西九歸西

係囉 ～ 起乜鬼天幕吖！起咗棧眼冤，棧又成為國際大笑話！

唔理背後係咪有任何政治目的，喊停，總好過再起啲好似中央圖書館咁嘅三不像出嚟！Museum 上面起樓喎，咪笑死人啦！幾時見過人哋 Tate Modern、MoMA、Guggenheim 樓上有人住吖？！起四個博物館，甚麼各類型劇院、表演場地，唉 ～ 好心啦！家吓本埠「文化大哥大」 —— 康港文化中心 —— 都要送電筒、螺絲批、指甲鉗、修甲鋤嚟速銷會藉，仲起咁多乜館物館嚟做乜！？ ... ... 到時拍烏蠅，唔通又送毛巾、廟街電子錶、大白兔糖、Hello Kitty 咩？！


設計學生設計之設計圖片 ＊

咪話學子得把口，嗱，上圖係我嘅 proposal (其實唔係咩新構思)。一於將整塊地皮種晒草，種晒樹，好似敦倫 Hyde Park 咁，打造一個康港最缺乏嘅「天然大空間」，咁就最合適嘞！加上呼籲老闆們有人性少少，讓班打工仔有工放兼又唔好減薪。咁樣，相信，絕對可以提升全民嘅生活質素，繼而漸漸有生活情趣，甚至有埋生活品味！

好似話九月政府會出份新 proposal，真係十萬個唔該！好心有 taste 少少，presentable 少少，講大話都講真少少，似樣少少。否則，曾特首呀，曾特首呀，唔係好易又會出現一舊「政治大危機」呢！

＊ 咪問學子張相點整點執吓！要問，去「design 谷」問啦。

笑中有淚

康港大會堂重燃學子寫 blog 之火。真係多謝晒！

一直以來，都經常忍不住氣地愛嘲笑 (或 crit) 一些質素低劣而又具規模的設計 project 和醜陋的文化百態。有時用詞會偏向涼薄、好 mean，甚至不留餘地，令人會覺得「有冇必要去到咁盡呀？」其實，用詞、語氣、或使用圖像，目的都在於將想講的 points，有力有效及全神地說出來，希望訊息的接收者可以明白作者之「恨之心切」。不是報復，但感慨那些質素低劣、完全漠視嚴謹認真創新精神的「設計品」，活生生地每時每分每秒一巴一巴的掌摑着一班有理想有能力有熱誠的創作人。殘酷地將本已經微少的空間越收越窄，肆意地繼續讒害大眾的低水平鑒賞和審美能力。具規模的 project 都不肯花錢 (合理價錢) 聘用和尊重專業設計人，仲講乜「創意工業」！仲攪乜「設計學院」！難道要叫那些設計人，乞求一些「小錢空間大」，又或者自製 personal projects，去參加乜鬼設計豬肉獎，以宣泄那嚴謹認真創新精神嗎？(Designers 真的要淪為 wankers ?)

當一個地方有着這種令創作人側目厭惡的文化傳統和集體價值觀時，只靠有心人以好作品逆流而上地去回應，去嘗試溝淡個化冀池，是不足以改善現況的。我們需要的是一場「運動」，一些能喚起大眾的「動作」(至少能喚起同業，或集合一眾「有心人」)。... ... 十分天方夜譚吧？！哈哈，其實都覺得「講就易」，但始終覺得係一個方向。

... ... ... ... ... ...

「趣聞」兩則。

個多月前，同胞同學 sent 條 link 嚟，話在學校的網上 blackboard，公開比賽一欄，發現有一個康港的「撈稿」設計比賽，正在接受作品。於是即上網查看。一睇，嚇了一跳，之後，得啖笑。原來是乜鬼「康港知專設計學院」。唉，現在可供同學們參加的比賽，有 D&DA Student Awards 十幾種 briefs、Hennessy XO packaging design、BBC website、MTV ident、Italian furniture brand - Lago 米蘭展宣傳 campaign ... ... etc.，試問有誰對此等「設計學院」有興趣呢？除非 ... ... 為錢吧。(冠軍 US$10,000，如果認同其辦學理念，又唔覺個 website 嘔心的話，不妨玩玩，搏一搏。)


整個網頁都沒有 selectable 的「real text」，全以「𠝹豆腐方式」將一舊舊 gif 合成，用純圖像「畫」個 site 出來！一個字 —— Pro！希望將來校方搵的 web design tutors，好似咁 pro，班學生就有福囉 ~~~！

... ... ... ... ... ...

之前介紹過「彩虹亞洲國際城市」的幻化彩色視覺刺激，近日，幫朋友搜尋婚禮事宜，又發現「幻彩正嘢」！難得的是，今次竟然在文化樞紐 —— 大會堂 (網頁) —— 出現！再聯想起早前回英時，在康港國際機場拍攝得的「激彩機場撈稿」！真的襯到絕，彩到絕！機場撈稿都夠薑咁玩法，充份表現出作者對原本嗰隻 metalic 綠嘅厭惡！充滿反叛，夠晒批判性！我鍾意！！！


不好意思，知道圖片之 art direction 確實令人不安，但為了傳真，我不得不保持原汁原味，尊重原創嘛，sorry！

一半

早幾日，經一 tutor 提醒，才知道原來本星期乃本學期的一半，亦即是本年度的一半 —— 整個三年課程的一半。這節期，好像要告訴自己：轉埋呢個彎，就快到直路了！

一直以來，都叫自己不要做「buffet 留學生」，即不要整天驚死蝕底地去趕頭趕命，好像旅行團趕景點般去生活，去體會，去求學品。因為覺得那太過有「填鴨 feel」「太工業學院」「太自由行」「太小農」「太康港」(或「太星加坡」也許更貼切)；既然難得身歷其境，呼吸着自由民主文明發達的空氣，如果還抱着港式思維和心態，我覺得，這才是真正的浪費。話就話「讀書不是求分數」，究竟有多少人能豁得出去呢？有時，心態上就好似入了一座金銀島，如果出來時兩手只拿着兩袋金幣，不是幾籮幾籮金銀珠寶，理性就會對自己說：正一笨 X！蝕底晒啦，傻仔！所以，都頗明白為何有人「喪蒲 museum」「狂搵 work placement」「猛啫住啲 tutor 問呢問路 (煩嗰隻！)」。對知識的渴求無疑確實值得學習，然而那種「擒青」就 ... ... 值得借鏡。

身為黃皮膚，來自中國康港，或多或少都有這種「本能」。要保持「儀態」，又要在知識追求上「舔到盡」，要學習的還多。

... ... ... ... ... ...

情人節，梗係要會會情人。會情人，當然唔少得鮮花一束。從前聽聞，洋鬼子懂得何謂生活素質，就算適逢情人佳節，賣花的，都絕少加價「掠啲客仔」，寧願維持平日價格，早點清貨，早點收工享天倫。情人節當天，我不知道我幫襯的那個老闆有否提早收鋪，只知花的價錢真的相當合理 (平日少在花店買花，多去花墟，所以不知平日價)，£7.95，十支靚靚鬱金香，包埋都冇加錢！筍！



今晚，成世仔第一次去聽像樣的音樂會，到 Royal Albert Hall (RAH) 去。事源，現居的宿舍經常有 RAH 音樂會超筍門券大抽籤，點筍法？原價 £34 的包箱貴賓票，超特價 £6 有售！每次名額只有四名，所以每次都好大競爭！內子早前報了名，感謝神地，在這情人節的小週未，讓我倆嘆咗一晚皇家海軍大樂隊的精彩演出！


Click 圖看 wide angle 全景

寒假回憶＋春季學期

寫 blog 的興致，近月都淡了。原因可能與這個忙碌的學期有關，又或者，有很多想說的，都在過去的半年裏反覆嘮叨過了。一時間，動力減了。

聖誕 term break，與內子回港一個月，返回有氣冇椗逗的超級都市生活。明白到，總之一回港，根本就沒甚可能悠閒。之前在英幻想在港閒暇的情境，其實都十分 surreal。單單見見親人、親戚、教會弟兄姊妹、朋友，都去了三份之二時間 (原來兩口子的社交圈加起來可以頗大唷)；感覺有點像結婚擺酒當晚般 —— 開開心心的與到訪來賓「say hi」，忙到九彩，轉瞬間，已經要到門口握手送客了。剩下的三份一，都多花在「辦年貨」和吃喝玩樂上。

添置英國貴到無倫的物品，如 inkjet printer 紙和墨、母親大人的愛心海味等，準備郵寄，確保存貨夠用。吃喝玩樂方面，大致上都十分「留學生」，充滿「海外華僑 feel」，「港味」十足。美食巡禮、唱唱 K、逛逛一些「新」蒲點，如 apm，都是指定動作，如果問我是否真的 enjoy？我需要諗諗 ... ... 。好像有些事情，奇怪地，隨着每一次從英返港 (共兩次，去年復活節及今次)，都自自然然地漸漸少做了，甚至失去了興趣 (倪匡話齋，好像忽然覺得 quota 用完了似的)。例子有唱 K、消費、睇電視、出旺角、去銅鑼灣、揭雜誌等，不是絕對地嫌惡或興趣盡失，硬係好像少了一份往昔的「過癮」。K，只去過一次，都是唱回「史前」的歌，新的都不曉，完全不知 Solar、側田等新晉係乜水。感到自己最 out 的一刻，莫過於身旁的朋友都朗朗上口，「已選歌曲」列上所識的歌寥寥可數。嚴重的是，自己已感到毫不怯懦，闊佬懶理自己的 update 程度了，完全沒有心力去追。至於消費，更覺得自己越來越沒有盡康港市民的責任，沒有好好地去盡情消費去推動經濟。衫褲鞋襪，其實已經一無所缺，可能款式未必最潮，但為了自己輕鬆點，大早已奉行「隔幾代政策」，即不常常走在潮流最前，偶爾入件最新款，但隔一大輪才換款 (常應用貨種：手電、波鞋、Mac)。遍地蓋天的廣告，無孔不入的媒體，其實已經將康港人漸漸洗了腦，消費主義像信仰般，已在人們心中植根。「我究竟需要這服務麼？」「我究竟需要這貨品麼？」已被庸俗的價值觀掩蓋了 (嗰啲死人雜誌睇見都眼火爆！)。

一開學，就多多事要幹。先有轉科，後有排山倒海的 projects 和比賽，加上在港期間接了的 freelance，一時間要來個適應位。由這學期起，主修科從 illustration 轉去 design，原因無他，只想充實一些，productive 一些，做點 D&DA graphic briefs，修讀 typography。不少同學問及我轉科的原因，問是否不喜歡 illustration？其實不知多歡喜畫插畫和 image making，又自由，又可以藉圖像講自己想講的，不過，略嫌自己生性比較「悠」，如果繼續在 illustration department，恐怕會由「悠」變「懶」。加上，真的希望在這裏做些 graphic projects，雖則自己以前以 graphic 幹活了多年，但始終覺得所經歷的與這裏的不盡相同。

這個學期，開始仔細點想想前路，想想自己年半後完成此課程去向如何。五光十色喧爛奉行盆菜逼爆風格的家鄉，可有設計創作空間？留英搵工，自己可有本事嗎？