設計羊牯〔三〕

續《羊牯謬誤》... ...

五，「Design」=「設計」
這點謬誤，並非羊牯的專利，普羅大眾都往往在「Design」與「設計」之間劃上等號。有人會即時質問學子：「你又口出乜嘢狂言呀？！「Design」中文明明就係「設計」！做乜唔可以將之等同呢？」當然，查字典都知兩者的傳統關係，好多時候兩者的確互通，no doubt。想講的，不是那人所皆知的共通處，而是那因着東西文化之不同，詞語本身之極廣意解釋，所衍生出來的「灰色差異地帶」。

舉個例。羊牯們常常將「我要做 design，我要做 designer！」掛在口邊，究竟「designer」的中譯名是甚麼呢？「設計師」？「噢！唔敢當！我們那有『師級』咁巴閉？！」「設計員」？「設計人」？抑或「設計者」呢？可能以上種種都只不過是一些差不多的稱謂，沒必要太執著，總之，是「從事 design 的人」就是了。那麼，何謂「從事 design」呢？今時今日，從在 Microsoft Word 中弄兩行字，挑選一條從 Windows default font menu 中的 Arial 細明體，再加兩隻 clip art 公仔，到為整個國家定立國徽國旗 national identity，都可算是「從事 design」。可能有人會更正學子：「不！在 Word 中排吓字，揀吓 clip art，邊算做 design 呀！叫做「一般文識」或「手作仔」就差唔多！喺外國，如果用 Mac 機做吓稿仔，咪最多係 Artwork Artist 或 Mac Operator！咪攪到「designer」呢個字 cheap 晒至得㗎！學子！」Mmm mmm ... ... 如果真係有人咁矯正我，真係未敢苟同，因為咁講，會直接令萬千「基層 designers」「身價暴跌」「身心受創」的呢！他們會反擊道：「點解硬要分你我，分 design 唔 design 呢？做稿有乜問題？低級啲咩？唔係設計咩？Designer 好叻咩？大晒咩？」(下刪萬字 post war) ... ... 冇錯，在康港，只要那份工作有 0.1%「design」成份，人們都會稱之為「designer」或「設計員」，很少會用「Artwork Artist」或「Mac Operator」等字眼去形容一些技術性較高而創作性較低的專業。外國文化將工種細分為：Artwork Artist (正稿員)、Mac Operator (麥金塔操作員)、Junior Designer (初級設計員) ，業內洋人都清楚之間的分別，知道各崗位的功能和專業性，絕少出現「artworker 充 designer」「充 designer 的又愧不敢當」的畸怪局面。康港畸怪局面之出現，某程度是因為入得「設計學院」完成得「專業設計文憑課程」的，冇乜人會想立即做「正稿員」或「麥金塔操作員」，皆因這兩種職銜字面上都是沒有「設計」成份的，簡接地亦令到這兩種可以很專業的行業，變成羊牯們的次等選擇。求職廣告無人問津，最後只有苦了僱主。要知道，人性是有趣的。當名「初級設計員」，做「正稿員」和「麥金塔操作員」的工作，總比較心甘命抵呢！因此，在本地，「設計」之意思，因着國情，是比外地的「Design」更要廣，更富涵蓋性的啊！

一句本地求職招聘廣告常見的「willing to work overtime」，雖然係英語，但卻充滿本地「設計」文化特色呢！(外國的「design」工招聘就少見此精句了。可能此特殊「願望」未全球化吧。)

六，「點解冇人尊重我嘅專業？！」
咁，真係要問問該羊牯有乜「專業資格」了。又或者直頭問，在康港，設計行業是專業嗎？冇設計會死嗎？如果是專業如醫生的話 (羊牯最 hot 之比喻)，冇設計又會死，點解由細到大身邊親朋戚友，未見得他們有幫襯過 designer 或從事 design 專業呢？這是否意味着設計其實還是似「新興行業」多過一門深受大眾尊崇的專業呢？話說回來，如何衡量講以上說話的仁兄是如假包換的專業人仕呢？讀過「專業設計文憑課程」，有張沙紙？做咗設計好幾年？識用 Mac 機？有 sense？有 personal website？期期買 Wallpaper、IdN？蒲慣書得起、PageOne？HKDA member？有幾個獎喺手？... ... 好老實，縱使身懷 Master degree in design，加十年工作經驗，D&DA 金鉛筆，如果客戶或大眾要當你臭四的話，是不需要向我們作任何交代的，因為，很可惜，so far 仲未有一個億萬富豪係 designer 出身呢。更何況聽、寫、講、讀、諗都未掂的小羊牯？

曾幾何時，在一官辦學院的講座遇到本埠設計祖師石老先生，在 Q&A 的環節，學子問了一個有關設計行業 professionalism 的問題。石老笑了一笑，答了一個頗得體的答案，但試問當時在場的眾人，有幾多深明箇中無奈呢？

七，「照計，喺康港街見啲設計咁屎，應該好有發展同進步空間吖？！Designer 應該唔駛愁冇 job 做，冇發揮空間呢？」
這當然是正面不過的熱血想法，很多後浪都有類似雄心壯志。學子在這裏無意 discourage 任何有心人，因為自己亦正在探索中。但是，有以上雄心以外，究竟我們有否了解過恐怖港式設計背後，成因何在呢？

每年去看各院校的「畢業展」(graduate 亦代表着不同長短年期的課程呢。)，都會見到很多有創意的作品，如 modernized 的殯儀館 (很 surreal)、老字號新潮年輕化 (帶點 cheesy)、和一些設計人常常期望改善的「傳統醜陋習」。作為一題 design brief，可能好好玩，但如果作為一題 cultural studies 的課題，就麻麻地笑得出了。要知道，一個設計之所以差，不全是設計者的錯；相反，要做好一個設計，亦非設計者一人可以話晒事呢。忽視 context，後患無窮。

... ... ... ... ... ...

講咗羊牯們咁多壞話，有網友已經急不及待為羊牯們伸冤，為這群無助者請命了。其實學子又豈是完全冷血涼薄的呢？我清清楚楚了解到，被「坤」，都需要「坤人者」，才成事。無被坤者，何羊牯之有？

在《設計羊牯〔一〕》曾提到，很多現役切雞朋友都聲稱：「康港根本不適合設計師生活。」但既然做 design service 環境如此惡劣，客戶質素持續徘徊喺低至極低水平，同行們可有諗過前途問題，或其他門路呢？... ... 有！學子近年才驚覺，曙光就在「羊牯市場」中！

來個比喻。到神戶食神戶牛柳價錢誇張，不是人人付擔得起，但為了滿足本地食客對神戶牛柳之傾慕，大眾化連鎖食店都喜歡推出一些甚麼「大家鑊神戶牛柳套餐」，以最最最 affordable 的價錢，帶給食客「神戶風味」。對於以食為先的港人而言，當然知道那些所謂「神戶牛柳」，就算真的入口自神戶，都心知肚明地了解到一分錢一分貨的道理。花分文淺嘗，皆因想試試玩玩已矣，奈何本地氣候根本培養不到又靚又平的神戶牛柳嘛。他日，遇見日本人問及：「你有否嘗過我們的神戶牛柳㗎呢？」港人都會謙虛地答：「還未呢。」但不會覺得被大家鑊「坤」，全因 —— 識貨。但若果換轉一個唔識貨的，天真地一心以為「大家鑊神戶牛柳套餐」乃等同「到神戶食神戶牛柳」，大大聲答日本人：「我試過啦！一般啫！不過三十八蚊有埋嘢飲，都算抵！」那麼，當他發現真相時，就會有「被坤」的羊牯感覺了。

舉個實例。英國本土學生 (佢哋自己人) 報讀敦倫百年老校中央聖馬丁，一年學費約萬八蚊港紙 (政府補貼達八九成)，一年 foundation 加三年 degree 都不到八萬港幣學費。聽聞，康港有一官辦設計學院，與英倫中部一間大學合辦了一個 top-up degree，專為本土 high dip. 或有工作經驗之 dip. holder (我哋自己人) 報讀，為期一年 (扣除假期應該冇)。課程教授地點無他，就在該官辦學院位於火炭之校舍。連報名時的 registration fee，盛惠七萬港元。一個一年在港的學位課程可以學到多少，很在乎個別學子的能耐和眼界，但有一點可以肯定的 —— 在缺乏設計學位的康港，此 top-up degree 的確很有市場。至於值與否？有否有「坤」人成份？報讀者是否成了羊牯？就要視乎消費者如何看待那一紙證書和其大學生身份了。

... ... ... ... ... ...

後記。

開咗呢個題目先知死，原因唔係怕被人鬧或揭露自己的羊牯第一身經驗，而係「設計羊牯」呢個題目，實在大且闊，根本冇可能喺一個小小嘅 blog 度講晒所有心底話。這小小三篇短文，只是想帶出點點環境以外的一些人為因素，希望在呻同怨之中，在水深火熱的羊牯們可以想想自己的責任，與及，令自己身在水深火熱的遠因。我唔覺得有羊牯會有上述所有謬誤 (冇啩？！)，有一兩項則屬正常，畢竟我們都是在同一文化環境中成長的，但願大家動動腦，想想學子謬誤之中可有可取之處。可以鬧，但請 make sense 同認清楚學子只是提出問題，羊牯謬誤不是因學子而生的，拗贏我，又如何？羊牯依舊 (世代) 存在呢。

{{ : )

設計羊牯〔二〕

股壇中的羊牯，盲鐘鐘地人買我買，最後招致損手爛腳，多數都係衰貪心 (貪錢)。相信應該唔會有股壇羊牯因為覺得玩股票「好有型」，繼而以玩股炒孖展作為人生至高志願，闖盪一番。又或者，眼見外國玩股票的玩得很 pro，渴望自己一試，兼且暗自冀盼他日成為「明星級股壇大師」，光宗耀祖。設計羊牯的受害遠因，則相對地較為清高，甚至祟高和浪漫 (帶少少無邪) 得多了。羊牯們都多因着對 art、design 或潮流懷有各種熱情而全情投入，很少放庸俗的錢財為第一追求目標 (當然這亦是其一缺失)。最大的入局誘因，都是浪漫而略帶點點不切實際的，例如：「以設計為職業，好型！」「我愛諗嘢，諗 creative 嘢，所以設計！」「我想改變呢個世界」「刻板的工作 is not my cup of tea」「我讀書唔得，但我很 talented！」「我愛接受挑戰」「康港在設計上可進步的空間太多了，好設計很有市場」「當名設計師是我的志願」... ... 等等。設計呢一科，好似天賦地有種莫名的吸引力般，可以長青地惑導萬千年青人為它死為它狂，甘願冒着眼前的濃霧，也要奮不顧身地去闖過去。

不論在股壇或藝壇，叫得做羊牯，當然有一些共通點。最令他們最終招致損失的，莫過於兩個字 —— 無知。對身處的環境，整個 context 的無知；對自己無知；對自己要 practise 的科目無知；對前路無知，總之，是一種入世未深、盲鐘鐘以己慾為中心的無知。這種無知，因着羊牯們的飯來張口、被動、懶惰、唔睇書、唔 research、眼光短淺、坐井觀天、大康港小國際的後天殘缺，自己會衍生出一籮籮的謬誤和丁蟹式邏輯，以完成其慘烈的「羊牯之路」！可能咁講大家會麻麻地明白究竟學子所指的是乜東東，好，就在此舉一些設計羊牯們常常引用的例子，好讓大家思考思考一下。(警告：以下謬誤和丁蟹式邏輯，很多其實都已經成為了市面上的金科玉律、民間智慧、甚至學院教條，所以可能會引起大家不滿或鼓譟，不過，緊記，這裏貴乎交流思考，所有文字都只有一個目的 —— 觸動大家的大腦神經！)

《羊牯謬誤》
一，「讀設計，邊間學校都一樣，最緊要夠自己！老師廢、同學廢、學校個 system 廢、設備廢都唔緊要，最緊要有心、有火！邊度都總會有嘢學嘅！正所謂『英雄莫問出處』『出於汚泥都可以不染』嘛！」
錯錯錯錯錯！首先 assume 自己係英雄同蓮花都係戇居的。有類似思維的羊牯，多數都係走投無路而又死要讀設計之輩。他們永遠唔會問好的學校收生標準係乜，而係以自己甩皮甩骨的籮底橙條件去嘗試睇吓可以 fit 入邊間所謂「學校」度。接受和合理化過往失敗，繼續走面前最闊最易行的路，牢牢奠定了日後艱苦的羊牯之路。(絕對贊成 aim higher，有崇高的理想，但唔該咪得個「講」字，齋發夢而又只等運到。)

二，「學/讀設計，齋有想法，得個噏字，冇技術，係冇用嘅！任你有幾好嘅 idea 都好，唔識做出來，或做出嚟唔 work，畢業後搵鬼請你咩？！」
表面睇，的確似足「真理」。不過睇真啲，對照一下以此「真理」教出來的「人材」，這正正係令康港設計人冇腦、齋玩 visual、冇創見、冇立場、手強過腦的主要原因。在講以上對白之前，其實羊牯們已經某程度假定了，學技術嘢所需精神和體力係遠比學創意思維為多的。創意在缺乏創意傳統的環境，是一種抽象至極，難以衡量的東西；但講到技術，人人皆知 —— 冇佢搵唔到工！久而久之，人人都將腦部訓練、大膽創新為其次的東西，又或者，「唓！要諗創新嘢，有幾難吖！Maya、ActionScript、CS2 等等技術，唔識就真係唔識㗎啦喎！」平衡難攞，大家唯有取其一 (相反，就只有諗頭，做同表達都唔曉)。「學好技術先，才可自如地實踐好理念」係假的，因為技術呢家嘢係永永遠遠無休止的。到精通一切技術時，是一名 technician，不是富創意的設計者。

三，「邊度有得讀 design？邊度有 freelance 做？邊度請緊人？邊度有 part-time 報？邊度 ... ...」
世上冇 stupid question 呢回事，唔知就問，好自然，不應理會別人，最終得到答案，得益永遠係自己。不過！！！由於羊牯都是接受填鴨教育的，其自發性、主動自學能力、獨立思考、批判思想，經過超過十年的洗煉，大多所剩無幾。這種殘缺，在設計領域裏 (其他學科亦然)，實屬嚴重傷殘，好比癱了。好老實，以上問題，就算有人提供一個答案給你，都只不過是那位仁兄的答案 (多數係最大路的答案)，而非人人適合，特別是那不甘於活在別人思想下的人 (這種人最有 potential 脫離羊牯行列)。人人只活一次，自己不去好好自主地活自己條命，自甘成為跟風的羊牯，最後，可以怨誰呢？

四，「做吓免費 job，攞啲經驗，儲吓 portfolio，實在係初哥們必經之階段，捱吓啦，細佬。」
咁就要睇吓嗰份係乜 job，同自己有乜 quali 啦！很多教設計的和老闆們，都以以上「真理」教導羊牯們，學子覺得有啲古怪！首先，呢種態度同做法，其實傳統嚟講真係屬於正常不過的事，新嚟新豬肉，作為新人當然要蝕底少少。可惜，科技進步，電腦出現，社會經濟亦環境不同了，行業裏的 junior 職位已漸漸消失得無影無踪，從前的執頭執尾，今日已經要懂九十幾種 softwares，productive 到可以做「真嘢」。那麼，試問都不是甚麼擔水學徒，每日返工已經係幫公司賺緊錢，還有何理據提供免費服務呢？再者，市面上有不少偽設計公司，專搵羊牯笨，以提供賺取工作經驗機會為名，敲詐為實，令羊牯們金錢青春兩失。時代已變，再以此答案回應初哥，理由恐怕因為有人是既得利益者呢。

... ... ... ... ... ...

太長氣。

待續。

設計羊牯〔一〕

我們都是「設計羊牯」，分別在於程度，與及，還是現役或已經學精。

... ... ... ... ... ...

上一篇 blog，在兩三星期前，臨出門口去機場前往意大利之前幾個鐘頭寫的，講到「HKDI 撈稿比賽」。久休過後，好應該繼續說下去。

有網友話前文好攪笑，笑到碌地；有的話略為誇張，但道出康港切雞工業之百態；有的很歡喜碗飯，難道因為它很有代表性？有的讚學子的「創作」過程，有板有眼，很「不康港」；... ... 沉默的，可能有其他想法。可能會覺得學子超無聊，食飽飯，冇得屙，以恥笑人家為樂，品味低俗，冇品。又或者，覺得學子不了解「國情」，硬要抽稱康港設計教育，蛋裏挑骨，打擊一眾師生信心，唱衰康港，妖言惑眾。

其實，類似「教育」跟「無限Q」都一樣，任你覺得佢哋辦學、經營有問題，對行業和社會有負面影響；說到底，佢哋都係在自由市場下的一種營商方式，不是殺人放火，打家劫舍，根本沒有甚麼好譴責。話佢哋質素低，掛羊頭賣狗肉麼？有人願打，有人願捱，公平不過的交易。再諗深一層，其實有很多很多人靠此為生的。為提升一個行業的水平，同時卻另該行業絕大部份從業失業？很矛盾、很諷刺吧！

... ... ... ... ... ...

入行冇十年都有八年，一直都對任何有關設計的人、事、物都感興趣 (有些還好像跟設計無直接關係的，如：政治、宗教)。曾經跟不同的人都有傾談過有關設計的種種，特別是行內的前輩、同輩和後浪們。話題都離不開一些心得分享、行情、心態、計劃、憧憬。但最受歡迎和最熱門的話題，總是「呻」和「怨」，一個又一個灰色的 dialog boxes，長傾長有，恰如港府的蝦碌笑料。學子一向覺得「呻」和「怨」是有其舒緩和揭露現況的作用的，不是 100% 的負面。遇着一個好的聆聽者，呻者和怨者都會感到一份安慰。

不斷地搜尋業內外的資料，目的都是想了解自己身處的，究竟是一撻乜嘢地方？為何身邊的同僚都這樣灰？離開的離開，妥協的妥協。只有我們的康港是這樣嗎？外國的月亮特別圓？！不是月是故鄉明嗎？... ... 慢慢問號出現了 ... ... 一個很少很少初哥會問，而老手問又好似太遲的問題 —— 康港究竟適合設計師工作及成長嗎？

康港政府成日話想吸引外地創意人才來港發展，計我話，本地的唔走已經偷笑吧！... ... 偏偏，單單看官府及所有公開場合和媒體，都絕少會有唱淡的調子。甚麼願景、展望、不久將來、北望神州、康港優勢、資訊發達 ... ... 一切一切都好像對我們的行業利好到震。但，不知為何，近年，實在越來越多身邊人道出反其道的「真心話」來：「康港根本不適合設計師生活的。」斬釘截鐵得令人答不上去。... ... 停頓片刻，腦袋開始問：「咁即係點呀？」雖然，都已經不是甚麼如夢初醒，到今時今日至知，但，難道這就是「殘酷的現實」？！定抑或，身邊人都不夠客觀，還需繼續 research？！

當然，都有不少成功例子曾經勉勵過學子，不用太灰，稱：「康港細有細好，若你能做出好東西，人們很容易會知道的。」「歐洲的經濟平如水平，中國卻是 90 度向上呢！」這絲絲的正面，能把灰色溝白少少嗎？

... ... ... ... ... ...

「設計羊牯」一詞，泛指一些因喜愛、貪戀、誤解設計 (人、事、物、地方) ，而受騙、被誤導、導致投資錯誤而最終蒙受金錢、青春、精神損失的人。

待續。