《我都做得到》之撈稿比賽
早前在敝 blog 曾經提及過，有一所快將成立的康港設計學院，全球懸紅美金一萬元，徵求撈稿乙個，震撼整個設計界。據知，學子都有幾位來自五湖四海的書友仔意圖出錢 (郵費) 又出力去支持是次國際盛事。學子當初思想負面，一心看淡類似 PR 式比賽，再加上功課繁忙，因而沒有花費任何精力於此千載難逢的大顯身手好機會。但當朋友告知，到現時為止，距 deadline 還只剩下幾天的階段，參加人數仍寥寥無幾；於是乎，學子決定動動個豬腦，諗吓點樣為康港的未來作出點滴貢獻！
可惜，之前安排了兩週的歐遊，明天出發，所以恐怕未能及時又出錢 (勁貴郵費) 又出力地去遞交作品予當局 (職訓局)。不過，學子乜都冇，「心」就點都有一個！一於將我嘅滿腹大計，供諸眾覽，如果呢度有任何有心人想攞去參賽，無任歡迎。贏咗的話，留言道謝便好了！
... ... ... ... ... ...
正題。
跟朋友傾此 project，原來都有不少同道有嘗試過諗吓 idea，但諗兩諗，sketch 兩 sketch，便半途落馬。有一位的原因都算騎呢：「諗咗兩嘢，諗住落筆 ... ，但一諗到要估班友仔愛乜時，就反胃，唔想再做落去。咪 give up 咗囉！」哈哈，真係難為了同道。這亦道出了，此 brief 之艱鉅弔詭之處。
在港工作過或現役之切雞屍，有少少經驗，都會意識到要揣摩客戶喜好，並非易事；更何況今次比賽之評審單位，乃業內和業外之 fusion 呢？縱使四位男仕都有 branding 經驗，但仍需着眼女執行幹事之慧眼哦！再者，在康港，VTC 開辦得設計學院，必定要在「實際」與「藝術」之間取得平衡，否則，太「實際」，就會同舊史 TI 或家陣 IVE 冇分別；太「藝術」呢？咪棧叫啲畢業生出嚟乞米！弔詭成咁？！你話係咪難攪？... ... 不過究竟為乜要另起爐灶，或改頭換面，在 IVE、Poly、城大、浸大、及其他一眾私校之外，再重重疊疊地多起一所「設計學院」，就真係不得而知了。有時，做設計的，做就做！問太多，可以已超越「切雞屍之工作範圍」了。
... ... ... ... ... ...
做設計，首先不可缺的，就係睇清楚張 brief！唔跟 brief 或者跟錯 brief 做嘢，係唔 pro 的表現 (冇 brief 另計)。睇睇個 brief，先觀察其設計語言，嘗試解構一下比賽內裏深層的要求。首先，英文、簡化字並用，一睇便知此機構不太歡喜正體字，原因不明 (份稿可能喺內地砌的)。又未到 08 年，聯合國廢正體字都未 launch，就急急腳用簡體，校方一係很愛祖國，一係想對準國內、新加坡、馬拉華人市場 (冇台灣同康港份)，睇嚟兩者皆大有可能。英文方面，全用冇腳字 (Sans Serif)，又起用多位外藉評判，睇嚟西方現代設計之概念和教學思維均影響着院校的取向 (好表面咁睇)。唔 ... ... 呢幾點要好好留意。
仔細閱讀過張 brief 之內容後，發覺有不少「弔詭位」。
Vision --- The Hong Kong Design Institute aims to be a leading design institution providing quality education to cultivate knowledge, professionalism and new talents for the evolving global creative industries.
About HKDI --- ... ... The purpose is to foster a synergy within the design disciplines and to further build a creative and dynamic teaching and learning environment, adding value to the services and opportunities to students so as to meet of the region's commercial and industrial infrastructure.(真係麻鬼煩，唔用 real text，等我 select 唔到，copy 唔到，paste 唔到！要打餐死！) Vision 嗰頭話「for the evolving global creative industries」，About HKDI 就講「to meet of the region's commercial and industrial infrastructure」，咁究竟學院的最終產物 (畢業生) 所瞄準的，是環球創意工業市堨，定抑或 local 地區商業到爆的勞動工業市場呢？HKDI 畢業，可以去敦倫搵工嗎？
About HKDI --- The Vocational Training Council (VTC) is Hong Kong's biggest vocational education and training institution which provides job related training and education at the sub-degree level to 160,000 people every year ... ... bla bla bla講到明係「sub-degree level」，咁想問問 Vision 所講「to be a leading design institution ... ... for the evolving global creative industries」，HKDI 的競爭對手是誰呢？degree level 定同級的 sub-degree level 呢？如果係 sub-degree，咁係本土的還是世界各地的呢？不會是去年眾 IVE 教職員「歐洲考察」所觀光的那幾所名牌大學吧？！... ... 「provides job related training and education」，又想問問，如果本地業界千瘡百孔，現役從業都叫苦連天，冇啖好食，創意氧氣稀薄難頂，街見大 job 令人慘不忍睹，那麼，這裏所指的「job」，究竟係乜「job」先？「無限 Q」算唔算先？
唉，資質差就資質差，語文水皮就水皮，俾啲「弔詭位」攪到暈咁濟。都係唔理咁多，一於 —— 做！
... ... ... ... ... ...
首先，學子會 step by step 解釋一下個 idea 的 development，等評審知道整個設計過程是理性的，並非一般流嘢，天馬行空無厘頭之輩！
Arial！一定要用 Arial，千祈咪用 Helvetica，因為 Arial 代表實用、PC、大眾化、方便易入口，甚至 modern (起碼後生過 Helvetica)。由英文全名出發，因為英文字母較中文方塊字來得 geometrical， 是 create 一個撈稿的好開始，同時配合校方西化作風。(串錯少少字唔緊要，IVE 教學麻麻地着重的，佢哋會諒解切雞人的語文水平。最怕係，你學唔曉「基本搵食技倆」啫！)
縮寫，簡化長寫，令人較易記得。君街見甚麼「偉強設計公司」，都多會用「WK」做其撈稿，便知此仍人人都明之設計語言。溝通，communication，是視覺設計不可或缺的唷！
先將「HK」移開，容後再處理。剩下「DI」，跟舊史「TI」發音近似，易令人記起舊日「TI」敎育之信心保證！「I」永遠要保留，因「TI」、「IVE」都有「I」，要 consistent。「I」又代表「我」，又代表「人」，「以人為本」嘛！(咪話老套 cliché 呀，不知幾多人 buy！)
「D」要大，因「Design」一字乃所有 design school 之重心賣點。受眾輕則一見該字雙眼發光，重則 —— 即時科水報名！
將「I」字靠近「大D」，另圖形緊扣，bold 啲。撈稿，最緊要夠 bold。現在，「D」跟「I」合起來，成了一隻凌空放側了的「飯碗」，寓意「理想與現實之平衡」，這不就是萬千切雞屍的終極願望嗎？
不過，可惜。世事豈能盡如人意。Balance 係要去攞去爭取的；但現實又怎能容許一隻「凌空放側了的飯碗」呢？
A 與 B 之間，選其一。「理想」與「現實」，「肚餓」與「有飯食」。「口擘擘」定「笑笑口」？！
話明職業訓練嘛！有飯食先可以談創意，講設計嘛。
康港景！還有甚麼比一景繁榮之維港更能體現回歸後的利好經濟創意願景呢？
字最好齊頭尾，justified，咁至夠整齊，夠「design」嘛。色彩方面，見議不同科目用不同顏色代表 (客戶 favourite，my favourite！)。
In case，modern approach 唔啱口胃，此乃 option B。(無客唔歡喜選擇嘅！)
... ... ... ... ... ...
如果以上兩個 designs 都鍾意，但又想取兩者精華，來個 option C，可以用 blend tool 來過「In Between」。萬一一個「In Between」唔夠喉，Adobe Illustrator 可以調校 step 之數量，想似啲 option A 又得，似啲 option B 亦得，得咗！
中間那個便是。可能看似抽象，無甚意思，但老實講，好多時「In Between」都係冇意思㗎啦！
posted by 學子 @ 8:24 am
9 comments
