亞冧泥

亞冧泥，「alumni」之港式讀法，一般解作「校友」。但在教育商業化之下，亞冧泥，漸漸變成康港各院校在宣傳攻勢中的「光輝往績」、「成功產品」、「信心保証」、「幫襯咗我哋你第時就會變成佢哋咁成功㗎啦」；對於目標客仔（準學生）而言，亞冧泥，是一個「可見的希望」，形式等同減肥瘦身整容廣告中的成功個案，雖然有時有點兒超現實，但有版你睇，個心始終定啲，（家長）花錢（囝囝囡囡）花時間都好似有啲目標。縱使大家都知道那並非一個承諾。


四方帽乃畢業生之比喻，並不代表係亞冧泥都帶過。

亞冧泥，對於講求「噚日仲係學生，今日已經返得工」嘅「踏實」課程嚟講，更加重要。在剛剛過去嘅各大中細型設計畢業展中，見到過千設計界新血離開學校投入社會，仿如亂石投向森林，你永遠唔知那一顆石會擊中鳥，那一顆會中樹，那一顆會落空。一年過千，十年過萬，當中總唔會全數落空。「一石二鳥」者固然要大造文章，歌頌其母校功德；就算「擊中樹」的都大可以當作「奮鬥中」個案，大談其心路歷程及分享經驗。總之，大原則係，positive thinking，隱惡揚善。

有啲亞冧泥熟口熟面，算叫做有啲知名度，做代言人理所當然；有啲卻「都唔知佢係乜水」，履歷一般，叫座力說服力皆欠奉。為甚麼搵寂寂無名校友做亞冧泥？原因無他，客觀的成功例子來來去去都係得嗰幾丁，很有限，而且發跡唔係喺九十年代好景時，就係喺外國，唔夠貼近目標客仔背景，難 sell 矣。所以，土炮年輕才俊亞冧泥特別渴市。業界需要明星，市場需要人板，招生需要亞冧泥。因此，好似塑造唔夠高嘅0靚妹做0靚模咁，精挑細選一啲有賣點嘅，一於有樣賣樣，有胸賣胸。

葉展才，廿八歲，任職品牌公司五年，曾參與大型品牌包裝項目，有洗頭水、牙膏等。「我相信，要做到好設計，必先了解客戶和消費者需要。」

Doris Hung，從事廣告客戶服務多年，三年前到上海發展，親身體會祖國經濟飛快的發展。參與案子曾獲多個國際獎項。「香港人返國內發展仍大勢所趨，同學們應好好裝備自己迎接新挑戰。」

Apple Lau，去年英國彌敦郡海外一年制設計（榮譽）學士二級榮譽畢業，並贏得青年才俊設計師大賞，獲得廿五萬港圓獎金。現在是一名自由創作人。「設計就是生活。」

潘小恩，Punkie，多媒體創作人，畢業後與同學成立 P&K 數碼工作室，憑着天馬行空的創意去年贏得香港設計師協會兩個獎項。今年初更獲藝術發展局資助，出版個人畫作《我有 Say》。「學校的老師的確啟發了我，我不單學會了理論，更懂得實踐。衷心多謝學校！」

履歷無需太標青，穩打穩扎就夠，平凡中帶點不平凡最好，例如攞過獎。可能有人細閱過一啲亞冧泥履歷後，會咁講：「唓！有乜咁巴閉呀？佢哋只不過係普通業內從業員，發唔到圍又餓唔死嗰種咋喎！唔算係啲乜嘢堅人、成功校友喎？！」唉，今時今日，撈設計，有碗飽飯食吓已屬難得，咪咁心頭高啦！0靚模嚟咋，你估 Kate Moss 呀？！

鬼叫教育制度和業界市況先天殘障，導致蜀中無大將，海上無魚咩！？

風水 (設計) 師 [下]

案件點滴：兩度設計華懋商標

陳振聰昨指龔如心曾想將振業興隆堂商標，作為華懋集團標誌，並向陳解釋此舉因為「我要用我老公間公司嘅標誌」。但陳怕有學員認出商標來源惹來麻煩，遂親自動手設計。但該奇特設計最後被打入冷宮，放在華懋某個商場內。
華懋集團標誌樣式與振業興隆堂的商標甚相似。陳解釋， 93年中按龔如心要求，盡力設計華懋標誌。後來，他完成設計，龔堅持「振業興隆堂係我老公間公司，我要用我老公間公司嘅標誌」。於是陳交出一個較接近振業興隆堂商標設計，為龔所接納。

華懋大狀駱應淦質疑，陳最初設計的標誌下，有 400多字註解，均非日常用詞，反而近似法術詞語，例如「根據二儀生四象之兆而成」、「故其好運是承天之兆開地之運與生命之努力和爭鬥結合而成」。陳辯稱文章由父親陳汝楠代撰，是講哲學及人生。

轉載自 2009年6月27日《蘋果日報》

上圖是陳振聰設計的華懋商標，下圖為華懋現所用商標。

每一個設計背後，都有一個故事。好設計，有它人人傳頌的故事。衰鬼設計，背後故事更引人入勝。

看畢報導，有「可鄰天下設計者」之感。 小甜甜（老細）想將陳氏公司（某某公司）撈稿硬生生地變為華懋集團（自己公司）標誌，原因 ——「我要用我老公間公司嘅標誌」（或其他難明奇想）。陳振聰以非專業設計師身份洞悉老細概念盲點，並評估風險 ——「怕有學員認出商標來源惹來麻煩」。Design problem 由始而生。

好一個 natural-born-designer，知道老細站在崖邊，故來個「奇特」反建議（我覺得奇唔奇特見仁見智囉）。可惜，建議無故被 ban 「被打入冷宮」，相信呢個時候，陳氏應該慶幸自己正職係風水師，而唔係真係設計師。之後，陳氏汲取之前失敗的經驗再「按龔如心要求，盡力設計華懋標誌」，這種竭盡所能、效忠老細、對設計之熱誠，實在值得自稱專業的設計從業學習。

但老細始終係腦細，理性不來的，一切決定，有時可以與設計本身或 presentation skills 全無關係的（就算你係佢老公）。唉，陳生呀陳生，其實小甜甜一開始咪 brief 咗你：「振業興隆堂係我老公間公司，我要用我老公間公司嘅標誌」㗎囉！一樣咪一樣囉！肉酸咪肉酸囉！學員認出咪認出囉！怕惹來麻煩？！麻煩得過得罪自己老細？！關乎幾廿億生意呀！到最後，畀錢嗰個話事，設計者堅持永遠堅不過老細堅持，始終要就範。「陳交出一個較接近振業興隆堂商標設計，為龔所接納」，典型折腰設計者下場。

講番少少 presentation skills 問題。報導講，「華懋大狀駱應淦質疑，陳最初設計的標誌下，有 400多字註解，均非日常用詞，反而近似法術詞語」。明願地，駱大狀少去 design exhibition。玄妙設計註解在本土其實很常見，「近似法術詞語」或似詩詞歌賦亦偶有，甚至多過四百字冗長不堪排得亂糟糟的都有。大狀，你唔知㗎啦，越難明，有時越賣得，越能建立崇高專業地位唷！設計，有時都可以是一種迷信呢！

... ... ... ... ...

呢則衰鬼設計故事，好比伊索寓言，內容寫實，絕非個別事件，警世寓意豐富！
1. 客戶與設計者的關係，可以很多面。
2. 客戶揀設計者，可以與 CV 無關。
3. 設計，原來係「獻殷勤」的一種。
4.有些客戶，真係「見過至會 buy」。
5. 有錢又 bad taste 嘅康港人好多。有錢 ≠ 有 taste。
6. 設計，是哲學及人生。
7. 深奧註解都有唔 work 嘅時候。
8. 真係人人都識做設計。
9. 設計，都係「剪剪貼貼出嚟」矣~（朋友提供）
10. 能滿足客戶需要，就係專業。

... ... ... ... ...

祝本年畢業的數千名設計學生及數萬名設計從業好運！（尤其做「branding」嗰啲）