設計三聚氰安
設計，最緊要有 concept！冇 concept 再靚都假！最最最緊要係，冇 concept 根本好難 sell，sell 唔到個客，等於垃圾，毫無價值。
Brief，要跟，要服從，不可質疑，嚴禁挑戰。客戶已簽收的 brief 是「至高法律文件」，等同聖旨，是不會有誤有瑕疵的。Brief 要求乜就乜：Dynamic 加 dynamic、穩建而帶有激情、國際化之如要有本土特式、要表達品牌的輻射性(?!)、要單看標誌就 get 到晒成個 story(唔見腸唔算係公仔)、要獨特(最好人類歷史上從未見過)、中文唔可以太大或過少(過大太 local，過細政治唔正確)... ... 不過！不過！唔駛太驚，因為大家都明白一個設計好難包含晒所有嘢，但記住，就算未能滿足晒所有人(但至少都要滿足大部份人)，個設計都要做到「無可指責」。「無可指責」，唔係完美嗰種「無得彈」，而係中中庸庸OOKK穩穩陣陣嗰隻「無乜嘢可以彈」。
遇着大腦便秘，腦海一片空白，惗唔到 concept，就要用方法嘞。首先，當然係要深入了解個 brief，解讀每一字每一詞，揣摩客戶的心意。之後，我通常會去書局揭書。揭書，要有目的，千萬不要萬無目標，惗住個 brief，揭呀揭，一見到啱駛 visual 就 mark 低佢。若有必要，就買番公司「參考」。(記住：去書局而冇買書，等於冇去過或未盡力，難以交差)
到書局揭書買書都惗唔到 concept，可以出絕招。
做 logo，枱放幾本《Logo Lounge》，邊揭邊睇邊 sketch，有啱駛 visual 就 mark 低佢，有 reference 個設計就「有根有據」，sell 都易 sell 啲。
做書，就要參考《Layout 大全》或《一萬種 Editorial Design》或《Magazine Design Annual》之類的書，邊揭邊睇邊 sketch，有啱駛 style 或 grid system 就 mark 低佢，務求搵到合適的「look & feel」，有 reference 個 layout 就「有根有據」，sell 都易 sell 啲。
做海報，就參考吓啲大師作品或《1000000 Type treatment》，睇吓人哋點處理啲文字圖像，唔係叫你抄，但睇到有啱駛嘅 visual treatment 就 mark 低佢，present 嘅時候攞出嚟 side by side 一齊睇，咁個 design 先至夠實淨！sell 都易 sell 啲。
做 web，就梗係睇《1001 Coolest Websites》啦，睇吓啲「look & feel」同個 trend，唔係叫你跟 trend 唔用腦，但睇到有啱駛嘅 effect 就 mark 低佢，轉一轉改一改，捉住個神髓，咪得囉！咪易 sell 囉！
得閒就買多啲《設計年鑑》、《十萬個咭片設計》、《經典色版大全》、《大中華企業標誌概覽》、《Graphic Design Cookbook》、《花紋圖案全集(連CD-ROM)》、《Creative Review》、《Design Week》等等放喺公司，包保對惗 concept idea 有莫大裨益！
我一直到係咁做設計，只要一坐低，邊揭邊 sketch，一陣間我就可以 sketch 出一大堆 ideas！唔係誇張，二三百個閒閒地！
蛋白質唔夠，有三聚氰安，就可以「過骨」。
料子唔夠，有「抄考書」，亦得。得咗。
posted by 學子 @ 7:23 pm
8 comments
