有一種人 (希望唔係多數)，擁有一股特殊力量 (唔知天生定後天練成)，可以將喜氣洋洋嘅氣氛，或風光壯麗嘅美景，以一兩句說話，即達大煞風景之效！
難得有機會到遠方旅遊，好應該拋開平日世俗的枷鎖，逃離都市煩囂的生活節奏，好好享受片刻的悠閒，欣賞一下四周宜人的美景，領會異地不同的風土人情，休息一下，反常一下。可惜，原來這種想法，對「風景煞星」而言，一切都是奢求，一切都是「surreal」！
「見風景殺之，見閒情毀之，我就是『風景煞星 ... 星星星 ... 』！」
... ... ... ... ... ...
「難得嚟到敦倫，不如到處走走啦！」
「有乜好介紹先？」
「可以去去 museum 啦，例如 British Museum。」
「好喎，好出名㗎喎。」
翌日
「去咗 British Museum 未？」
「去咗啦，都冇嘢睇嘅！睇完木乃伊，十五分鐘出返嚟嚕！」
「... ... (都好，好過冇去 ... )」
... ... ... ... ... ...
「喂，我想 shop 下 ping，有冇好介紹？」
「Oxford Street 呀，Regent Street 呀，Covent Garden 呀，都有幾多好地方㗎。」
「好平㗎？」
「一啲啲啦，總括而言都唔算太平。」
「唓 ~~~！唔平去嚟做乜？！」
「觀光一下都好嘛。」
「咦 ~~~ 唔去，浪費時間！」
「 ... ... (返康港去花園街吖笨！)」
... ... ... ... ... ...
「吖，你咁得閒，不如上 London Eye 飽覽一下泰晤士河兩岸景色啦。」
「幾錢先？」
「十二、三鎊左右啦。」
「嘩！咁貴？！咪攪我！都只不過係摩天輪一個咋嘛？！」
「... ...」
... ... ... ... ... ...
「其實敦倫都有唔少地方值得遊覽。」
「例如呢？」
「Hyde Park，海德公園。」
「乜嚟㗎？有好多嘢玩？」
「冇乜㗎，其實主要係一個好大好大嘅公園，內有小湖泊、天然環境囉，夏天敦倫人好鍾意喺嗰度晒下太陽，picnic 一下咁，好自在㗎！」
「咁咋？！好悶啫，冇乜興趣。」
「... ... (起座過山車俾你好冇呀？！)」
... ... ... ... ... ...
「一鎊一罐可樂，痴筋嘅都！」
「一鎊一罐可樂，痴筋嘅都！」
「一鎊一罐可樂，痴筋嘅都！」
「一鎊一罐可樂，痴筋嘅都！」
「一鎊一罐可樂，痴筋嘅都！」
「一鎊一罐可樂，痴筋嘅都！」
日日講。
... ... ... ... ... ...
「唏，劍橋好玩嘛？」
「Ok 啦，冇乜嘢睇，去咗兩個零鐘就返嚟嚕。」
「咁快？咪仲短過程火車？真係咁冇嘢睇？冇搭康河嗰啲小船咩？冇去下 Trinity College 睇睇咩？你讀理科㗎喎，應該幾啱睇吧。」
「... ... 冇喎 ... ... 不過有件事好正！」
「係？乜事？ (難得難得 ... ...)」
「呢，我哋去劍橋程火車諗住上咗車至買飛，哈，點知全程冇人查飛，卒之搭咗程免費車！(好開心) 唔講你唔信，回程嗰程又係咁，我哋最後足足慳咗廿幾鎊！(極之 proud of 自己所作所為)」
「... ... (咪行咁近，我唔識你！)」
... ... ... ... ... ...
「康港真係好！乜都有！又平！鋪頭又開得晏！搭車又抵！」
「都係嘅 ... ... (咁你又嚟？)」
「英國係真唔掂！今次真係貼錢買難受！十幾鎊食一餐都唔飽！」
「係？... ... (你大食咋嘛？)」
「以後咪駛旨意我再嚟！」
「... ... (好呀！)」
... ... ... ... ... ...
「喺倫敦，仲有乜好去處啫？」
「(其實有好多好多，去之不盡，如 Habitat、Tate Modern、Saint Paul Cathedral、Brick Lane、Old Spitalfield Market、Columbia Road Flower Market、Portobello market、Greenwich、Barbican Centre、Design Museum、National Gallery、V&A、Harrods、Tower of London、Tower Bridge、Jamie Oliver 間
15、Charing Cross 啲舊書店、馬克斯個墓 ... ... etc。不過 ... ... 驚你唔係嫌人哋「貴」就係「冇嘢睇」，所以 ... ...) 其實，你去咗 Big Ben 嗰帶，都 ... 差唔多啦，七七八八㗎啦，敦倫其實真係幾悶 ... ...」
「嘿，你都話悶呢！」
... ... ... ... ... ...
「去完個名勝，覺得好玩嘛？」
「Ok 啦。本來一心諗住難得咁遠嚟到，不如買番件紀念品啦 ... ...」
「(咦？有啲啲雅興喎！)」
「嘿！！！點知俾我見到件嘢，原來『Made in China』！嘩！我即刻放低走人啦！」
「咁嗰件嘢喺大陸又買唔到嘅... ... (夠薑以後唔買中國製造嘅嘢吖笨！)」
... ... ... ... ... ...
「不如呢件啦？」
「唓！康港都有得賣啦！」
「咁，呢個呢？」
「我唔好去深圳買！」
「嗱，呢隻好啦啩！」
「我有隻差唔多㗎啦！」
... ... ... ... ... ...
「咦？點解啲風景死晒嘅？！？！」
「嘿嘿嘿嘿！因為我就係 ... ... 『風景煞星 ... 星星星 ... 』！殺！殺！殺！殺！」
