回歸後，國內經濟向上，康港走勢向下，從事創意行業港人紛紛北上搵食，加上國內留學歐美海歸者眾，漸漸地越來越多人話：「國內設計水平就快追過香港。」近年甚至話：「挑！一早過咗香港啦！唔講北京上海，就連廣州深圳搞嗰啲 exhibition 都有睇頭過香港嗰啲啦。香港玩能源啦！」初初聽到類似評論，我還有少少保留。但今日，我信。
中國大陸國慶標誌
康港特區國慶標誌單單看看這兩個國慶撈稿的質素和風格，便高低立見。一個簡潔鮮明、兩色、sans serif extra bold「60」字樣、小小兩個年份代替了冗長的字句、五星加簡約天安門圖形，點到即止，易用得體，整體雖則未至於攞晒獎，但絕對是及格有餘的作品。反觀另外一個，花哩花碌、夾夾埋埋有成十粒星、蝦肉色特區紫荊花托底不倫不類（懷疑可唔可以咁用）、中英合共廿幾字又紅又假金兼排列過時、幻彩漸變色懶隆重有腳斜體「60」字樣瘀瘀紅紅橙橙極具夜店風情，基本上，設計外行，取向貪婪選材無節制（懷疑是集體創作），完全不曉得標誌與圖畫之分別。
流覽政府網頁，原來特區國慶撈稿有份三頁紙的
《標誌使用指引》，內容簡陋草率，很難想像這是一個關乎八百萬人的隆重慶典標誌。
為了慶祝國家成立六十周年，我們特別設計了六十周年國慶的官方標誌。... ...
如機構獲准使用標誌，必須遵守標誌使用指引的規定。
留意，最後一句，「如機構獲准使用標誌，必須遵守標誌使用指引的規定」。
嗱，記住「必須遵守」呢句啦喎。
讓我們來看看由民政事務總署舉辦的
「國慶彩旗設計比賽」靚靚海報（下圖）。
唔講張海報有幾靚幾花幾七彩，政府嘢，唔可以太苛求。大家要留意嘅係，左上方的那個「特區國慶撈稿」。
根據《標誌使用指引》中說明，「不應把標誌放在對比效果欠佳的彩色背景上，或在標誌四周勾線」，第三頁圖解亦舉出範例（上圖下），顯示撈稿嚴禁被「四周勾線」綑邊。民政署今云將「特區國慶撈稿」咁用法，明顯地——違——規——了——！！！有法不依，自作主張，莫視一統和諧，乃標識系統大忌。堂堂國慶，咁搞法，太過份了吧。
九流設計，加上非專業運用，在今次國慶六十周年的主要標識設計上已狠狠地証明了康港落後於祖國。還記得京奧那套標緻的
pictogram 嗎？水平之高實在令人驚訝。再睇吓今年康港東亞運動會套
「吉祥物 pictogram」，竟然感覺「很大陸」。你話死唔死？
政府呀政府，你咪以為搵個最平嘅做，就唔係浪費公帤至得㗎。畀出真金白銀，換來垃圾一堆堆，也是浪費公帤唷！你雖然唔係我選出嚟，但你醒少少，我哋普羅市民都會有番少少 face（尤其喺同胞面前）。
自稱「國際大都會」，基本形象卻連第三世界也不如。（延伸閱讀：
《設計相學III》）
