The Design School Code

據探子回報，剛出爐的 HKDI 撈稿設計比賽冠軍作品，設計者是來自中歐的一個小國 —— 丹麥。自比賽結果公佈後，網上不斷有網民就該神秘撈稿的意思喋喋不休地討論着。究竟那古怪符號背後有何玄機？究竟它是否代表着「真、善、美」的「善」，定還是「真、善、忍」的「善」？「善」與「差」又相差多遠？... ... 這一切一切，我想，應該最好由作者自己以第一身解釋為可信。可惜，HKDI 撈稿比賽的官方網頁，至今仍像被黑客入侵般毫無 update 的動靜。學子唯有靠線眼，深入不毛之地，搜羅有關冠軍撈稿的官方解說文稿！

登 ... 登 ... 登 ... 櫈！

Design concept

The intention was to create a visually strong, long lasting and unique symbol to illustrate the leadership of the HKDI.

The logo is an anagram of “HKDI” combining the western and eastern design traditions utilizing the letterforms to achieve a resemblance to an oriental symbol. A special corporate font further defines the visual identity giving it an original look.

咦？！睇嚟，除咗個「visually strong, long lasting and unique symbol」之外，冇乜其他較明鮮明嘅 idea/concept 喎？！照咁睇 ... ... 所謂「善」意之說，都應該係評判「一廂情願」嘅個人聯想而已，原創者根本冇類似嘅諗法，甚至可能根本對中文字義及形態一竅不通！莫非呢啲就叫做「盲拳」？

本 blog，為咗滿足個人 (或大家) 嘅求知慾同好奇心，嘗試解開呢個對今後康港設計教育界有深遠影嚮，神秘詭異嘅撈稿面紗。

去片。

對於個撈稿，各人可以有以下可能嘅聯想 ... ...


好嘅聯想，可以有「善」、「美」、「羡」。衰嘅呢？有羞家嘅「羞」、差勁嘅「差」、普通嘅「普」、朱錦春嘅「春」、夠薑嘅「薑」... ... Ooops，夠薑係好嘢嚟嘅！sorry！(有網民仲話 rotate 180度後似個「奠」字，嘩，仲 mean 過我！)


半無里頭或無里頭嘅聯想，可以有以上各種。除「美工」有台灣 feel，「人仔標誌」有錢途 feel 之外，其他都係「豆」、「夭」、「王」、「壬」、「丟」、「旦」、「大」等虛字，無乜意思。當然，可以搵個寫手，作番一千幾百字解說吹下水，自圓其說一下，但作為一間高等嘅設計學府，好似有啲難以服眾吧。不求甚解，應該唔會係 HKDI 嘅學術態度嘛 ~~~

... ... ... ... ... ...

身為母語係中文嘅炎黃子孫，攪 design school，攪嘜頭設計比賽，俾個老外玩中文字獲勝，真冇顏面 (公平啲講，中文人應該唔會整個「奠」字出嚟做撈稿，不過，慘得過有中文人 buy，仲話係「善」呢)。更甚係，奇就奇在，點解老外曉用中文元素，而其餘四位優異獎得主，卻有「去中國化」嘅企圖或取向呢？莫非康港人真係「無根」？莫非大家都覺得「西化就好啲、pro 啲、design 啲」？... ... 噢 ~~~ 勁叔見到實眼冤。

... ... ... ... ... ...

特稿！


內子見上文，突然提醒學子，原來早在數個月前，當學子創作「飯碗撈稿」時，她經已繪畫過上圖 (左) 的「HKDI anagram」予我品評。無巧不成話，竟然跟冠軍之作有九成九相似，concept 簡直一樣！所以話呢，設計呢家嘢，真係唔係切雞屍嘅專利。右圖為根據鄰 blog 朋友仔嘅幻想所撩嘅設計圖片 —— 魚骨、飯碗加雙筷，康港設計人，真係咁淒涼？

善哉 ... 善哉 ... ...

善哉。稱讚的感嘆辭。左傳，昭公十六年：「宣子曰：『善哉！子之言是。』」西遊記，第一回：「善哉！善哉！我等明日越嶺登山，廣尋些果品。」


冠軍作品。丹麥，Karsten SK Joldhoej。


四件入圍作品。(由上至下，全部港產) 周昭武、楊樹浩、高少康、黃炳培。

厚道啲講，冠軍作品都唔係咁得人驚。冇驚嚇亦冇驚喜。肆肆正正，齊頭齊尾，好有 HKDA 撈稿嘅保守作風。例牌有中國元素至安樂，足以令評判一見鍾情。今時今日，作為一個撈稿，可以「死黑死白」，忍得住唔用漸變，已經值得高興。樣樣做啱、計算準確、內有玄機、㗳落有啲嘢、中英文有玩間字，絕不欺場 ... ... 完全體現學院嘅實幹、均真、有前途、出路佳嘅宗旨，一百分！冇得頂！

但係，始終覺得自己嗰個設計比較合適，至少夠直接、坦白、straight to the point，冇嗰份自吹自擂嘅「偽善」。

撈稿有了，即管就放長雙眼睇下日後啲 applications 如何。

Old Brazil ! Old Ronaldo !

喺剛剛結束嘅最後一場 F 組小組賽，巴西對日本，下半場，旁述咁樣講：「Old Brazil ! Old Ronaldo !」

巴西係咪真係返晒嚟？！未係！朗拿度呢？！更加仲有排。但以 4:1 反勝先拔頭籌嘅日本，朗拿度唔郁唔郁都入到兩球，平咗歷史以來入波最多嘅決賽週射手 (十四球)，對森巴球迷而言，真係算係咁，好有安慰。(不過黃衫襯白褲白襪，真係幾肉酸。)

世盃開鑼以來，巴西整隊嘅表現，一直令人失望，被死敵阿根廷嘅「廿四傳金球」比了下來。連細哨 Ronaldinho 都被彈，一直態沉嘅朗拿度就更加唔駛講。但你真係咪理，話差話差，小組三賽全勝，只失一球，殺入第二圈。係，同組三隊都係麻麻球隊，以巴西嘅皇者地位，理應打出 Nike 日講夜講嘅「漂亮足球」至係，但我反而覺得巴西咁樣至似巴西。慢熱，加後防空位多，無啦啦俾人入波先，跟住先嚟料，反勝。當然，嚟緊第二圈，咁打發，好易玩完，但以小組 so far 嘅表現，巴西正在上力，包括期待以久嘅 Ronaldo。

真係多得巴西教練 Parreira 一直對大哨嘅「信任」，三場波俾佢場場打正選，今場仲踢足九十分鐘。好多球評人都話：「有冇攪錯，又肥又懶又慢，咁都放佢落場？！攪到巴西場場打十個！」事實證明，巴西係有意令呢位失色前鋒重拾信心的！前鋒呢個位置好奇怪，唔入開波，就一路冇波入，once 一有「士哥」，信心返番嚟，退色前鋒都可以光芒四射！點解我知？！因為我都係退緊色，好耐冇好表現嘅「重量級球員」(體重)。朗拿度可否重拾射門鞋，成為歷史以來入波最多嘅世界盃神射手？真係拭目以待。我就好有信心嘞！

仲有細哨，暫時仲係普通球員一名，巴塞嘅細哨仲未見影。卡卡，實而不華，可以再實啲，再華啲。羅賓奴，初中細路咁嘅樣，但超靈活，仲未有波入，但應該不遠矣。卡路士，兩世未見過佢罰球入波，希望佢咪霸住啲 chance。廸達，so far so good，最緊要班後衞生生性性。Overall 嚟講，都算 ok，下場對 Ghana，呢隊話自己係非洲巴西嘅人氣球隊，應該可以多少試到巴西嘅真正實力，係咪真係有料捧盃。

真係好鬼緊張！

圖片來自 FIFA 及 BBC 網頁

一歲

昨日，六月二十日，原來是敝 blog 一歲生日。

{{ : )

龍咁威 2

姑勿論我哋鍾唔鍾意成龍大哥 (複姓成龍，名大哥，共四字)，阿國際巨星都同我哋條「康港飛龍」(見下圖) 一樣，官方地代表住康港，係一個俾外國人睇嘅 icon。花咗近千萬公帑設計嘅「飛龍 campaign」，自幾年前 launch 咗到而家，雖然康港市民 (至少我) 仍然麻麻地知佢係乜，有乜用處，同 so far 有乜作為，但至少佢初頭都 make 到唔少 noise，引起過唔少「關注」，相比起董班子其他「堅嘢」，都算係咁嘞。

千萬金元巨型製作「康港飛龍」！


威威生猛「威爾斯體育飛龍 」！(1.5Mb PDF guidelines)

今日下晝，路過書室，揭一本 design 周刊時，忽然被一個圖像，勾起我萬千思鄉情懷。睇真，原來個圖像完全唔關康港事，係「威爾斯康體局」(Sports Council for Wales) 嘅撈稿至真！(見上圖) 吖 ~~~ 鬼整佢同我哋個「飛龍撈稿」咁鬼似！唔通政府俾成千萬，買咗件「A 貨」？！

經一輪網上調查，有驚人發現！原來條「威爾斯體育飛龍 」應該大約喺二零零五年至開始採用 (參照 guidlines 嘅日期)，而我哋條「康港飛龍」則遠於二零零一年五月十號已喺《財富》時代論壇搶閘推出，仲係「廣為大眾接受」咁話 (政府一講到設計就最「民主」)。咦？！照咁睇嚟，今次可能係人哋「參考」我哋喎！無論概念、造型、supporting graphics、龍嘅頭仔、眼仔、嘴仔，都成個餅印。嚇！呢次仲唔一吐一直以來《香港好相似設計》對康港抄襲風氣指控嘅烏氣！！！

可能有人會話：「嘩，我哋條飛龍咁鬼肉酸，班鬼佬咁都抄，唔係 fa？」哈哈，呢個世界就係咁無奇不有，更何況，審美呢家嘢真係好難講，如果「美」係有絕對定意或標準嘅話，就唔會有咁鬼多人睇到啲核鬼突減肥 ad，隆胸 ad，都舂個頭埋去貼錢整醜自己啦！


唔只遙遠嘅東方有條龍，原來遙遠嘅西方都有一條差唔多嘅。

一代老馮

先同馮姓嘅朋友 say say sorry，但真係諗唔到用其他形容詞去代替生動而傳神嘅「老馮」來形容某類人。

自己朋友唔算多，份人又唔算特別和善好人緣，但身邊有番咁上下交情嘅朋友絕大多數都良善得很，不乏大好人，我好享受當中嘅交心。有啲好友雖然唔係識咗好耐，未必經常見面，但一切心照，我好珍惜。有人話朋友係一面鏡，有乜朋友就某程度代表咗自己係邊類人，物以類聚。損友多，臭味相投，自己都唔慌係好人。當中有一類「朋友」，在知己良朋和損友以外。麻麻地熟，沒有半點情誼，冇交流，冇乜計傾，接觸純因為社交禮儀或一啲「工事」。邊類「朋友」？咪就係嗰種凡事以利益掛帥，為咗攞着數先講「友情」嘅菠蘿雞、老馮之輩也。

舊時讀設計，鄰座就有一位咁嘅菠蘿雞。Rubber Cement、masking tape、塗改液、間尺、顏色、marker、雲尺、紙、筆、腦 ... ... 乜 Q 都問人借！(當然梗係無得還嗰隻「借」) 大佬呀，借嘢俾同學無人會介意，但咪老馮吖！唔關長貧難顧事，問題係唔該唔好當人懵嘅。乜嘢係老馮攞着數，乜嘢係一時之急，大家有眼睇。真係唔明該女同學嘅面皮點解如此堅厚，靠幾分姿色咩？！又唔係好覺佢有吖？

自己唔算叻，但周不時都有朋友致電來問及有關設計嘅 technical 問題，我都好樂意以幫得就盡幫嘅心態去回答，因為自己都時有遇到同樣困境，好應該互相幫助。但日子久了，發覺有啲朋友，閒時電話飯局唔多見，一見親或通親電話，都係同「工事」有關，彼此關係就好似慢慢建立喺一問一答嘅層面上 ... ... 甚為冇癮。



俗語「菠蘿雞」泛指靠黐、愛佔人便宜嘅無恥之輩。此等人只顧自己利益，絕無顧及他人之基本人類本能意識。更甚者，更會當別人「阿四」，利用他人對自己的禮待，肆意地「盡舔」！總之別人一日禮貌地順意之，佢就一日駛到盡舔到盡！亳無唔好意思或客氣之意。主人家話：請當自己屋企，菠蘿雞便搏命地老馮不客氣！飲飲食食、自己顧自己、駛人唔駛本、當自己大帝、飯前等食、飯來張口、飯後即閃避執拾、人家出雞自己卻分毫不支，所謂朋友之間，只有單向利益輸送！去到尾，可能有一聲半聲虛偽答謝，但意義何在呢？想塞住別人把口，表現自己有修養？

節儉係美德，但闊佬自己孤寒人哋，就非常非常之令人討厭。免費嘅就一件不留，恩惠就要「舔」盡，略為倒轉就好似攞你命蝕晒底咁。作為一個心智正常嘅主人家，理應唔會下下機關算盡，施恩望報，但當發覺身邊嗰位原來係菠蘿雞，一直係度扮懵攞緊自己着數時，真係好有被人抽水之感！火都滾！

人，原來可以咁不知廉恥，咁厚面皮。可能有人會話呢啲人冇家教，但我就認為咁講太武斷，會鬧錯人家家長。理應成幾十歲人，出來社會做事冇十年都八年，無理由連最最最基本嘅待人接物都咁幼嫩，除咗個人修養，我諗唔到其他理由解釋如斯劣行。

... ... ... ... ... ...

世界上有啲人，無論讀書幾多，見聞幾多，搵錢幾多，吹到自己幾有品味幾有教養都好，只要稍為相處片刻，明眼人，不消兩嘢就知其原形，冇得呃。

細味 WC

自幼稚園起，有兩樣嘢，一直鍾情至今，熱愛程度有增無減。一，唔駛講，art & design 嘢。喺呢度，吹咗差不多成年 design 水，都樂此不疲，自得其樂，少啲癮都難以持續呢。幼稚園時唔知乜係 design (而家都有啲 confused)，愛用粉彩蠟筆畫畫畫，做勞作，唔知點解，感覺最滿足最享受；長大後，幸運地做咗相關嘅勞動工作，雖然辛苦，時而無癮，但仍愛無謂攪作，快樂創作！深信遼闊嘅創作天空非局限於康港扭曲了嘅 skyline 之上。二，足球，英式嗰隻！(唔覺得美球足球係 football) 但唔算係嗰種精通足運歷史、球員球會資料嘅隻「人肉足球 google」，足球知識層面長期停留喺常識階段。如果硬要喺睇波同踢波之間擇其一，一定揀踢波。雖然又唔係踢得好好，入乜乜物物青年軍或甲乙組嗰隻，但總之一個月冇波踢，雙腳一定痕 (二來係因為康港腳)。有時遇着天雨或颱風 (大家知啦，康港最興週未打風落雨)，攪到冇波踢，心情會 down 晒。幸好幾年前日本仔發明咗 Winning Eleven，腳痕時都有啲慰藉。



出世後第一個屋企，係舊式唐樓嘅板間房，當時好興一屋分租俾多個家庭，好鬼熱鬧。客廳與天井 (廚房) 之間，一間一間板間房湊成一條長長嘅走廊，一頭一尾當作龍門，一個 size 剛剛好嘅兒童室內足球埸就此形成！大賽通常係我同年長三歲嘅哥哥一隊，對高頭大馬嘅堂大佬。日常賽事則以我同哥哥單挑為主。因為同住嘅大伯父生前係 100% 足球狂熱份子，所以在他熏陶下，足球牢牢地注入了我嘅血液當中。

八六年世界盃算係懂性以來第一次知發生乜事嘅世界盃。嗰屆雖然係馬勒當拿玩晒，一「手」兩腳地令阿國奪取第二次冠軍，但兒時嘅我，卻對富藝術美感嘅森巴足球發生嚴重興趣，就如被森巴女郎迷倒一樣。而至愛、又支持得最耐嘅巴西球員，就係今屆首仗行行企企成粒鐘，最後被換出，只射過一腳波，賽後又話頭暈又盛，自己體型同佢越來越接近嘅「大哨」—— 朗拿度。係，雖然條友仔近年表現真係爭唔落，踢法由昔日喺巴塞嘅通場跑到今日嘅 ... ... 企，確實退色咗唔少，風頭更被「細哨」蓋過 (睇 Nike 啲 ad 就知)；但係佢嘅才華同 fit 嗰陣嘅表現，真係世間罕有，唔單只好波、擁有能人所不能嘅盤扭技術，最令人如癡如醉嘅係 ... ... 腳法實在太靚，太 creative 了！... ... 希望佢嘅巴塞年代返來，實在係奢望，但真係好想好想見番佢 ... ... 郁番多啲啲，勤力啲啲。



今屆世界盃，有幸喺英格蘭睇，氣氛熾熱非常。特別係英格蘭出戰時，睇見報章電視舖天蓋地咁話英格蘭今屆點勁點勁，甚麼自六六年攞唯一一次冠軍以來最勁嘅一代，真係不得不服咗佢哋嘅愛國情懷。對於成長於殖民地嘅我，類似嘅國家意識就真係冇咁強烈。

英國嘅免費電視台，BBC1 同 ITV1，聯合直播所有賽事，令呢項舉世觸目嘅盛事可以全民共享，窮人都有得睇。幾懷念康港以前同樣嘅直播方式，各電視台之間有競爭，觀眾又有選擇。好怕近幾屆康港啲直播節目，被收費電視台壟斷不特止，節目品味同取向簡直令人 (可能只屬小數) 慘不忍睹，攪到好似舞廰咁，又「世界妹」又甚麼「angel」，根本就係變種啤酒妹，喺度賣弄軟性色情！啲主持嘉賓，唔猥瑣嘅都唔請，一係就講埋啲賭波經，甚麼讓半球球半，間接宣揚賭波可以增加球賽觀賞刺激度，反之，足圈中人專業評論就買少見少 (阿叔又快要退休)，唉 ... ... 又一「凡事娛樂大眾化」嘅犧牲品。

英國嘅直播，BBC1 由連尼加 (Gary Lineker) 主持，夾三個球壇名宿嘉賓 (當中不乏世界盃前國腳)，共四條友仔，就係咁多！背景冇大龍大鳳，九彩佈置扮隆重，只係一個球場背景。主角永遠只係球賽本身，足球係焦點所在。點解節目中冇女？呢點真係唔知，可能係文化差異吧。(其實其他台有時有女主持，不過都係好端莊嗰隻)

到目前為止，今屆世盃，好波真係多的是。阿根廷喺對塞黑場波 (6:0)，demo 咗一次何謂強隊，何謂足球。南韓 2:1 反勝多哥，為東亞足球爭咗唔少光 (日本就 ... )。法國首仗和波！(我最開心) Kaka 救咗巴西。葡萄牙費高未老得晒，C 朗拿度繼續插花。英格蘭頭場悶蛋，第二場尾五分鐘似番啲樣，Rooney 復出，Gerrard 返番嚟。德國依然悶爆。... ... Adidas 對 Nike 漸露疲態，波衫 design 同概念個人覺得 Nike 略勝，特別嗰招 tailor-made typeface，因應不同國家傳統歷史背景 design 一隻字款用喺波衫上，突破且合理。雖然南韓同荷蘭嗰兩款數字麻麻地，有啲 off balance，但墨西哥嗰隻真係好正。Adidas 嘅老本依然食得唔錯，特別個 official 波波，尚保得住個一哥地位。

四年一度，持續一個月嘅連續劇，快要進入 second round，希望巴西生生性性，俾番啲顔色阿根廷睇。



早前友人告知，話德國當代殿堂級 graphic designer Erik Spiekermann，對世盃個嘜頭甚為不滿，丟晒架咁話。唉 ~~~ 唔係事後孔明，大師鬧我又鬧，其實最初見到呢個「笑哈哈 logo」，已覺佢騎呢，完全唔覺有德國傳統 graphic design 嘅質素。唔係話要下下四平八穩，入晒 grid 至夠德國，失望嘅係嗰份「冇信心」，嗰份「衰客 decision making 後遺症」，設計者嗰份「妥協」，出晒嚟。好認同 Spiekermann 帶出現時德國政治局面與設計之關係。環境、制度、涉及嘅人之多寡同質素跟完成品，無疑係有着天大嘅關係。我諗呢點，行家最感同身受。

騷一騷

終於捱過漫長的嚴冬。仲夏，敦倫熱起來有成卅度。一個學年亦快將結束。

六月八至十二日，在 Brick Lane 的 Studio 95，舉行了一個 second year show，參展者是百多名同學仔女 (當然包括學子)。

小展覽是 FreeRange *眾多畢展中的其中一個，比較特別的是，我們全部都尚未畢業，還有一年要拼搏。當初參展，同學們都想趁二年級，可以在沒有任何壓力下，騷一騷這兩年來的小成果，小試牛刀。展覧在昨日結束，相當圓滿。聽說，有近三萬人次到臨，展覽還被選為該星期的「最受歡迎展覧」呢。(雖則最受歡迎未必是最佳，但亦值得高興吧。)

作為一個設計展覧，今次的 second year show，未算得上很好看、很專業、很井井有條、很 informative、很有成效，但我實在享受這種粗糙，很「raw」的感覺，覺得很有味道。論地點，位置是在破舊的 Brick Lane，一條爛撻撻的小巷里。論場地，類似舊貨倉，沒半點華麗豪裝，有的只是空間和幾道 partition，有點兒汚糟，跟家鄉的會展和甚麼 design centre 甚麼畫廊，有着天淵之別 (就是鍾意敦倫的破舊)。論展品，除部份頗高水平的「完成品」外，多數是一些相對地還幼嫩、有少少甩皮甩骨之作，有些更是十分無聊，沒甚「用處」的隨心玩意；但可貴的是，大家都享受着那份自由和無拘無束，理得你死的創作拼勁。換轉在一些懶認真、眼角懶高、事事講求效益的地域，一定換來連番惡評。

「鋼琴 ink jet printer」、「無火煮食四頭爐燙畫」、「影印黑白沙龍」、「七色 crap work」(見圖) ... ... 有的是一些 project brief 的 solution，有的只是「just for fun」，未必是甚麼標榜 100% 原創，無人做過至可出街，一切，最緊要好玩。可能有些觀眾會認為：「吓？！咁都得？咁我都可以開個展覧啦！」... ... 有時覺得，創作，根本不是甚麼高雅品味玩意，或修讀藝術設計者的專利，有心有力唔係得把口的話，其實本來就是「我都做得到」。只是人們都被俗不可耐的環境荼毒至各項觀感觸覺都壞死了吧。變得毫無情趣、毫無幽默感、沒有了閒情逸致、表內一致地浮誇膚淺 ... ... 最可惜的是，沒有了自己。



記得，N 年前，在 T.I. 畢業那年，攪畢業展。驚覺位於九龍塘山卡啦的校舍禮堂面積太小，根本不夠容納所有同學的傑作，於是膽粗粗建議師長不如到外出另覓展場。不知道當年無知的自己是否「太多事」，竟換來一頓勸化：「學子 (化名)，你都係乖乖地唔好攪咁多嘢嘞，做好自己本分先啦。禮堂有乜唔好啫？！又免費又唔駛煩！歷年都係喺呢度攪㗎啦！有乜問題？」可能當年真係太前衛，太不懂世故，和太「不安於本分」**，膽敢以下犯上，勞駕師長們攪呢攪路。

今天，聽講，IVE 年年喺會展攪大龍鳳。

* FreeRange，聲稱是全歐洲最大型的免費入場 art & design 畢業聯展 (好似好巴閉咁)。
**  多得這份不安分，令我膽粗粗來了敦倫。

我愛怪誕城

巴塞遊後，只剩幾日準備全年 portfolio 去本年 final assessments，對於我這個「last minute king」，實在透不過氣來。

... ... ... ... ... ...

今次的巴塞遊，其實是一年一度的 study trip，去年的目的地是意國的佛羅倫斯。今年與往年在參加人數上有頗大的分別，去年有四十多名同學仔，今年只有十二丁，其中一名同學女還要是巴塞人，參加目的是為了巴塞的廉價印刷成本，準備其 portfolio。參加人數驟減，原因是因為在二年級，全年共一百七十多名都分散在不同的主修科裏，advertising、design、illustration，所以絕大部份書友都各有各忙，難以抽空去一處不少人已到過的鄰國名城。



巴塞羅拿，久仰其大名。對於自小就是一隻波牛的我，她是歷代頂級球星雲集地，馬勒當拿、羅馬里奧、朗拿度、朗拿癲佬等。最光輝的，都在這支西班牙勁旅身上閃耀過。學設計後，常常聽見身邊的朋友講及甚麼「鳩 di」(Gaudi) 那起極唔完的教堂、畢加索的不加思索、甚麼 Mies van der Rohe Barcelona Chair、甚麼西班牙炒飯 Paella、cutie 得嚟又 art 味十足的 Miró ... ... 等等，一直以來都渴望親身體會，朋友亦常常說着：「你一定要到 Barcelona 走走看看！」

上圖中白色的建築物是 MACBA，類似敦倫的 Tate Modern，不過體形較細，展品亦比較少。但建築本身甚具特色，展覽亦十分精彩。身處其中，自然光在縱橫交錯的白色現代建築結構中透出，氣溫、光線與視覺空間都予人舒爽的感覺，絕對沒有身處國貨公司的那份「半桶水文化業餘感」。


「怪」，是我在整個旅程中用得最頻密的形容詞 (當然因為詞窮)，特別是在 Gaudi 的作品中 —— La Sagrada Familia。細閱其原自自然的理念，再看其作品，真的不得不立時嘖嘖稱奇！如此理性的思考，卻衍生出這樣獨特奇怪非常的 outcome，實在嘆為觀止。在港睇樓花基建地盤睇得多，如此趣怪富歷史藝術文化價值的「地盤」，卻是第一次。(聽說該起了過百年的教堂最快要到二幾年至可能落成，希望無吹水吧。)


La Pedrera，是另一處會幫西班牙政府生金蛋的旅遊名勝，同是 Gaudi 手筆。咪睇間屋怪相無比，其結構、空間處理、用料都是十分之實用、環保和以人為本呢。上圖中那「好揸手門柄」，單睇個樣，已經明晒點揸 。不過，我用慣右手開門噃 ... ...

Barcelona Chair，在港的潮流設計乸脷傢俬店見得多，在「less is more」的 Mies van der Rohe Pavilion 親眼目睹，別有一番 original 貴氣。三歐羅入場費睇一個類似盒仔的極簡約建築 (幾道牆而已)，可能有很多人會覺笨丁 (我都有少少覺)，但當中的歷史背景、設計理念、對建築學的深遠影嚮，不是可以用那三塊錢衡量的呢。


Miró 的超現實又是另一種的「怪」，那份「怪」令我想起自己一直的處事和思想方法。令我看到「怪的價值」、「怪的可貴」、「怪的有趣」。正路、懶專業、夠型夠靚、公認的美、萬千寵愛 ... ... 其實都幾鬼悶！

因為那西班牙同學女個老豆是當地設計人，有點 connection，所以我們到訪了幾個設計單位和一個類似 D&AD 的獎項 exhibition。原來西班牙的設計水平都真係唔講得笑，水準相當高，行家也相當的有心有力，做商業 job 之餘還經常有自家 project 陶冶一下。當中 Vasava 的 Place project 更出現同胞朋友的大名，認真 international，與眾同樂兼交流無國界。

... ... ... ... ... ...

以前覺得「怪」這個形容詞很負面，但自遠走他方留學後，越來越覺得「怪」可以是一種解放，是一種自由，是一種無畏的開拓胸襟，是其中走向 creativity 的門匙。
... ... ... ... ... ...

諗起怪，其實自己的家鄉就已經的確怪極！一個巴士阿叔可以攪到全城哄動，成為網上熱話，怪人怪事怪物天天新款日日新奇。啊！我知道點解我咁愛康港啦，應該就是那份令人愛恨交纏的怪風吧！

... ... ... ... ... ...

毋忘六四。