪攞嚟拗,多鬼餘呢?

片中眾文盲 (illiterate) 最後都「改邪歸正」,聽了那個可憐 copywriter 話,努力惡補,最終都識得覆 email 俾客,識睇餐牌叫外賣,知道自己 iPod 上播嘅係乜歌,甚至,睇 design 書睇埋字,終於知道 Paul Rand 係乜水。嗰種知錯能改的勇氣同坐言起行,簡直成套勵志片咁,感動人心!反觀現實,合理化自身弱點,輕視知識,膽怯改過的「設計人」,就真係比嗰個被炒嘅打完齋唔要和尚 copywriter 還要可憐幾百倍。社會視設計藝術科目為工科,職業培訓技能手作仔,一門學師搵食手藝,大量招攬主流學制遺才入伍,都算吧。最可惜係,那唔咸唔淡嘅培訓,誤人子弟兄姊妹,令「design」同「creativity」的含意都被扭曲了。「唔識字?唔緊要!市場上,大把「設計工種」無需要求英文合格,放心吧。只要有創意,夠天馬行空,好好地完成本課程,加上抵得諗,做吓 free freelance,後生仔!有志者事竟成,文盲都可以變大師嘅!」這配合「後殖民新生代」的反叛後現代思維,大眾媒體的「天神村化反智」,政府的「文娛偽術大藍圖」,一個字,唉 ~~~!

有一位 part-time 教設計的朋友告之:時下的設計學生 (唔知為數有幾多),係連 caption 都懶睇的。

... ... ...

鳴謝法蘭西施報料
影片及圖片來自 www.coudal.com

6.11.05

長氣偉論

好怕又長又唚,好似永無休止,不斷在 loop 的訊息 (例如長過四十五分鐘的道或 lecture)。Present 得活活潑潑,縱使沒有甚麼 point,都尚算可以,不太介意地聽久一丁點兒,反正可以欣賞講者的敘述技巧,如何化腐朽為普通。然而,又 pointless 又冗長的,真的想叫救命!極怕長篇大論而無當。可是 ... ... 近排發覺自己真的又長氣,又多一籮籮的「偉論」... ...

富愛心又誠實的內子,其實已經不只一次的 mention 過學子的「特點」,叮囑那怨氣冲天的呻吟會令身邊的朋友怕鬼咗我,甚至 ... ... 敬而遠之 (請用史前愛滋病廣告甩牙阿伯腔念出)!雖然,so far,都不太覺得真的有人因此而遠之去 (可能通常當事人都唔會點覺得),但自己就開始認真地留意每次「演說」的歷時。不只 verbally,就算寫 blog,講切雞嘢,鬧呢鬧路,無病呻吟,都已經達至有點兒「病態」的程度。縱使,在學子的角度,這都是出於一團無名火,只想說出想說的,講出大家都知但少講的事實,或,偉大一點,只是想分享一下感受及一點點過來經驗,交流一下,希望後來者或同輩可以借鏡或作參考。不過,可能,凡事都應適可而止。過太了,就會變唚。

現正學習少口述,最多一兩分鐘止,盡量控制住自己咪一輪嘴,non-stop。熱愛工作還熱愛工作,有時三句不離本行確實係有啲令人煩厭。經常 repeat 自己,的確係有啲悶。所以有 friends 曾經建議學子不如日後走教育路線,學子都話咪攪。試問一心想走小生偶像食力派的,又點會安份提早行 King Sir 條演藝學院教育路呢?

自知之名,學子是有一點的 (多得內子從旁提醒),但一日內裏團火仲燒緊,罷休係唔會咁快出現的!哈哈哈哈 (奸人堅腔)!

3.11.05

設計教育盲點?

Blog 友 Veron上一篇 blog 的回應如下。(乘機又借題發揮一下)
諗起上次聽阿勁叔個talk, 佢show左唔少佢design既poster, 跟手話,"唔識用電腦唔緊要, 我都唔識用電腦", 用電腦做既effect,畫既圖都你佢o的員工做既~更係唔緊要啦~你有錢比人幫你畫~之後又講左好多marketing...做生意既野~
聽完成個talk...成腦都係錢..marketing..
生意經、搵錢之道當然有其重要性,作為職業手嘛。但,you know,語氣、講嘅方式同其公司或個人取向斷定嗰段內容係咪富「市儈味」。(同一句話,用「sale 屎腔」講,可以差好遠哦!)

暫唔講 money,講嗰句:「唔識用電腦唔緊要, 我都唔識用電腦。」

Steiner 都有講過:電腦和軟件應用已經取代了基本設計知識的教授。勁叔同佢所強調的,其實有根有據,合情合理,無可厚非。可是,電腦,在學習設計路上萬萬唔應該行先,或者攪到最後只曉得撚電腦而 (例如) typo 奇差。但是!但是!現代設計人,如果唔識用電腦操作一般的熱門軟件,就有如在前輩們嘅年代,唔識用針筆、雲呎、圓規、rubber cement、鴨咀筆等基本工具咁嚴重!試問勁叔同石老先生聘請 junior designer / artist,如果應徵者話:「我唔識用電腦。」你估條友仔有冇可能入到職?

康港設計教育同業界所面對其中最大劑嘅問題係:市場細且爛,各公司為求「高效率高回報」,狂用電腦同人力工時去回應趕頭趕命嘅市場節奏和所謂客所要求。可悲地,眾學校見狀,「體貼地」回應之,狂製造「迎合市場需要」的「設計人才」,電腦變成了最最最「可見的」搵食技倆,唔學唔得,其他的,都變得次要。咁,你話嘞。

三十幾年前入行,而且仲上了神枱,就緊係唔駛學今時今日嘅電腦啦!如果勁叔冇咁勁,你估佢唔駛學番兩嘢旁身麼?!上一代唔體察民情,咁就緊係慢慢一代不如一代啦。做下一代嘅,又多數拾吓拾吓,去到啲所謂學校,又狂被人硬教授電腦軟件加純 presentable 靚仔「表皮設計」,想認認真真學正統嘢堅嘢嘅,又苦無門路。最後攪到,自求多福,自我進化才可能或者慢慢 catch up 到個現況。

不過,話電腦係必需,又可能會令到一啲邏輯混亂嘅兒童走去狂操電腦 ... ... 畢竟,「基本設計知識」係乜?慢慢已經 blur 了。唔教電腦又教乜呢?教嗰個都 confuse,莫講學嗰個吧。

唉 ... ... 康港。

1.11.05

Show Me More Money !

今日生果報陶傑的專欄,題目係《創意產業》。講到發錢寒民族的發錢寒思維,不禁令人神傷。無巧不成話,文中內容跟學子早前的《Show Me the Money !》不謀而合。再加上今晚陶某的電台節目《光明頂》,講到中國知識份子的坎坷命運,學者的「功利化」,埋沒獨立思維及良知的傳統,神傷加碼再加碼。自己的一槍,加上陶某補兩槍,差啲喊得出。

節錄小小。
創意就是創意,只有一個想錢想瘋了的民族,才會發明一個名詞,叫做「創意產業」。創意不是死活「研究」、「諮詢」,成立幾個吃飯飲宴的吹水委員會,就能「營造」出來的,創意是天才無意之中的發現。德國科學家、諾貝爾得獎人米謝去中國訪問,接受大陸記者採訪,記者問了一個八股問題:「請您說一說科學研究怎樣可以作為一種創意產業來進行發展?」德國人淡淡一笑,訓眼前這個大鄉里:「我不會把科學稱為一種『產業』,我們研究科學,不是像你們一樣為了錢,是為了展現我們的洞察力。」中國記者一時語塞,反應不過來。米謝說:「科學研究,不是刻意的追求,而在於出乎意料之外的新發現。一心一意地做實驗。最多只能得到你所期望的結果,而在這個過程中,反而不知不覺之間停止了創新。」創意只是一種遊戲,創作的過程是一種把玩。
一開始只是貪玩,玩而成癖,癖而成家,就像達芬奇無數發明的手稿,一切只是一股莫名的心癮,從來沒有想到過怎樣成就甚麼產業,甚麼工程,將來如何上市做Deal,成為億萬富豪。
創意不是一樣產業,正如戀愛不必第一步想到結婚。中國人開口閉口就是「生產力」、「經濟增長」,讀大學要選修甚麼甚麼才「吃香」,因為有龐大的就業市場。連作文寫詩也變成一種「生產力」,因為科舉考試,可以做官。一聽見「創意產業」就叫人打呵欠,好像才第一次約會剛相識,女方就問男方的精蟲數目夠不夠。
重聽上星期日 (廿三號) 商台《打書釘》,談及世界各地博物館之文化,嚇咗一跳!竟然,又不謀而合地與前一篇 blog 講差不多的內容,題材之爛,之熱門,可想而知。唉 ... ... 真係講都講到口臭,期望有翻天覆地的巨變,好文化大革命之出現,實在渺茫之極。祇願,大家提高對現況之認知,做好自己之餘,推動一下身邊人 (枕邊人亦可),老套地群策群力,老套地開創唔老套的未來。

... ... ...

現正忙於一個 illustration project 同 photography project,睇見朋友們猛寫 blog,而自己開學後卻變了寫週記,真冇癮!慘在想寫的多數需要長篇大論,攪到淪為「得個諗字」!唔得,諗吓對策先得。