公共活例在瑞士 06

(上) 在 Bern 的 Zentrum Paul Klee 海報；(下) 如無記錯，應是有關山區風光展覧的宣傳。

公共活例在瑞士 05

(上) Jazz Night；(下) 路邊餐廳海報，作用似「港式易拉架廣告」。

公共活例在瑞士 04

(上) 都是文化活動海報；(下) 在首都 Bern 街頭的路牌及其城市標誌運用。

公共活例在瑞士 03

(套用港語) 「文康活動」海報。

公共活例在瑞士 02

各類展覽及文化活動海報。

公共活例在瑞士 01

亂拋垃圾，自作孽。

休娛期

進入休娛期 + 休愚期！

無他，畢業論文死線迫近眉睫 —— 十一月十日。除了為交功課而交功課，為求畢到業外，問心，真的希望把它寫好，做到最好；畢竟，題目是自己選的，也是自己歡喜的 —— 《政治如何影響我們的文化 —— 藝術和設計》。今年第一次的 tutorial，新來的 tutor 跟我說：細佬，你個題目可以係一個三年制學位課程嚟喎！其實，在我 research 期間已經意識到其大鑊指數，然而，自己真的想對這個大範圍有更多的認識，盡管自己是一個 academic writing 的門外漢。硬着頭皮，繼續盡力，死就死啦。

六千至八千字 (另加 visual piece，整體要與題目和文字夾，要 well presented！)，在學術寫作而言實在是小兒科，正如 tutor 所言：嚴格而言，你們不是「正常的」BA students。不過，對我這個只懂幾隻盲字的「成熟」學子而言，則難度頗高。所以，要認真的休娛和休愚。

休娛期間，會少寫 blog，但會在這裏 post 一些早前在瑞士所拍來的照片，待 deadline 過後，有一相關的專題想寫一寫。

... ... ... ... ... ...

題外話。今日，做 photography 的「一日仙 project」時，路經 Tate Modern，目到如此巨形滑梯 (by Carsten Höller)，好鬼興奮。(還未玩過，一切待 deadline 過後才來盡興)

很多港人怕了藝術，怕了博物館，嫌悶，這可是康港眾所謂博物館和文化政策的責任呢！藝術，根本就是可以如此好玩，如此親民，如此破格。

最高那條有五層樓高，問你 (開心) 死未？

傳播媒介的按摩

A :「咦？你肥咗喎！」
B :「吖！話咗你啦，而家瘦啲咪好睇囉！」
C :「喂，又肥咗牙你？！」
D :「咦！瘦咗喎！」
E :「去咗英國咁耐，冇乜肥瘦啊可？」
F :「唔好食咁多 fish & chips 啦你！肥仔！」
G :「Keep 住啦，唔再肥都 ok 㗎啦。」
H : ... ... ...

每次回港，很多親友都這樣關懷學子 (我倒不介意，只覺怪怪)。怪在，我相信，大家都是無意專登談及肥肥瘦瘦的，但那種不約而同，同一口徑，是巧合，還是背後另有因由呢？肥共瘦，無疑，已無形地深深進入了我們的語言系統當中。用肥瘦來作話匣子，並不等於該人就是那種趨時盲目愛美瘦身厭肥之隨波逐流者；相反，跟很多明智港人一樣，他都可能厭惡瘦身公司鋪天蓋地品味低劣的核突露骨廣告，不會覺得肥少少就是世界沒日。問題是，既然本身對瘦身減肥無甚興趣，哪為甚麼愛用「肥瘦話匣子」呢？莫非大家都認為「肥瘦話匣子」匹配學子？我想非也。我懷疑，根本，大家無論面對任何人，只要對方非「中等身材」，便會潛意識地使出「肥瘦話匣子」以作寒暄。背後原因簡單，兇手一定是 —— 傳播媒介的按摩！

「傳播媒介的按摩」一詞，是抄 Marshall McLuhan 名著《Medium is the Massage》的，相信大家都可能知道此書來頭。雖然是六十年代的著作，但其中的內容，論及傳播媒介對大眾意識形態的影響，卻很 timeless。

縱使我們對身邊不好的事物都很抗拒，如「我死都唔睇《美女廚房》㗎啦！睇到我蠢晒！」，但生活在一個物質、傳媒多元，品質、資訊卻頗平庸、單一的都市，想逃離傳媒的指壓，實在有點難度。


不論官方教育宣傳品或坤人瘦身減肥廣告，除了用 cutie 公仔和三點式師奶舞男肌肉外，原來「豪飲油」的 impact，可以這麼的強而美。


如何 graphically 敍述 37 吋腰？以上是一個不俗的成功避重就輕例子。不必下下贅肉橫生畫出腸地影響市容的。

(傳媒除影響我們的話匣子外，更朝夕按摩着我們對美的看法和要求呢。)

註：經一輪非科學統計，話學子肥了和瘦了的，約各佔一半。事實上，我近一年真係冇乜肥瘦，果然，觀眾眼睛是雪亮。

當老本食盡時

同啲行內 friends，一講親切雞嘢，三句唔埋兩句就講埋晒啲業內灰嘢，市況滲嘢，文化低俗嘢，唔少見聞仲唔只灰，直頭接近 100% black。久而久之，講都講到口臭，乾涸話題 loop 完又 loop，總之好似要講到大家慘絕人寰，講到要去撒瑪利亞會至安樂咁，甚為無癮。當然，大家都明白齋灰，係無補於事的，灰，亦不等於坐以待斃，不善生產 (大家都日日正在不同崗位奮鬥着呢！)。事實上，喺所謂文化沙漠從事有關文化的工作，多少，係有點兒灰的理由的。

類似「三十歲後 career path 如何？」等話題，相信喺康港不同切雞圈子中，都應該討論過不只幾億次。然而，討論最後多只是討論本身，brain storm 完只見通街廢紙垃圾。究竟，如果不想北上或他投，喺康港，做切雞仲有乜嘢曙光呢？(轉型去教書、做 management、變身做客的不算於此，呢度，講緊嘅係提供 design service 的切雞人。)

朋友有一個頗有啟發的遭遇。

(長話短說) 話說，朋友在一個 presetation 後，接到客戶電話，feedback 竟然是 —— 全 ... 全 ... 全 ... 全 BUY！！！在此聲明，據知，朋友那次 presentation 的內容並非純為討好嘅「湊客之作」，當中不乏嘢嘢想試個客底線的「心血之作」。如斯喜訊 ... ... 唔係，如斯奇聞，真係要刊登喺《奇聞》。學子問朋友，究竟如何解讀呢啲咁不可思議嘅現象呢？！係個別事件，定抑或係一種集體轉性 phenomenon 呢？朋友話，睇嚟唔似單一案例，因為朋友之前都有類似奇遇，個客好似忽然醒覺英明晒咁，以前唔 buy 嘅，而家都 buy，such as 細 logo 同黑白相！再者，朋友又話，唔只咁，就連平時喺中間阿芝阿佐嗰啲低水平所謂 marketing、AE 人都少咗出沒，直接令整個 design process 順暢晒！原因應該係客戶們漸漸明白到「 (decision making process) 人少好做事」嘅道理。

嘩！嘩！嘩！雖然唔算得係乜嘢光復，但對身處創作煉獄多時嘅切雞人而言，無疑係天大喜訊！查探原因，原來阿芝阿佐中間人絕跡江湖，喺廣告界亦已經有一段時間，令學子記起多年前遊英，友人初介紹 Mother 予學子認識時提及，Mother 內是沒有 account servicing 一職的，客戶可以直接與 CD 同 AD 溝通，言簡意賅，事半功倍。 至於，客戶品味、識見忽然豁達化，經一輪推敲，變異心態應該同一句老話 ——「置之死地而後生」有關。

原來，經濟差勁，康港風光一去不返，老本都經已差不多食盡時，有人會開始懷疑舊日沿用嘅嗰一套。「與其冇 form 打，不如試新嘢」。當成功方程式唔 work 時，啲人就好似「忽然愛國」咁「忽然攪創意」，搏一搏。可悲係可悲咗少少，下下要就嚟冇飯食先會去動腦筋，但，都好過冇吧。

希望有 guts 嘅客戶越來越多，他日佢哋食到頭啖湯賺大錢，都唔好唔記得自己霉嗰陣嗰種冒險創新精神啦！

... ... ... ... ... ...

P.S. 如此曙光、餘暉中的光芒、希望，謹留給「嘢嘢想試個客底線」之堅持人仕。妥協、湊客、齋灰等運到、「放棄了理想人人都可以」之流，你諗都咪諗！

第三年

昨午回英，準備下週一（十月二日）開學，心情比之前兩年開學沒那麼輕省。原因無他，第三年，最後一年，入直路，直路之後是重投「現實」。無論自己如何視學習為過程，視成績為次要，始終，有一種「今鋪要嚟真」的壓力。

此外，「第三年」，對自己而言，好像一個「關口」似的。

自學前 BB 班至今，包括曾讀過的學校和工作過的公司，除了幼稚園的民生書院由 K1 讀到小一（如沒記錯，應共四年），沒有一間學校或公司，逗留超過兩年。學前 BB 班（一間），K1 讀到小一（一間），小二到小六（三間），中一到會考（四間），會考後讀了幾個月的商科（一間），設計學校（四間三地），曾任職公司（包括 trainee、freelance 和自資公司，九間），最長逗留期為兩年，最短為兩星期至數月。

轉校多因成績問題，與操行無關。轉工原因則較多采多姿，如重投學業（兩次）、追求較佳發展空間或待遇、被裁員、嘗試自資經營、打番工 ... ... 等。其實自己都幾渴望安穩，但際遇使然，如此漂泊，真的有些無奈。雖然這兩年一度的「環境轉變週期」令兒時的我沒有了較長久的友誼和歸屬感，長大後沒有了較穩定的工作和長遠計劃，但是，我卻珍惜這漂泊和異常的經歷和體會（頗羡慕人家一間小學一間中學一間大學的一條龍，和有一班共事十來年的好同事），縱使它沒有帶給我異於常人的適應力。

對上一次的第三年經驗，冇卅年都有廿來年前，希望來年是開開心心、充充實實、圓圓滿滿的吧！（最緊要唔好有第四年！）

... ... ... ... ... ... ...

P.S. 有兩段關係，沒有在「兩年環境轉變週期」內出現，深感欣喜！

一，自幼便去的教會；二，十一年前結識的內子。

{{ : )